زاناں بلوچ زُبان دوست اَنت؟
نبشتہ کار: شازیہ بلوچ
دی بلوچستان پوسٹ
بلوچ راج ءِ نودربر سُھب ھشت ءِ ادار ءَ بہ گِر تا نیمروچ ءَ پارسی، ھندی ءُ سندھی وڑیں درآمدی زباناں ماں وانگجاھاں وان اَنت ھمے رنگ ءَ ھمروچ ماں وانگجاہ ءَ پنچ ساھت یکشل ءَ درونتاں وان اَنت ءُ چکاساں دے اَنت گُڑا بیگاہ یک ساھتے ٹوشن ءَ ھم رو اَنت ءُ ھما وانگجاہ ءِ چیزاں پد ءَ وان اَنت پد ءَ وھدے کہ ھمے نودربر مستر بنت، شش ءُ ھشت تبک ءَ سر بنت گُڑا پارسی، سندھی ءُ ھندی وانگ ءُ نبیسّگ ءَ چیزے زان اَنت بلے انگت ءَ زبر وَ نہ بنت بژن انت کہ پد ءَ ھمے نودربر انچیں رَدیں ھیلے آماچ بنت کہ راجی زبان ءِ گُپتاری ءِ ساھت ءَ ھم بلوچی ءِ زگریں گالاں ڈالچار کنان ءُ شموشان ءَ درآمدیگیں زبانانی گالاں ھوار کن اَنت۔
اگاں ما وتی راجی زبان ءِ شائِر ءُ رھشُوناں ھم ھورت بہ چار ایں کہ آ ھم گِندگُش ءُ وتگُشانی گُلگدار ءُ نِند ءُ نیادانی مراگشاں بلوچی ءَ گوں ھندی ءُ پارسی ءَ ھوار کن اَنت بژن انت کہ ھمے راجی رھشُون ءُ کواس اے ھم نہ زان اَنت کہ مئے بلوچی مئے مستریں راجی پجّار اَنت پمیشکا باید انت ما وت بلوچی بوان ایں ءُ بلوچی نبشتہ بکن ایں کہ مئے منّوگریں بلوچ مھلوک ھم مئے رندگیری ءَ بہ کنت کہ چریشی ءَ راجی زبان ءِ وانگ ءُ نبیسّگ ءِ آشوبی ودی بہ بیت چی ءَ کہ چہ زبان ءِ وانگ ءُ نبیسّگ ءَ یک گُلامیں راج ءِ لس مھلوک راجدوست ءُ ڈیھ دوست جوڑ بیت وھدیکہ راج ءِ لس مھلوک ڈیھ دوست بیتگ اَنت گُڑا ھما راج ھجبر گلامی نہ منّ ایت۔
یکے وَ مئے راجی زبان ءِ دیمروی ءِ واست ءَ ھچ وڑیں آسراتی یے نہ بیتگ، ناں کہ روتاک ءُ ھالتاکے، ناں کہ گِندگُشی چینل ءُ ازمکاری ءِ بُنجاھی ترامگیجے بیتگ ئِے ناں کہ گلامیں راج ءِ زھگاں ماں وانگجاھاں مئے وتی راجی زبان ءِ وانگ ءُ دربرگ ءِ موکلے ھست گُڑا دومی نیمگے ءَ مرچاں راج وتی راجی زبان ءِ گُپتاری ءَ ھم زگر داشت نہ کنت چریشی ءَ راجی زبان گار ءُ بیگواھی یے آماچ انت۔
باید اِنت ما بلوچ راج مرچاں پیسبُک ءُ وٹس ایپ ءِ وڑیں دامگی آسراتیانی راستیں کارمرزی ءَ بہ زان این ءُ وتی زبان ءِ وانگ ءُ زانگ ءَ وھد بہ دے ایں۔ وتی دزھُورکی ءِ ھمُک ساھت ءُ دمانے پہ راجی زبان ءِ دربرگ ءُ دیمروی ءَ بہ دے ایں ما بلوچ راج یک سرجم ءُ شاھگانیں زبان ءِ واھند ءَ ایں پمیشکا باید انت ما چہ پارسی ءُ ھندی ءِ وازمندگ مہ بہ ایں بلکیں وتی راجی زبان ءِ گُپتاری ءِ وھد ءَ ھم بلوچی ءِ کْوھن ءُ زگریں گالاں کارمرز بہ کن ایں کہ مئے ھستیں وھد ءِ پدریچ ءُ زھگ ھم بلوچی ءِ گالاں بہ زان اَنت، چریشی ءَ ڈالچار ءُ بیگواھیں گالاں نوکیں ھاٹیگے بہ رس ایت۔ ھمے پیم ءَ ما گوں راجی زبان ءِ کواس ءُ ندکاراں ھم دزبندی کن ایں کہ نبیسّگ ءِ وھد ءَ بلوچی ءِ کْوھن ءُ زگریں گالاں کارمرز بہ کن اِت کہ مئے راجی زبان ءِ ھر گالوار ءُ گال ءَ مھکمیں ھاٹیگ بہ رس ایت۔
اگاں ما بلوچ راج ءِ نودربر تا ھشت سال ءَ ھمروچ شش ساھت پہ پارسی، سندھی ءُ ھندی ءِ وانگ ءُ دربرگ ءِ جُھد کن ایں گُڑا باید انت ما ھر روچ دو ساھت پہ وتی راجی زبان بلوچی ءِ دربرگ ءَ ھم بہ دے ایں مارا وتی راجی زُبان ءِ درونت وانگ ءُ نبیسّگ لوٹ ایت ما بلوچی وت بہ وان ایں ءُ راج ءَ ھم بہ وانین ایں چوناھیگا پہ ھر بلوچ ءَ بلوچی وانگ سَک آسان اِنت پمیشکا اول بلوچی دَرونتاں وانان ءَ راجی زُبان ءِ وانگ ءَ ھیل بہ کن اِت ما شُما تکانسر نہ کن ایں کہ شُما یکپارگی بیا اِت ءُ راجی زبان ءَ نبیسْ اِت البت ما گوں شُما دزبندی کن ایں کہ اول راجی زبان ءِ بُنگیجی درونتاں بہ وان اِت ءُ پد ءَ بلوچی آزمانک، گْوشکند، سرگْوست، نبشتانک ءُ کسھانی وانگ ءَ وھد بہ دے اِت بلوچی لبزانک ءِ تب ءَ بہ زان اِت گُڑا پد ءَ کم کم ءَ نبشتہ بندات بہ کن اِت باید اِنت ما درونتانی تیار کنگ ءِ پریکٹس بہ کن ایں۔
بلوچ راج شالا زُبان دوست ءُ راجدوست بات، بلوچی شالا دیمروی بکنات ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔