کیچ: ورنایانی زورانسری آوار جنی ءِ بگیری ءَ مروچی سیمی روچ ءَ ھم زھرشانی برجاہ

بلوچستان ءِ دمگ کیچ ءَ گوستگیں روچاں پوج ءِ دست ءَ زورانسری آوار جنگ بوتگیں نودربرانی یل نہ کنگے بگیری ءَ مروچی سیمی روچ ءَ ھم زھرشانی برجاہ بوتگ –

زورانسری آوار جنگ بوتگیں نودربرانی کھول ءُ دمگی مردماں بنجاھی شھدگ ءِ سر ءَ نندانک جتگ ءُ دگ بند کُتگ کہ ھنگت بند انت –

زھرشانی ءُ شھدگ ءِ بند بوگ ءِ سوب ءَ شال تاں تربت ءُ گوادر ءِ رؤگ آیگ ءِ در بند انت چریشی ءِ سوب ءَ بازیں گاڑی کتار ءَ اُشتاتگ انت –

زانگ بہ بیت ھژدہ دسمبر ءَ پوج ءَ کیچ ءِ دمگ سامی عمری کہن ءِ میتگ ءَ دو کسان سالیں نودربر زورانسری آوار جتگ ءُ بیگواہ کتگ انت – آوار جنگ بوتگیں ورنایانی پجار یازدھمی تبک ءِ نودربر بدیر ء حبیب ءُ دھمی تبک ءِ نودربر طارق بشیر ءِ ناماں چہ بوتگ انت –

ورنایانی کھول ءُ دمگی مردماں زھرشانی کنان ءَ بنجاھی شھدگ ءِ سرا نندانک جتگ ءُ شھدگ بند کتگ – درنگاز کنوکاں لوٹ کنگ انت کہ ورنا یل کنگ بہ بنت اگاں آھانی سر ءَ کتکاری ءِ الزام ءِ ھست آمیدگس ءَ آرگ بہ بنت –

دومی نیمگ ءَ آل پارٹیز کیچ ءِ رھشون خالد ولید سیفی، خلیل تگرانی ءُ دگہ مردماں سامی ءَ برجاھیں نندانک ءِ سر ءَ شُتگ ءُ دلپدردی درشان اِتگ ءُ تران کتگ – آھان زالبولانی لوٹانی پلامرزی کتگ ءُ نودربرانی یل کنگ ءِ لوٹ کتگ –

سی پیک شھدگ ءِ بندش ءَ آل پارٹیز کیچ ءِ رھشوناں دمگی واکداراں گند نند ھم کتگ بلے تنی وھدی نودربرانی یل کنگے درگت ءَ دمگی واکداراں ھچ وڈیں گامگیج نہ زرتگ –