کمیشنانی نام ءَ بیگواھیں مردمانی کھول رد دیگ بوگ ءَ انت – ماما قدیر بلوچ

شال ءَ زورانسری آوار جنگ بوتگیں مردمانی ھاتر ءَ جوڈ کنگ بوتگیں بنجل ءَ چار ھزار ءُ نُھ سد ءُ ھشت روچ سرجم بوتگ انت – مروچی چہ ڈیرہ غازی خان ءَ وقار بلوچ، شعیب بلوچ، ابوبکر بلوچ ءَ ھوار دگہ مردماں بنجل ءَ اتکگ ءُ دلپدردی درشان اِتگ –

بنجل ءَ اتکگیں مردمانی گوم ءَ تران کنان ءَ وائس فار بلوچ مسنگ پرسنز ءِ رھشون ماما قدیر بلوچ ءِ گوشگ ات کہ بلوچستان ءِ تہ ءَ پاکستان ءَ وتی زوراکی برجاہ داشتگ انت، سوبائی ءُ وفاقی سرکار زورانسری آوار جنگ بوتگیں مردمانی درگت مدامی وتی درشاناں مٹ کن انت گوش انت کہ آ پاکستان ءِ ادارھانی گور ءَ نہ انت – راستی ءَ پنجاہ ھزار گیش مردم پاکستان ءِ چیریں زنداناں بندیگ انت ءُ ھمک روچ مرگ ءِ دیمپانی ءَ کنگ ءَ انت – بلے پاکستان ءِ سرکار وتی اے کتکاری ءَ نہ منّگ انت –

ماما قدیر بلوچ ءَ گوشتگ کہ میان استمانی ادارھانی دیم ءَ وت ءَ بے میار کنگ ءِ ھاتر ءَ پاکستان ءِ سرکار مدامی نیاد کنت ءُ کمیٹء جوڈ کنت بلے ھچ کمیٹی ءَ روچ مروچی وتی رپورٹ دیم ءَ.نیاؤرتگ انت پرچا کہ بلوچستان یک پوجی بنجل ءِ جوڈ کنگ بوتگ کہ اودا درسیں پیسلھانی واکداری پوج ءُ چیریں ادارھانی دست ءَ انت –

آئی ءَ گوشتگ کہ اگاں ادا پوج ءُ آئی ءِ کمک کارانی درگت ءَ کسے گپ ءِ بہ جنت توار چست بہ کنت گڈا جنگ ءُ کُشگ بیت اِنت ءُ دومی نیمگ ءَ انسانی ھکانی میان استمانی ادارہ بس ھمک سال درشان ءِ دئینت ءُ دگہ ھچ – بلوچستان ءَ ھچ وڈیں میکنزم نیست ءُ روچ مروچی ھچ کس ءَ ھستیں وھدے جاور مانیٹر نہ کتگ انت –

ماما قدیر بلوچ ءَ گوشتگ کہ یک نیمگ ءِ استان ءِ پارلیمان زورانسری آوارجنیانی گر ءُ دار ھاتر ءَ کمیشن ءُ کمیٹی جوڈ کنگ ءَ انت وھدیکہ دومی نیمگ ءَ ھمے ھپتگ ءَ بازیں ورنایے آوار جنگ ءُ بیگواہ کنگ بوتگ کہ آھانی تہ ءَ گوستگیں روچ ءَ آوار جنگ بوتگیں دو نودربر سراج ءُ عارف ھم ھوار انت کہ آھانی کھول زھرشانی کنگ ءَ انت –

ماما قدیر بلوچ ءِ گوشگ ات کہ انسانی ھکانی ادارھانی نیمگ ءَ زورانسری آوار جنگ بوتگیں مردمانی کھولاں ھچ وڈیں کانودی کمک دیگ بوگ ءَ نہ انت – یک دگہ دلگوش دیگی گپ ءِ اش انت کہ یک انسانی ھکانی ادارھے ءَ بیگواھیں مردمانی ھما کچ ءُ کساس درگت ءَ رپورٹ ءِ شنگ کتگ آئی ءَ مئے گل نہ منّیت – اے جاورھالاں بلوچستان ءِ تہ ءَ ھمک روچ نودربر، وکیل ، ڈاکٹر ءُ سیاسی باسک ءُ دگہ تکاں سیادی داروکیں مردم پاکستانی پوج ءُ چیریں ادارھانی دست ءَ آوار جنگ ءُ شھید بوگ ءَ انت ھمے ھاتر ءَ بلوچ راج پاکستان ءِ آمیدگس ءُ دگہ ادارھانی سر ءَ بیسہ نہ کنت –