کلات، گوادر ءُ تربت ءَ بوتگیں اُرشانی زمّہ واری بلوچ سلاہ بندیں گلاں منّ اِتگ انت

بلوچستان ءِ دمگ تربت ءُ گوادر ءَ پاکستانی پوج ءُ کلات ءَ پولیس تانہ ءِ سر ءَ بوتگیں اُرشانی زمّہ واری بلوچ آجوئی لوٹوکیں سلاہ بندیں گل بلوچ لبریشن آرمی ءُ بلوچستان لبریشن فرنٹ ءَ منّ اِتگ انت –

بی ایل ایف ءِ جارکش میجر گوھرام بلوچ ءَ وتی شنگ کرتگیں درشان ءِ تہ ءَ بلوچستان ءِ تیاب دپی دمگ گوادر ءُ تربت ءَ پوج ءِ سر ءَ بوتگیں سَے اُرشانی زمّہ واری منّ اِتگ –

جارکش ءِ رِد ءَ گوستگیں روچ ءَ بیست ءُ ھشت دسمبر ءِ بیگاہ ءِ ادار چار ءَ مئے سرمچاراں گوادر ءِ دمگ کنڈا سول تنک ءَ برجاھیں پاکستانی پوج ءِ پانگِسے ءِ سر ءَ گوں دور جنگیں توپک ءَ اُرش کُتگ چریشی ءَ یک پوجی کارمند ءِ مُرتگ –

جارکش ءَ گوشتگ کہ اُرش ءَ پد ترس آماچیں دژمن پوج ءَ پہ دیم مارٹر گولہ آس داتگ –

میجر ءَ دیمتر ءَ وتی درشان ءِ تہ ءَ گوشتگ کہ مئے سرمچاراں بیست ءُ شش دسمبر ءَ تربت بازار ءَ سنیما چار راہ ءِ سر ءَ برجاھیں دژمن پوج ءِ پانگِسے ءِ سر ءَ ھم دزبمب اُرش ءِ کُتگ ءُ ھمے روچ ءَ شپ ءِ ادار نُھ ءَ تربت ءِ بازار جوسک ءَ برجاھیں پوجی پانگسے ءِ سر ءَ ھم دزبمب اُرش ءِ کتگ – ھردو اُرشاں دژمن پوج ءَ تاوان رستگ –

جارکش میجر گوھرام بلوچ ءَ گوشتگ کہ بی ایل ایف ھر سئیں اُرشانی زمّہ واری ءَ منیت ءُ دژمن پوج ءِ بلوچستان ءِ در آیگ ءَ تاں مئے اُرشانی درچ برجاہ مان انت –

دومی نیمگ ءَ کلات ءَ پولیس تانہ ءِ سر ءَ بوتگیں دز بمب اُرش ءِ زمّہ واری بی ایل اے ءَ منّ اِتگ –

بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ مئے سرمچاراں گوستگیں شپ ءَ کلات ءَ پولیس تانہ ءِ سر ءَ دزبمب اُرش ءِ کُتگ –

جارکش ءِ رِد ءَ اُرش ءِ آسر ءَ پولیس ءَ جانی ءُ مالی تاوان رستگ –