دراجکش ءُ پُرایمنیں جھد کنگے بیھار دیگ بوگ ءَ اِنت – ماما قدیر بلوچ

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی چار ھزار ءُ نُھ سد ءُ شش روچ سرجم بوتگ انت –

مروچی بی ایس او ءِ رھشون جیئند بلوچ، شھباز بلوچ، میر وارث بلوچ ءُ دگہ سیاسی ءُ چاگردی باسکاں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ مروچی جھان ءِ دیم ءَ پدر انت کہ بلوچ راج انسانی ءُ راجی ھکانی ھاتر ءَ پرایمنیں جھد ءَ وتی پرز لیک ایت –

آئی ءَ گوشتگ کہ پاکستانی ادارہ بلوچ راجی زرمبشت ءِ ھلاس کنگے کوشست ءَ بلوچ راجکاریں باسک، زانتکار، نودربر ءُ دگہ تک ءُ پھناتاں سیادی داروکیں مردمانی کُشت کوش ءُ ھزاراں بلوچ پرزنداں آوار جنگ ءُ بیگواہ کنگ ءَ اِنت –

آئی ءَ گوشتگ کہ پاکستانی ادارہ ءُ آئی ءِ داشتگیں کُشندہ ٹولی جھان ءَ گمراہ کنگے ھاتر ءَ وڈ وڈیں پندل کنگ ءَ انت – پاکستانی چیریں ادارھانی نیمگ ءَ بیھار دیگ بوگ ءَ انت، بیگواھیں مردمانی ھاتر ءَ برجاھیں دراجکش ءُ پُرایمنیں زھرشانی ءِ ھلاس کنگے جھد بوگ ءَ انت –

آئی ءَ گوشتگ کہ پاکستانی پوج ءُ چیریں ادارہ چہ پُرایمنیں جھد ءَ تُرسگ ءَ انت پرچا کہ شست ھزار بلوچ پرزندانی زورانسری آوارجنی ءُ بیگواھی ءَ ھواریں پاکستانی پوج وتی کتکاریانی چیردیگ جھد ءَ انت –

ماما قدیر بلوچ ءَ گوشتگ کہ اے پُرایمنیں گوستانکی زھرشانی ءَ پاکستانی نیمگ ءَ کنگ بوتگیں انسانی ھکانی لگتمالی جھان ءِ دیم ءَ زاھر کُتگ انت ءُ جمہوری ءُ پرایمنیں جھدے نوکیں راجدپتر ءِ نبیس اِتگ-