مادر ءِ وتن شھید بانک کریمہ بلوچ
نبشتہ کار: معراج لعل
دی بلوچستان پوسٹ
گواڈگیں پُلانی ھون شُودیں بوُہ، چندنیں زمین ءِ پاھار ، بولان ءِ بُرز ءُ بلندیں کوہ ءُ جبل ، کیچ ءِ گُلیں مچکدگ ءُ تمپ ءِ شاھیگانیں ڈن ، دستمبر ءِ سارتیں مُوسم ءُ تاکشان ءَ چُش ویران ءُ ابیتک نہ کُرت اَنت چُش کہ تئی اشتاپی ئیں سر گرگ ءَ پُرسیگ ءُ کونیں دگے ءِ دُروشم بکشات اَنت۔
داں روچ ءِ بندات ءَ بگر داں روچ ءِ گُڈی ءَ اے ھبر ءِ منّگ ءَ تئی دِرتہ پُچیں راج ھچ داب ءَ رازی نہ بیت کہ تو اچ ما گِسر بوتگے ءُ دوریں سیمسرے ءَ رپتگے۔ پرچہ کہ بلوچستان ءِ ھمک کُنڈ ءُ دمگ ، ھمک شھر ءُ میتگ ءُ ھمک ھما وانگجاہ ءُ مکتب کہ تئی اَست بوئگ ءِ شُبین ءَ دینت ءُ تئی پُر مھریں نام ءَ پہ شانے گِر اَنت۔
زندگی ایوک ءَ زند ءِ چاریں روچانی دِکا دئیگ ءِ نام نہ اِنت ءُ نہ کہ ایوک ءَ پہ وت ءَ زندگ بوئگ زندگی لیکگ بیت۔ اِشی ءِ مَستریں ءُ ٹوئیں درور شھید بانک کریمہ بلوچ اِنت کہ آئی ءَ ابید اَچ وتی زند ءَ چہ گیش دِرتہ پُچ ءُ لگمتالیں راج ءِ گم گیشتر بوتگ، آئی ءِ مُلکاری ءُ راجکاری ءِ تہ ءَ بھر زُورگ ءِ مَستریں سوب ءُ لوٹ ءُ تماہ زُور گِپت ءُ بندیگیں راج ءِ آجو کنگ بوتگ۔
وھد سَتر تمرد ءُ زُوراک بہ بیت ءُ ھاکمی ءِ جار ءَ بہ جنت بلے بنی آدم ھم ھچ چیزے ءَ چہ کمتر نہ اِنت ۔ اے یک پھک ءُ تچکیں ھبرے کہ وھد ءَ ھما مردم ءَ جتگ ءُ جل ءَ کُرتگ اَنت کہ آوانی سر چو کُوہ ءِ شاشان ءَ بُرز ءُ بُلند بوتگ ءُ مروچی باندا سد من ھاک ءِ چیر ءَ کس آوانی سُوج ءَ نہ کنت۔ بلے اے ھما مردمانی تہ ءَ شُمار کنگ بنت کہ آواں وتی کَچ ءُ کِساس نزانتگ ءُ اَچ وتی بستار ءَ چہ شموشکار بوتگ اَنت۔ اے راستی ءَ کس رد کُرت نہ کنت کہ وھد سکیں ظُلم ءُ زُوراکیں بادشاھے کہ ھچ کس ءَ ماپ نہ کنت ءُ کسی ھاجاتانی پابند نہ بیت۔ اگاں کسے ءَ وھد ءِ ھمگامی کُرت نہ کُرت بزاں کہ پشت کپتگ۔
دنیا ءِ تہ ءَ چُشیں بازیں راجانی درور پہ چارگ ءُ اِش کنگ دست کپ اِیت کہ آ کُجام ڈول ءَ ھاکمیں راجانی دست ءَ لگتمال بوتگ اَنت ءُ کُجام ھساب ءَ گار ءُ بیگواھی ءِ ارجاں بوتگ اَنت۔ ھمے رنگ ءَ بلوچ راج ھم یک کوّنیں ءُ قدمیں راجے ءِ بستارے ءَ اے سر زمین ءِ سر ءَ زندگ مانیت۔ کہ آئی ءِ شاھدی ءَ اَستیں دور ءِ راج دپترانی تہ ءَ لگوشتگیں لبزانی کتار دینت۔ بلے چُش کہ بلوچ راج ھم لگتمال ءُ بیگواھی ءِ نیمگ ءَ میزان میزان ءَ رھادگ بوھان اَت اگاں بانک کریمہ دُروشُمیں راج دوستاں وتی بے بھایں جھد بندات مہ کُرتیں۔
شھید بانک کریمہ بلوچ دنیا ءِ ھما زالبولانی رِد ءَ شُمار کنگ بیت کہ آواں زالبولی جاہ گاہاں مردیں آدمانی کَنڈ گپتگ، چُش کہ بازیں راجانی تہ ءَ آشوب ءِ آرگ ءُ آجوئی ءِ جنگ ءِ ڈُوبہ ایوک ءَ مردیں آدم ءِ سر ءَ بوتگ۔ بلے بلوچ راج ءِ تہ ءَ مُدام اے جُھد ءَ دویناں بھر زُرتگ، اَنچش کہ سمّی ءُ بانّڑی ، ھوروک مراد، شارُل ءُ اِزگل ءِ جوانیں درور دیگ بیت۔
اگاں مروچی باندا اے تیز گامیں وھد ءِ تہ ءَ بلوچ راج ءِ نام ءُ آئی ءِ دلیری ءُ مزن جگری ءِ کِسّہ کنگ بیت دُراہ ھمے بے دروریں راج دوستانی برورد اِنت۔
بہ کول ءِ منضور بسمل ءِ ئیگ ءَ کہ ” زندگی تَلک ءُ کپوت اِنت مرچاں“ اے ھما ملکموتیں تَلک اِنت کہ آئی ءِ ھڈوک دائمی پہ بلوچ راج ءَ سرپتگ ءُ پہ ساہ ءِ گِرگ ءَ دامانے ھم مھتل نہ بیت۔
” رتکگیں ھون منی ماپ ترا سد رند ءَ “
“پُرشتگیں ڈوکے ترا ماپ نہ بیت بولان ءِ “
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔