نودربر گل بلوچ اسٹوڈنٹس ایکشن کمیٹی شال ھنکین ءِ نیمگ ءَ چہ یک وانگی سرکلے ھنکین ءِ کارمستر اُزیر بلوچ ءِ پاگواجہی ءَ برجم دارگ بُوتگ – سرکل ءِ بنگپ گلوبالائیزیشن ءُ بلوچ نودربر سیاست بوتگ ءُ ڈگری کالج ءِ لکچرار آصف بلوچ ءَ اشی ءِ سر ءَ تران کُتگ –
دیوان ءِ بِندات ءَ آئی ءَ انسانی چاگرد بابت ءَ تران کنان ءَ گوْشتگ کہ کوھنیں زمانگاں چاگرد ءِ سٹرکچر دیگہ وڑے ءَ بوتگ، بندات ءَ مھلوک سک باز وازمندگ بوتگ انت ،ورنائیں مردماں شکار کتگ ءُ کماش ءُ چکاں ھواری ءَ وارتگ ءُ زندگ گوازینتگ- بِزاں اودا شکار ءُ یکجاھی (Hunting and Gathering) ءِ چاگرد ءِ بوتگ – مردمانی معاشیت شکار ءِ سر ءَ بیتگ – گڈا چاگرد ءِ تہ ءَ یک آشوبے اتکگ کہ آ آشوب ءَ گشنت ‘ڈومیسٹیکیشن آشوب’ مردماں ھمے دلوت شکار ءَ چہ ابید دگہ سیتانی زورگ ھاتر ءَ ھم کار مرز کتگ انت، پہ درور سواری ءِ ھاتر ءَ کار مرز کنگ ، نادراھی ءِ ھاتر ءَ ساھدارانی کار مرز کنگ، بزاں ساھدار دارگ ءُ رودینگ بِندات کتگ – آ وھد ءَ انسان ءِ چاگرد ءِ تہ ءَ سِیر ءُ گریب، سیاہ ءُ اسپیت ءِ ھچ تپاوت نہ بوتگ، پد ءَ انسان ءَ وتی چاگرد تہ ءَ یک بدلی آورتگ، انسان ءَ کشت ءُ کشار( ایگریکلچر) ءِ بندات کتگ ،بلے اے کشت ءُ کشار(رودینگ) زالبُولاں درگیتکگ پرچا کہ زالبول گیشتر اے چیزاں نزیک تر بوتگ انت ، لنگار سازگ بوھگ ءَ پد ایگریکلچر ریوولوشن اتکگ ءُ مردماں پروڈکشن ءِ بندات کتگ گڈا ھمدا چہ باپاری سسٹم اتکگ – مردماں چیزانی بدل ءَ چیزانی باپاری بندات کتگ گڈا کاؤنٹنگ، آرٹ، جنگ ءُ جدل ، قبضہ گیریت ءُ انسانانی تہ ءَ سِیری ءُ گریبی ءِ پرک ءِ بندات چہ ھمدا بوتگ ءُ چہ ھمدا تھذیب ھم بندات بیتگ- انسان ءِ جوڈ بوگ ءِ تہ ءَ زبان یک مزنیں ایجاد ئے، زبان ءَ مھلوک یکجا کتگ۔ شانزدھمی کرن ءَ سٹیم انجن سازگ بیتگ، آپی گُراب سازگ بوتگ ءُ انڈسٹری جوڑ بوتگ انت – یورپ ءِ تہ ءَ انڈسٹریل آشوب اتکگ – ھمے وڈ ءَ چاگرد جوڈیشتانی بنیاد ءَ دیم ءَ شُتگ ءُ مرچی اے جاھ ءَ سربوتگ –
ہمدا انسانءِ معیشت ایگریکلچر ءَ چہ انڈسٹری ءَ ترّ اِتگ – انسان ءَ روزگار ءِ واست ءَ چہ کوچگاں لڈءُ بار کنگ بندات کتگ ءُ بازاراں شتگ اَنت ءُ ادا کھولی جوڈشت پرشت ءُ پروش ءِ آماچ بیتگ، میڈیسن ءُ فلاسفی دیم ءَ اتکگ – ھمے داب ءَ اے دنیا گوں وتی اشتاپیں گاماں کیپیٹلزم ءُ کلونائزیشن ءِ دورءَ پُترْتگ-
آئی ءَ دیمتر ءَ گوشتگ کہ یک وھدے دنیاءِکساس ھشتاد درسد ایردست ( کالونائیز) بیتگ – وھد گوْزان ءَ دنیا ءِ تہ ءِ چاگردی ءُ سائنسی آشوب اتکگ ھمے آشابانی تہ ءَ مائیکرو چپ سازگ بیتگ کہ اشی ءَ انفارمیشن آشاب گوْش اَنت ءُ ادءَ چہ سائنسی ازباب سازگ بنت (کمپیوٹر الیکٹرانک) ءَ مھلوک دنیا ءِ گوم ءَ نزیک بیت ءُ کہ مرچی سرجمیں دنیا ءَ مھلوک یک ءُ دومی ءَ گوں نزیک اِنت نوں اے وھد ءَ دنیا ءِ گلوبل ولیج گشگ بیت –
آئی ءَ گوشتگ کہ گلوبلائزیشن ءِ امل چہ دومی جھانی مزن جنگ ءَ پد سک باز تیز بیتگ – وھدے دومی جھانی مزن جنگ ہلاس بیت گُڈا بازیں ایردستیں راج ءُ استانے آجو بیت ءُ زورگیریں تاگتانی کالونی پُرْشنت – گڈا دنیا ءِ اے زورگیریں استان سائنسی ازبابانی کمک ءَ چہ وتی ساناں ماں اے ایردستیں راجاں برجاھ دار اَنت – گلوبلائزیشن ءِ نام سر ءَ اے زورگیریں تاگت وتی تاگت ءَ برجاھ داران ءَ جتائیں ادارہ سازنت ءُ ھمے دمگاں وڈے نہ وڈے ءَ ساڑی بنت – گلوبلائزیشن دگہ ھچ ءِ نہ انت بگندے نیوکالونیلزم اِنت کہ ہما تاگت وتی کُلیں شئے آں ایردستیں رجانی سرءَ مُشگ ءِ ھاترءَ جوڈ بیتگ – اشی ءِ سان باز انت کہ آھانی تہ ءَ سیاسی،معاشیءُ دود ءُ ربیدگی ھوار اَنت – اشی ءِ سوْبءَ ایردستیں راجانی زبان،سیاست، دودءُ ربیدگ، معاشیت ءُ تب کُل سانمند بنت-
آصف بلوچ ءَ گوں نودربراں تران کنان ءَ گوشتگ کہ مرچی انچیں تندے جوڈ اِنت کہ ہرچ ایردستیں راج ابید چہ زوراوریں تاگتانی منگ ءَ سُریت ہم نہ کن اَنت – سیاسی درگت ءَ دنیا ءِ ایندگہ راجانی سیاست ءُ آھانی تب انچوش مٹ کتگ کہ مرچی آ پُشت ءَ روان اَنت ءُ آھانی چاگردی جوڈشت تباھ کنگ بیتگ انت – دود ءُ ربیدگی درگت ءَ بازیں راجانی دود ءُ زبان گار بیگ اِنت ءُ زورگیریں تاگتانی زبان ءُ دود زیرگ بیگ اِنت – انسان ءِ ھرچ پِڈ مرچی اے تاگتاں وتی چنگلاں کتگ –
آئی ءَ گوشتگ کہ ھرچ دیم ءَ شتگیں چاگرداں ابرمی دروشم ءَ وتی تہ ءَ مٹی آورتگ ءُ دنیا ءَ آشوب اتکگ کہ مرچی اے جاھ ءَ سر اِنت آشوب یک انچیں امل ئے کہ ایشی ءَ کس داشت نہ کنت- مٹی ءِ دو تھر انت کہ آ ترا دیمءَ ھم برت کنت ءُ پُشت ءَ ھم آورت کنت – بلے زورگیریں تاگتاں ایردست ءُ کسانیں راجانی ابرمی آشوب ءِ دیم داشتگ ءُ وتی زوریں وتجوڈیں آشوب داتگ –
دیوان ءَ دیم ءَ بران ءَ آئی گُشت کہ مرچی بلوچ راج یک مظلوم ءُ محکوم ایں راج یے – بلوچ ءِ سر ءَ یک تاگتے زوردست اِنت – اے تاگت ہر شَے ءَ مٹ کنت کہ اشانی تہ ءَ زبان ،تب ، سیاست ءُ ایندگہ پھناتاں مٹ ءُ بدل کنت ءُ وتی یک زوریں رنگے دات یے –
آئی گُشت کہ اے وھد ءَ بلوچ راج ءِ پجار سک باز ھترہ ءِ تہ ءَ اِنت- زورگیر مار ءَ بزگ ءُ ایردست کنگ ءِ ہرچ وڈیں کوشست کنگ ءَ اِنت- مرچی زورگیریں تاگتانی پندلاں بلوچ نودربر انچو بے سما کتگ اَنت کہ آہانی تہ ءَ ساچستی رنگ باز کم گِندگ ءَ کئیت – نوکیں اھد ءِ نوکیں سائنسی ازباباں بلوچ ورنا روبوٹ جوڈ کتگ اَنت اشی ءِ مستریں درور موبائل ءُ انٹرنیٹ ءِ کارمرز اِنت کہ اشانی کارمرز کنگ ءَ بلوچ نودربرانی وتی جند ءِ ساچست مُرتگ ءُ آ چہ ڈنءَ اتکگیں ازباب ءُ ھیال ءُ لیکھاں چہ سانبند بنت – بائد وا ایش ات کہ ما اے سائنسی آشوب ءِ پائدگ چِست کتیں ءُ وتی راج ءِ ہرچ شَے رکینتیں بلے اشی ءِ چپ بیگ اِنت – مئے نودربر انچو بے سما اَنت کہ ہستیں دور ءِ لوٹانی پھمگ ءَ بے سوب اَنت- راجی سِنچ ایش بیت کہ راج ءَ ھستیں وھد ءَ ھرچ پڈ ءَ سوبین کنگ ءِ جھد بیت۔ بلے بژنی گپ ایش اِنت کہ ما وتی جیڑگ کسان کتگ اَنت ءُ دنیا ءِ تہ ءَ آوکیں مٹیانی بابت ءَ بے سما ئیں- بلے نوں اے نودربرانی زمہ واری اِنت کہ آ وت وان ءُ سرپد بنت پدا وتی ایردستیں راج ءَ سرپدی دینت۔
مارا یک راج یے ءِ بیگ ءِ واستہ ھرچ پڈ ءَ سوبین بیئگ لوٹیت۔ دنیا ءِ تہ ءَ سائنسی ءُ ایندگہ مٹی پبمگی اَنت۔ راجی ءُ میان استمانی سیاست ءُ آھانی چِست ءَ ایرانی بابتءَ سرپدی دارگ المی انت۔بائدیں کہ نودربر سیاست ءَ شریں وڈے ءَ سرپد بہ بنت ءُ مکسد ءِ سرءَ دلگوش بہ کن اَنت۔ وھدے مئے تہ ءَ راجی سِنچ کئیت ءُ ما راجی ھوالہ ءَ پہ ھک ءُ دل جیڑیں ءُ راج ئے بیگ ءِ لوٹانی پیلو کنگ ءَ جُھد کنیں گڈا ما سوبینی ءِ مِنزلءَ نزیک بہ ایں-
دیوان ءِ گُڈ سر ءَ جُست ءُ پُرس بیت، جُستانی پسّو دیگ ءَ پد دیوان آسر کنگ بُوتگ –