روکپتی بلوچستان: ایرانی پولیس ءِ سر ءَ اُرش، ’مزاران گمنام بلوچستان‘ گلے ءَ زمہ واری من اتگ

روکپتی بلوچستان ءِ بنجاھی شھر زاھدان ءَ ھواریں دمگ تردست ءَ سلاہ بندیں مردماں ایرانی پولیس ءِ سر ءَ اُرش کتگ-

اُرش تردست ھما وھد ءَ کنگ بیتگ کہ پولیس گوستگیں شپ ءَ تر ءُ تاب ءَ بیتگ ءُ ناشناسیں مردماں نشانگ کتگ-

ایرانی سرھنگ بزانکہ انتزامیہ پولیس ءِ زاھدان ءِ آپیسر خدارھم فروغی ءَ گوشتگ کہ’ تردست ءَ پاسگاہ ءِ انتزامیہ گشت ءَ بیتگ کہ سلاہ بندیں مردماں آیانی سر ءَ اُرش کرتگ‘-

آئی ءَ گوشتگ کہ اے اُرش ءَ چہ پولیس ءِ یک کارندھے ٹپیگ بیتگ ءُ اُرشکار تتکگ ءُ شتگ اَنت-

دومی نیمگ ءَ ’ مزاران گمنام بلوچستان ‘ نامی گلے ءَ یک تامربندے وتی مونوگرام ءِ ھمراھی ءَ شنگ کتگ ءُ اے اُرش ءِ زمہ واری من اتگ-

مزاران گمنام بلوچستان نامی گلے ءَ اے اُرش ءِ وھد ءِ تامر ھم شنگ کتگ ءُ تامر ءَ گندگ بیت اِنت کہ گشت کنوکیں پولیس ءِ سر ءَ تیرگواری کنگ بوگ ءَ اِنت-

اے اولی رند اِنت مزاران گمنام بلوچستان نامیں گلے ءَ اے اُرش ءِ زمہ واری پہ وت ءَ زرتگ-

چد ءُ پیش ھم ایرانی پولیس ءُ دگہ ادارھانی سر ءَ اُرش بیتگ اَنت بلے آ اُرشانی زمہ واری کس ءَ پہ وت ءَ نہ زرتگ اَنت-

روکپتی بلوچستان ءَ اُرشانی ترندی ھما وھد ءَ دیم ءَ اتکگ اَنت کہ سی ستمبر ءَ زاھدان ءَ آدینگ ءِ نماز ءَ پد زھرشانی کنوکانی سر ءَ تیرگواری بیتگ ات ءُ چریشی ءَ پد روکپتی بلوچستان ءَ ایرانی پولیس ءُ دگہ ادارھانی سر ءَ اُرشاں کمو ترندی بناہ کتگ-