پاکستان ءِ راستی چی اَنت؟
نبشتہ کار: آئیشہ بلوچ
دی بلوچستان پوسٹ
اگاں ما دنیا ءِ دِگہ راجانی راجدپتراں وان ایں گُڑا سرپد بَہ ایں کہ دنیا ءِ ھر راجے ءَ راجی بامرد ءُ نمیران ھست اَنت اگاں ما دنیا ءِ دیمروی کُتگیں راج ءُ آیانی ڈیھاں بچار ایں گُڑا ما زان ایں کہ ھمے ڈیھ ءِ نِندوک سرجمیں راج اَنت، پیسر ءَ گلام اِت اَنت یا ابرمی آپت ءُ اندوھاں دُچار کپت اَنت گُڑا آیاں وتی راجی آجوئی ءِ ھاتر ءَ بے کساس کربانی داتگ ءُ وتی راجی ءِ بزگی مار اِت پمیشکا آیاں وتی راج ءُ سرڈگار دوست اِنت ءُ مُدام راج ءِ دیمروی ءِ واست ءَ جُھد کن اَنت لھتے درور انچوشکہ جاپان جھان ءِ دومی مستریں جنگ ءِ وھد ءَ ایٹم بمب ءِ برانز ءَ سُتک ءُ پد ءَ بازیں وھد ءَ زمین چنڈی بیرانیاں ھم آماچ بوت۔ چین ءَ بچار جاپان ءِ گلام بیتگ وھدے کہ بےکساس جُھد ءُ کربانیانی رند ءَ آجو بوت گُڑا آیانی تہ ءَ راجدوستی ودی بوت ءُ پد ءَ وتی راج ءِ دیمروی ءِ واست ءَ سک کار اش کُت۔ ھمے پیم ءَ پرانس، برتانیہ ءُ اٹلی بزاں سرجمیں یورپی راج، جھانی جنگاں(World Wars) پد جنگی بیرانی ءُ گلامی ءِ مارشت ودی بیان ءَ راجدوستی یے آیانی تہ ءَ ودی بوت۔ ما بنگلہ دیش ءَ بہ گِند ایں کہ ھمے راج ءَ ھم پہ وتی راجی آجوئی ءَ دژمن ءِ ھر وڑیں لگتمالی، چُکچینی، زالبولانی بے شرپی، کُشت ءُ کوش، گِسانی ماندارگ ءُ آزاری سگان ءَ وتی راجی آجوئی ءِ جُنز دیم ءَ بُرتگ ءُ راج اش آجو کُتگ۔
اگاں تو جھانگیر برتانیہ ءِ ھلاپ ءَ ھندوستان ءِ راجی آجوئی ءِ جُنز ءَ چمشانکے دئے گُڑا ترا بے کساس راجی بامرد ءِ نام گِندگ ءَ کیت انچوشکہ مَوّیران الاگومتوکُن، دھیران چِناملے، اھمداُلہ، منگل پانڈے، مھمد ھسن دیوّبندی، اِنایت الہ مشرکی، چندرہ شنکر آزات، بھاگوتی چرن، شباش چندرہ بوس، سردار ولو بائی پٹیل، نیرو، گاندی، بتو کشور دت، یوجندر شُکلا، ونیاک سروارکر ءُ مُلانا ابولکلام آزات ءِ وڑیں دگہ ھزاریں راجی بامرد اَنت کہ آیاں پہ راجی آجوئی ءَ زورگریں برتانیہ ءِ زِندان ءُ سیلولر جیل ءِ وڑیں آزارجاہ سگ اِت اَنت۔
ھمے داب ءَ ھندوستان ءِ راجی آجوئی جُنز ءِ دپتر ءَ شیرزالانی نام ءُ داستان ھم ترا وانگ ءَ رس اَنت انچوشکہ بانُک لکشمی سھیگل، آرونا سیپ اَلی، میڈم بھکاجی کاما، میڈم ھزرت ماھل، کاملا نھرو، کسترو گاندی، رانی لکشمی بَھی، اوشنا مھتا ءُ اینی بسنت ءِ وڑیں شیرزال کہ آیاں پہ وتی راجی آجوئی ءَ جُھد کُت۔ وتی لس مھلوک ءَ گلامی ءِ مارشت ءُ راجی ءِ آجوئی بستار ءُ ارزِشت ءِ سرپدی دیان ءَ راج ءِ تہ ءَ آشوب اش ودی کُت۔ ھندوستان 30 جون ءِ روچ ءَ وتی راجی جُنز ءِ نمیران ءُ بامردانی یات ءَ شاتکامی کنت۔
وھدیکہ انگریز ءَ زانت کہ نی ھندوستان ءِ راج یکمُشت اِنت، چہ من ءَ آجوئی لوٹگ ءَ اِنت ءُ ایشانی راجی آجوئی ءِ جُنز سوبمند بوُان اِنت گُڑا ڈیوائیڈ اینڈ رول ءِ بُنیات ءَ انگریز سرکار ءَ مُلا سیئت اھمد ھان، مھمد اَلی جناہ، الامہ اکبال ءُ لیاکت اَلی وڑیں کاسگ چٹّ ودی کت اَنت ءُ پاکستان ءِ وڑیں بے ابرمی اِستانے اڈ کُت نی شُما بچار اِت کہ زاناں چہ اِے مُلا سیئت اھمد ھان، مھمد اَلی جناہ، الامہ اکبال، لیاکت اَلی ھان ءُ کسے انگریزانی زِندان ءُ آزارجاہ بیتگ؟ ءُ زاناں پاکستان ءِ لوٹوکے انگریزاں پاھو داتگ؟
اِنُا ءُ ناں کہ ایشانی سْیاد ءُ وارسے انگریز ءَ کُشت ءُ نَیکہ چہ ایشاں کسے ءَ نِکوبار آئیلینڈ اینڈ پورٹ آپ بلیر بدنامیں “سیلولر جیل” ءَ زِندے گْوازینتگ۔ البت دگہ ھزارانی کَچ ءَ ھندوستان ءِ راجی آجوئی ءِ جُھدکار انگریزانی زِندان ءُ آزارجاہ ءَ لٹ شاپی ءُ آزاری ءِ دیمپان بوت اَنت۔ بزاں انگریز ءَ پاکستان مُپت ءَ اڈ کُت پمیشکا آزات ھندوستان ءِ رھشون ءُ کانگریس ءِ کارمستر مُلانا ابولکام آزات ءَ 1946 ءَ گْوشت کہ اے پاکستان پہ ھُشکنات ھِند ءِ مُسلماناں یک بیرانی یے چریشی ءَ مسلمان بھر ءُ بانگ بنت، پاکستان ھم پد ءَ پْروش ایت ءُ بنگلہ دیش جُتائیں مُلکے جوڑ بیت۔ پاکستان پْروشت ءُ پْروش ءَ رند یک استانے نہ بیت بلکیں پاکستان ءِ جِند پہ کار ءُ باری مردماں یک دُکانے جوڑ بیت ءُ پاکستان ھچبر دیمروی نہ کنت۔ پہ مُلانا ابوکلام ءِ پیشگْوشیانی گیشتر وانگ ءُ زانگ ءَ شُما چہ گوگل ءَ ھم شوھاز کُت کن اِت۔
نی ما گِند ایں کہ 1971 ءَ کاسگ چٹّیں مھمد اَلی جناہ ءُ لیاکت الی ھان ءِ دو راجی سسا ءِ وتگڑیں پاکستان پْروشت ءُ مرچی پاکستان ءِ مھلوک بھٹو ءِ سِلکاریں پاکستان ءَ ناامُیتیں زِند گْوازینگ ءَ اَنت اود ءَ ناں مُزّ ءُ انساپے ھست ءُ ناں کہ وشھالی ءُ دیمروی یے ھست نَیکہ چد ءُ پد دیمروی یے کنت اے مُلک ءَ سندہ ءِ لھتے جاگیردار ءُ وڈیرہ۔ پنجاب ءِ چوھدری ءُ انڈسریلسٹ، پشتونانی ٹیکنوکریٹ ءُ بیروکریٹ۔ بلوچستان ءِ لھتے راجدروہ ءُ کوڑائیں میر ءُ سردار ءُ پوج پہ وتی سِلکاری ءَ جُنزینگ اِنت۔
مرچی پاکستان یک 136 بلین ڈالر ءِ وامدار اِنت، مُلک ءَ بے کساس بے روزگاری ءُ گرانبھائی اِنت ءُ اِے بے پوریاگِری ءُ، ڈنّی وام ءُ گرنبھائی تْرُندی ءَ ودان اِنت۔ اِے مُلک ءِ تہ ءُ چاریں نیمگاں بے کساس جنگی جیڑہ اَنت۔ پوج ءُ سیاستدان ئِے سرجمی ءَ سِلکار اِنت۔ پاکستان ءِ مھلوک، بِہ گر پاگواجہ تاں چپڑاسی ءَ، دْراہ دو لمبر اَنت۔
اے ملک ءِ مستریں ھتر ءُ تُرس راجمستری اِنت چی ءَ کہ اگاں مُلک ءَ راجمستری بیت گُڑا ماں گچینکاری ءَ مُدام پنجابی باج بر اَنت کہ آیانی سْیاسی سیٹ گیشتر اَنت چریشی ءَ سندھی راجدوست پائدگ زور اَنت ءُ سندھودیش ءِ آجوئی لوٹ اَنت پمیشکا چہ وتگڑیں گچینکاری ءَ پوجی ترامگیج وتی کاسگچٹ پی پی پی ءَ سوبمند کن اَنت کہ پی پی پی سندہ ءِ آجوئی لوٹوکیں راجدوستانی ھلاپ ءَ ھمیشانی مستریں سِلاہ اِنت انچوشکہ بلوچستان ءِ راجدوستیں گلانی ھلاپ ءَ دژمن راجدروھیں دمگی نواب، سردار ءُ میراں کارمرز کنت۔ دْروگیں کشمیر ءِ نام پاکستانی پوچ داں ھپتدہ سال ءَ بزگیں پاکستانی مھلوک ءَ رَد دیگ ءُ پُلگ اَنت۔ مرچی بنگلہ دیش جی ڈی پی ءُ دیمروی ءِ پھناتاں چہ پاکستان ءَ سک باز دیم ءَ شُتگ بلے پاکستان یکشل پُشت ءَ روان اِنت بے ھال مہ بَہ اِت من ھما بنگلہ دیش ءِ ھبر ءَ آں پیسر ءَ پاکستان گلام بیتگ۔
ماں اِے مُلک ءَ جمائیت الدواہ ءُ ٹی ایل پی ءِ وڑیں بازیں وتگڑیں اسلامی نیکراھی گل پہ وتی سیاسی پائدگاں پوج ءَ اڈ کُتگ اَنت ءُ بازیں اِے وڑیں گل سِند ءُ بلوچستان ءَ راجدوستی ءِ ھلاپ ءَ کارمرز بوگ ءَ انت۔ گِند ئے پاکستانی پوج ءِ اسلامی نیکراھی سِلاھبندیں گلانی پلہ مُرزی مرچاں ٹی ٹی پی ءِ دْروشم ءَ پاکستان ءِ جِند ءَ بیران کنگ ءَ اَنت۔ ٹی ٹی پی ءِ جھاد، آزات ھیالیں بلوچ راج ءِ آجوئی لوٹوکیں سرمچار، پاکستان ءِ بے زری، سِلکاری ءُ پاکستان ءِ تہ ءَ سْیاسی پڈا اے دْراہ چیز پدرا کن اَنت کہ پاکستان زیت پْروش ایت۔
اگاں اِے مُلک ءَ پہ کربانی ءَ آجو بوتیں یا اِے مُلک ءَ راجی آجوئی ءِ مامردے بوتیں۔ یا مھمد الی جناہ انگریزاں پاھو بہ داتیں گُڑا بلکیں پاکستان مُھکم بوتیں، دیمروی ئِے بہ کُتیں ءُ پاکستان ءِ مھلوک ءَ بہ زانتیں کہ پہ اے مُلک ءَ ما چے کربانی دات ءُ مرچی پرچا مئے مُلک ماں بدیں جاوران اِنت۔ چوناھا اِے مُلک ءَ پنجابی، سندھی، بلوچ ءُ پشتو ءِ وڑیں راج بندیگ اَنت ءُ اے دْراھیں چہ پاکستان ءَ وتی ڈیھ ءُ راج ءِ آزاتی لوٹ اَنت۔
شالا ھمے تیوگیں زیردستیں راجاں آجوئی بہ رسات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔