نبشتانک: ٹی ٹی پی ءِ گوں بلوچ راج ءَ سْیادی؟
نبشتہ کار: آئیشہ بلوچ
دی بلوچستان پوسٹ
چیزے روچ بیتگ کہ پاکستانی میڈیا ءَ ھوار دُنیا ءِ بلاھیں میڈیا ءُ ھالکار تھریک تالبان پاکستان(ٹی ٹی پی) ءِ بابت ءَ باز باوست کنگ ءَ اَنت کہ 15 اگست 2021 ءَ اوگانستان ءِ تہ ءَ اوگان تالبان ءِ سرکار اڈ دیگ ءَ پد ٹی ٹی پی جنگی ھساب ءَ باز مُھکم بوتگ چریشی ءَ اوگانستان ءِ وڑ ءَ پاکستان ءِ تہ ءَ ھم وتگڑیں راجمستری ھلاس بیت ءُ اسلامی رِد ءُ رھندیں شرھی کانودے رواج دیگ بیت اِنت۔ چوناھا پاکستان ءِ تہ ءَ راجمستری ءِ وَ جِند نہ بوتگ بلکیں اود ءَ مُدام ءُ یکشل ءَ سِلکاریں لشکر(کرپٹ پوج) ءُ مُناپِکیں سیاستدانی دْروگیں راجمستری یے برجاہ اِنت۔ چوناھا اے جیڑہ باوست ھما وھد ءَ گیشتر البار بوتگ وھدیکہ ٹی ٹی پی ءَ وتی یک جارے ءَ گْوشتگ کہ مکُران ءِ یک بلوچ گْوریلہ گلے ءَ گوں ٹی ٹی پی ءَ ھمسنتی(بیت) کُت۔ البت ٹی ٹی پی ءَ وتی جار ءِ توک ءَ اے سرپدی وَ نہ داتگ کہ ھمے بلوچ گوریلہ گل ءِ سروک کَے بوت کہ گوں مُلائی ءُ نیکراھی ٹی ٹی پی ءَ ھمسنتی ئِے کُتگ۔ اگاں ھورت بچار ئے بلوچ راج یک آزات ھیال ءُ راجمستری ءِ منّوگر ءُ رندگیرے راجے بوتگ۔ بلوچیت وت یک سرجمیں رھبند ءُ کانودے ءُ مئے چاگِردی جیڑہ دْراہ بلوچی دود، رسم ءُ رواجانی رِد ءَ گیشگیوار بنت۔ بلوچ راج مرچیگیں دُنیا ءِ نیکراھی جنگ ءُ جھاداں ھچبر بھرے نہ بوتگ۔ بلوچ ءُ بلوچیت ءِ رِد ءَ اسلام بنی آدم ءُ ھُدا ءِ میان ءَ یک سْیادی یے ءِ نام اِنت پمیشکا اسلام نیکراہ ءَ گوں سْیاست ءُ سْیاسی جیڑھیان ھچ کارداری نیست۔ البت سْیاست پہ ھما راجاں بیت کہ آ راج آجو ءُ وتی ملک ءِ وتواجھین راجے بنت بلے بلوچ وَ ایردست ءُ گُلام اِنت، بلوچ ءَ اول پہ وتی راجی آجوئی ءَ جنگ جُھد کنگی اِنت پمیشکا بلوچ پرچا راج ٹی ٹی پی ءَ ھوار بیت؟-
چوناھا بلوچ راج ءِ راجی گھگِری جُنز چہ نیکراھی جنگی گل ٹی ٹی پی ءِ جُنز ءَ سک کْوھن اِنت۔ مئے آجوئی ءِ جنگ شھزادگ ابدلکریم ءَ چہ 27 مارچ 1948 ءَ بُنگیج کُت وھدیکہ پوکستانی پوچ ءَ بلوچستان دزگیر کُت۔ پد ءَ ھما اِنت کہ پہ راجی آزاتی ءَ بلوچ راج یکشل ءَ دُژمن ءِ ھلاپ ءَ گھگِری کنگ ءَ اِنت ما بے ھیال مہ بہ ایں کہ 1956-57 ءَ بابو نوروز ھان، 1973-78 ءَ بابا ھیر بکش مری، اتا اُلہ مینگل ءُ گوسبکش بزنجو ءِ راجی آجوئی ءِ جنگ ءَ بہ گِر داں ھستیں وھد ءِ بلوچ راجی آجوئی ءِ جنگ شھید بالاچ مری ءُ شھید نواب اکبر ھان بُگٹی ءِ چہ 2002 ءَ بُنگیج کُتگ۔ مرچی ئیں اے جنگ ءَ بلوچ مرد ءُ زالبوال دوئیں بھر اَنت۔ بلوچ وانِندھانی بھر زورگ ءِ برکت ءَ براس ءُ بی ایل اے ءِ سپیشل ٹیکنیکل اسکاڈ ءُ مجید برگیڈیر ءِ دْروشم ءَ راجی آجوئی جنگ ءَ بے کساس دیمروی کُتگ۔ اے راجی جنگ ءُ دُژمن ءِ کُتگیں زُلم ءُ زوراکیاں سرجمیں بلوچ راج پہ وتی آجوئی ءَ آگاہ کُت۔
البت ٹی ٹی پی وَ 2007 ءَ ودی بوتگ، ٹی ٹی پی ءُ بلوچ راجی آجوئی ءِ جنگ میان ءَ ھچ وڑیں نزیکیں سْیادی نیست۔ گِند ئے ٹی ٹی پی وَ پاکستان ءِ سلامتی لوٹ ایت، ٹی ٹی پی ءِ سسا ءِ رِد ءَ پاکستان وت مہ پْروش ایت، بلکیں پاکستان ءِ کرپٹ سْیاسی ءُ کارءُباری پوجی سسٹم ماں اے چیرجنگ ءَ بہ پْروش اَنت ءُ پاکستان ءِ تہ ءَ ھم کتر، ملائیشا، دبی ءُ اوگانستان ءِ وڑ ءَ شرھی اسلامی رھبند رواج دیگ بہ بنت کہ اود کرپٹ انگریزی آمیدگِس(Judicial System)، مالیاتی ترامگیجانی تہ ءَ سوُد ءِ کارءُبار ءُ ھیرامنڈی ءِ وڑیں ھزاریں سِلکاری ءُ بے ھیائی ھلاس بنت۔ گِند ئے اے دْراہ پہ پاکستان ءِ سیت ءُ پائدگ ءَ اَنت کہ چہ ایشی ءَ پاکستان ءِ تہ کرپشن ھلاس بیت ءُ میریٹ ءِ آسر ءَ پوکستان دیمروی کنت۔
بلے بلوچ راج دِگہ چیزے لوٹ ایت۔ بلوچ راج ءَ ھزارانی کچ ءَ وتی ورناھیں بْرات، گْوھار ءُ کماشانی سر ءُ بلوچ شھر ءُ میتگانی ماندارگ ءُ بیرانی پہ پوکستان ءَ کُربان نہ کُتگ اَنت۔ بلوچ راج تھنا وتی راجی آجوئی لوٹ ایت ءُ مارا گوں اے ٹی ٹی پی ءِ جنگ ءِ ھچ سْیادی ءُ نزیکی نیست۔ ٹی ٹی پی ءِ کامیابی بلوچ چاگِرد ءُ بلوچ راجی آجوئی ءِ بیرانی اِنت۔ البت ٹی ٹی پی ءِ جنگ دُژمن ءَ نزور ءُ بیران کنت ءُ دُژمن ءَ پروشین ایت چمیشکا مارا پہ وتی راجی آجوئی ءَ یک بلاھیں موھے رس ایت انچوشکہ 1991 ءَ ایراک ءُ امریکہ ءِ جنگ ءَ کُرد راج ءَ آجوئی ءِ موہ رس ات، 2015 ءَ ارب آشوب ءِ آسر ءَ شام مُلک ءِ سول وار ءَ شامی کُرد راج ءَ آجوئی ءِ موہ رس اِتگ، 1971 ءَ انڈیا ءُ پاکستان ءِ جنگ ءَ بنگلادیش ءَ آجوئی ءِ موہ رس اِِت ھمے وڑ ءَ بلوچ راج ءِ ھم آجوئی ءِ یک بلاھیں موھے الم رس ایت پرچا کہ پوکستان یک دْروگے، پوکستان یک مُلکے نہ بوتگ۔ ما بچار ایں اوگانستان وت یک ابرمی مُلکے اَت، اوگانستان ءَ بازیں وھد ءَ اُلسی جنگاں ھوار سرکاری لشکر ھم بازیں وھداں بدل ءُ مٹ بوتگ اَنت بلے اوگانستان وَ بھر ءُ بانگ نہ بوتگ ءُ ناں کہ اوگان لس مھلوک ءَ پہ اوگانستان ءِ بھر ءُ بانگ ءَ ھیالے ھم کُتگ چی ءَ کہ آ وت ءَ دْرہ اول اوگان گْوش اَنت پد ءَ کسے وت ءَ تاجک، اُزبک، ھزارا، بلوچ ءُ پشتون گْوش ایت بلے اگاں ٹی ٹی پی ءِ جنگی آسر ءَ پاکستان ھم اوگانستان ءِ ڈول ءَ السی جنگے ءِ آماچ بیتگ ءُ لشکر ئِے پْروش وارتگ گُڑا زاناں پاکستان وت ءَ زِندگ دار ایت یا کسے سندھی ءُ کسے وت ءَ پنجابی ءُ پشتو گْوش ایت۔ دومی پاکستان ءِ اکانومی ھالاتاں ما وَ سرپد ایں کہ اے گوریلہ جنگ ءَ چون برداشت کنت۔
گُڑا مئے بلوچ راج زاناں پہ اِے موہ ءَ تیار انت کہ اگاں پاکستان ءِ سرکار یا لشکر ءَ اسلامی چیرجنگی گل ٹی ٹی پی ءِ دست ءَ پْروش وارتگ بلوچ راجی رھشُون دیم ءَ کا اَنت ءُ وتی راج ءَ چہ پاکستان ءِ السی جنگ ءَ پھریز اَنت۔ اگاں پاکستان ءِ نیکراھی سِلاھبندیں گل یکمُشت بنت گُڑا باید انت بلوچ راج ءِ سِلاھبندیں گل وتی وتواھی ءُ زاتی پائدگاں مہ چار اَنت ءُ یکیں گلے ءَ ھوار بہ بنت بلوچ راجی سِلاھبندیں جُھد شالا سوبین بات ءُ راج ءِ سرڈگار بلوچستان آجو بات ءُ بلوچستان دیمروی بہ کنات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔