تیرتیج ءُ ھیرونک ءِ اُرشانی زمّہ واری بی ایل ایف ءَ منّ اِتگ انت

سربوتگیں ھالانی رِد ءَ گوستگیں شپ ءَ ناشناسیں مردماں بلوچستان ءِ دمگ آواران تیرتیج ءَ پاکستانی پوج ءِ بنجل ءُ پھازگی پانگسے ءِ سر ءَ اُرش کُتگ – اُرش ءَ پاکستانی پوج ءَ جانی تاوان ءِ دیمپانی کنگ کپتگ –

ھمے وڈ گوستگیں روچاں ناشناسیں مردماں کیچ ءِ دمگ ھیرونک ءَ یوفون کمپنی ءِ ٹاور ءِ مانداشتگ –

یوفون موبائیل کمپنی ءِ ٹاور ءِ سر ءَ بیست ءُ شش دسمبر ءَ اُرش کنگ بوتگ ءُ آئی ءِ مشین ءُ دگہ ازباب مانداشتگ انت – یوفون ٹاور ءِ ماندارگ ءُ پوج ءِ سر ءَ بوتگیں ھردو اُرشانی زمّہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءَ منّ اِتگ انت –

بی ایل ایف ءِ جارکش میجر گوھرام بلوچ ءَ وتی شنگ کرتگیں درشان ءِ تہ ءَ گوشتگ کہ مئے سرمچاراں گوستگیں شپ ءَ آواران ءِ دمگ تیرتیج ءَ پاکستانی پوج ءِ بُنجل ءِ سر ءَ راکٹ ءِ دو گولہ آس داتگ کہ بنجل ءِ تہ ءَ کپتگ اَنت، چریشی ءَ دُژمنیں پوج ءَ جانی ءُ مالی تاوان دیمپانی کنگ کپتگ –

میجر ءَ گوشتگ ھمے دمان مئے سرمچاراں تیرتیج ءِ جِکّ ءِ کوہ ءِ سر ءَ برجاھیں پوجی پانگس ءِ سر ءَ ھم دورجنگیں توپک ءَ یک پوجی کارمند ءِ نشانگ کرتگ ءُ کُشتگ-

جارکش ءَ دیمتر ءَ وتی درشان ءِ تہ ءَ گوشتگ کہ بیست ءُ شش دسمبر ءَ دوشمبے ءِ روچ ءِ ادار ھشت ءُ نیم ءَ سرمچاراں کیچ ءِ دمگ ھیرونک ءَ یوپون کمپنی ءِ موبائل ٹاور ءِ مشین ءُ دگہ ازباب مانداشتگ اَنت آئی ءَ گوشتگ کہ زورگریں اِستان پہ وتی آسراتی ءُ سرمچارانی ٹریس کنگ ءَ موبائل کمیونیکیشن کمپنی ءِ کمک ءَ موبائل ٹاوراں نوکیں چیز ءُ دگہ ڈیوائس ءُ سامان بندگ ءَ اِنت ءُ بلوچ جھدکارانی تاوان دیگ ءِ جھد ءَ کنگ ءَ اِنت – ما اے ھیل ءُ ھُنراں شر سرپد ایں-

آئی ءَ گوشتگ کہ پاکستانی پوج ءِ سر ءَ اُرشاں ھوار ھوار ءَ درسیں سامراجی شوربندی سرمچارانی نشانگ ءَ اَنت-