تربت ءَ پاکستانی پوج ءِ دست ءَ دگہ شش مردم بیگواہ کنگ بیتگ اَنت

بلوچستان ءِ دمگ کیچ ءِ بُنجاھی شھر چہ تربت ءَ گوستگیں روچ ءَ پاکستانی پوج ءَ شش مردم زورانسری آوار جتگ ءُ بیگواہ کتگ اَنت-

چمّدیستانی رِد ءَ سے شمبے ءِ شپ ءَ سینما چوک ءَ یک دکانے ءَ چہ شپ ء سابت دہ ءُ چلّ ملٹ ءَ چہ ھُزدار بلوچستان ءَ سیادی داروکیں شش نان پچیں برات سرف گاڑیاں سواریں مردماں لَٹ ءُ کُٹانی نشانگ کتگ ءُ بیگواہ کتگ اَنت-

چمّدیستانی رِد ءَ سلاہ بندیں نکاب پوشیں مردماں ایف سی ءِ کُمک گون بیتگ آیاں دگ بند کتگ ءُ اے پوریاگر بیگواہ کتگ اَنت، بلے تنیگت ءَ اشانی پجّار نہ بیتگ-

زانگ بہ بیت ھمے ھپتگ ءَ اشی ءَ ساری تربت ءِ دمگ گوکدان ءِ جتاجتائیں لوگاں بیڑبرتگ ءُ چار ورناہ بیگواہ کتگ اَنت، اے ورناھانی پجّار مرزا ء برکت، بلال ء حاجی عبدالعزیز، عبدالرزاق ء محمد جان ءُ محمد حنیف ء غلام جان نام ءَ چہ بیتگ اَنت وھدے کہ گوکدان ءَ ھم محمد حنیف دادو نامیں ورنایے ساری ءَ چہ بیگواہ ءَ اِنت-

اشی ءَ ابید تربت ءِ دمگ آبسر ءَ چہ یعقوب میتگ ءَ سے ورناہ سید جان ، شھزاد ءُ جھانزیب زورانسری آوار جتگ ءُ بیگواہ کتگ اَنت کہ آیانی درگت ءَ ھچ سرپدی نیست –

ھمے ھپتگ ءَ چہ تربت ءَ پاکستانی پوج ءِ دست ءَ بیگواہ مردمانی کچ سیزدہ ءَ سر بیتگ اَنت- اشی ءَ اَبید دو ورناہ پاکستانی پوج ءَ آوار جتگ اَت کہ آئی ءِ بگیری ءَ دمگ مردماں پنچ روچ ءَ تاں نندانک جتگ سی پیک شھدگ بند کتگ ءُ زھرشانی ءِ سبب ءَ پوج ءَ دوئیں ورناہ یل کتگ اَنت-