ھزدار ءُ آسیا آباد ءَ پاکستانی پوج ءِ سر ءَ بوتگیں اُرشانی زمّہ واری بلوچ سلاہ بندیں گلاں منّ اِتگ انت

سربوتگیں ھالانی رِد بلوچستان ءِ دمگ ھزدار ءَ مروچی ناشناسیں مردماں پاکستانی پوج ءِ سر ءَ دزبمب اُرش ءِ کُتگ –

اُرش ھزدار ءَ عباس مارکیٹ ءِ نزیک ءَ پاکستانی پوج ءِ گاڑی ءِ سر ءَ کنگ بوتگ کہ ناشناسیں مردماں اتکگ ءُ گاڑی ءِ سر ءَ دزبمب ءِ چگل داتگ ءُ در شُتگ انت –

دومی نیمگ ءَ گوستگیں روچاں نوزدہ دسمبر ءَ ناشناسیں سلاہ بندیں مردماں کیچ ءِ دمگ آسیا آباد ھم پاکستانی پوج ءِ سر ءَ اُرش کُتگ –

اُرش ءَ پاکستانی پوج ءَ جانی تاوان ءِ دیمپانی کنگ کپتگ – ھزدار ءُ آسیا آباد بوتگیں ھردو اُرشانی زمّہ واری بلوچ آجوئی لوٹوکیں سلاہ بندیں گل بلوچ لبریشن آرمی ءُ بلوچستان لبریشن فرنٹ ءَ منّ اِتگ انت –

بلوچ لبریشن آرمی ءِ جارکش جیئند بلوچ ءَ وتی درشان ءِ تہ ءَ گوشتگ کہ بی ایل اے ءِ سرمچاراں مروچی ھزدار ءِ بازار ءَ زورگیریں پاکستانی پوج ءِ کارمندانی سر ءَ ھما وھد ءَ اُرش کُتگ وھدیکہ آ عباس مارکیٹ ءِ نزیک ءَ وتی گاڑی ءِ تہ ءَ بوتگ انت –

جارکش ءَ گوشتگ کہ سرمچاراں گاڑی ءِ تہ ءَ دز بمب ءِ چگل داتگ کہ گاڑی ءِ تہ ءَ کپتگ ءُ ترک اِتگ چریشی ءَ دو کارمند سک باز زدگ بوتگ انت وھدیکہ گاڑی ءَ ڈن یک کارمندے ھم زدگ بوتگ ءُ دژمن پوج ءِ گاڑی سرجمی ءَ تباہ بوتگ –

جارکش ءَ گوشتگ کہ بلوچ لبریشن آرمی اے اُرش ءِ زمّہ واری ءَ منیت ءُ کول کنت کہ زورگیریں پوج ءِ در آیگ ءَ تاں مئے اُرش برجاہ مان انت –

بلوچستان لبریشن فرنٹ ءِ جارکش میجر گوھرام بلوچ ءَ وتی درشان ءِ تہ ءَ گوشتگ کہ مئے سرمچاراں نوزدہ دسمبر ءِ شپ ءِ ادار دوازدہ ءَ کیچ ءِ دمگ آسیا آباد برجاھیں پوجی پانگس ءِ سر ءَ اے ون گولہ آس داتگ کہ اے ون پانگس ءِ تہ ءَ کپتگ انت دژمن پوج ءَ جانی ءُ مالی تاوان ءِ دیمپانی بوتگ –

جارکش ءَ گوشتگ کہ زورگیریں پوج ءِ سر ءَ مئے اُرش بلوچستان آجوئی ءَ تاں برجاہ مان انت –