کیچ: گوستگیں دو روچاں برجاھیں ھوراں، نھنگ ءِ کور ءَ آروسیانی گاڑی کپتگ چریشی ءَ یک جنکوے بیران

بلوچستان ءِ دمگ کیچ ءَ گوستگیں روچ ءَ تُرندیں ھور ءِ سبب ءَ نھنگ ءِ کور ءَ آروسیانی گاڑی کپتگ چریشی ءَ دو سالی ئیں جنکوے ءِ آپ ءَ برتگ ءُ آ بیران بیتگ-

سربوتگیں ھالانی رِد ءَ بلوچستان ءِ دمگ تمپ ءَ یک پک اپ گاڑی یے نھنگ کور ءَ برتگ ءُ چریشی ءَ آئی ءَ سواریں زالبول چُک پہ مسیبتی کشگ بوتگ اَنت بلے وھدے کہ یک دو سالی ئیں جنکوے آپ ءَ برتگ ءُ بیران بیتگ مردمانی رِد ءَ انگت آئی ءِ لاش گندگ نہ بیتگ-

بیران بیتگیں جنکوے ءِ پجّار امیرہ ء عثمان جھمنند دازن نام ءَ چہ بیتگ-

اِھوالکارانی رِد ءَ اے وئیل ھما وھد ءَ دیم ءَ اَتکگ وھدے کہ پک اپ ءَ پُریں چُک ءُ زالبول آروس ءَ چہ واتر آیگ ءَ بیتگ اَنت گومازی ءِ کراس ءَ نھنگ کور ءَ گاڑی ءَ مانداتگ ءُ چریشی ءِ آسر ءَ گاڑی کور ءِ تہ ءَ پس اِتگ ءُ تُرندیں ھور ءِ آسر ءَ کور ءِ آپ گیش بوتگ ءُ آپ ءَ گاڑی برتگ ءُ چریشی ءَ پد مردمانی بلاھیں جُھدے ءَ گاڑی ءَ سواریں چُک ءُ زالبول کش اِتگ اَنت وھدے کہ دو سالی ئیں جنکو امیرہ کشگ نہ بوتگ ءُ آپ ءَ برتگ ءُ بیران بیتگ انگت آئی ءِ لاش گندگ نہ بیتگ-

زانگ بہ بیت گوستگیں روچاں بلوچستان ءِ جتاجتائیں دمگاں تُرندیں ھورانی سبب ءَ کور ءُ شیپ آپ ءَ سریچ بیتگ اَنت –