نبشتانک: شال ءِ مھر
نبشتہ کار: شاھد داد
دی بلوچستان پوسٹ
چوناھا گُش اَنت کہ شال وتی مردم ءَ ارزان ءَ یلہ نہ کنت۔ وھدے کہ تو شال کائے ءُ ھمدا چیزے وھد گوازین ئے گڑا شال ءِ دوبر یل کنگ ءُ روگ پہ تو کمیں گران بیت۔ پرچہ کہ شال ءِ مھر یک انچیں مھرے اگاں آ تئی دل ءَ جاگہ بہ کنت گڑا پہ تو شال ءِ یل کنگ ءُ روگ ارزان نہ بیت۔ پرچہ کہ شال تئی دل ءَ انچوش جاگہ کنت کہ تو شال ءَ یل دیگ ءُ روگ پہ ھزار بر جیڑ ئے۔ اگاں تو سر بگرے پہ روگ ءَ گڑا شال ترا دارگ ءِ مزنیں جھدے کنت ءُ چو کتابے ءَ تئی دیم ءَ کیت ءُ ایر بیت۔
ھمے وڑ ءَ من ءَ اوں چار ماہ ءَ گیش اَت کہ من شال ءَ اتکگ اِت آں ءُ ھمے وھد ءَ شال ءِ موسم اوں سرد اَت ءُ پد ءَ سردی ءَ شال کمیں نہ وش اِنت۔ چیاکہ سردی ءَ مردم شال ءَ سک جنجال بیت۔ ھمے وڑا من سر گپتگ اِت آں کہ شال ءَ نوں یل بہ کن آں ءُ بُرواں تربت ءَ بلے منی دل اِے گَپ ءَ وش نہ اَت کہ من شال ءَ یل بکن آں ءُ بُرواں۔ بلے نہ زاناں کہ شال ءَ منا چونیں مھرے داتگ اَت کہ منی دل آئی ءِ یل کنگ ءُ روگ ءَ پہ ھچ رازی نہ اَت۔ پد ءَاوں من دل ءَ را سِنگے پر داتگ اَت ءُ سر گپتگ اِت آں۔
بلےمن ءَ انچو گُماں بوھگ ءَ اَت کہ شال منا دراگ ءِ جہد ھم کنگ ءَ اِنت۔ منی ھما درائیں روچانی منا یات ءَ کیجگ ءَ اَت کہ من ھمدا گوازینتگ اِت آں۔ انچو بگُش کہ شال منا چو کتاب ءِ ڈول ءَ دیما اَت ءُ آئی ھمک تاک ءِ سرا منی درائیں ھما روچ نبشتہ اِت آں کہ من ھمدا گوازینتگ اِت اَنت۔ ھما اولّی روچ ءَ بگر دانکہ مرچی درست ہمے کتاب ءِ بھر اِت آں ءُ درستیں روچ منا یک یک ءَ یات پیداک اِت اَنت۔ ھما روچ کہ آھانی سھباں من ءَ وشّی بکشاتگ ءُ سپر کتگ اِش۔
پد ءَ شال ءِ مستریں وشی شوکیں سنگتانی دیوان بوتگ کہ برے ماں ھوٹل ءَ ءُ برے ماں کمرا ءَ داں شپانی نیم ساھت ءَ وشیں گپ ءُ رپ ءُ مزاک ءُ پدا ھمے سنگتانی دیوان اوں سک یات پیداک اَت۔ پد ءَ لھتے سنگت ھست اِنت کہ آ ھمک مردم ءَ نہ رس اَنت بلے منا رس اِتگ اَت کہ آ وش مزاج ءُ وش گَپ اِت آں۔ ھمے سنگتانی وش گپّیں دیواناں شال گیشتر وشتر کتگ اَت۔ شال من ءَ انچوش وش بوھگ ءَ اَت کہ گُش ئے شال پورا منی جبین ءَ ایر کپتگ اَت ءُ شال من ءَ سک دوست بوھگ ءَ اَت۔
پد ءَ اوں من شال یل کُت ءُ اتکاں۔ کساس یک ھپتگے ھمدا گوازینگ ءَ رند گڑاں منا شال سک یاد اتک۔ دل ءَ ھمے گُشت کہ شال تو وتی مٹ وت ئے۔ من واکی ترا چہ دور بوت آں بلے تئ داتگیں مھراں چہ اِنّاں۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔