چمن ءِ سیمسر ءَ چی بیگ ءَ اِنت؟
ٹی بی پی گچینی
زارین بلوچ
مانگیشیتگیں پاک اوگان سیمسر ءَ برجاھیں اَڑ ءَ ھما وھد ءَ سلاہ بندیں جنگے ءِ دروشم زرت، وھدیکہ گوستگیں ھپتگ ءَ پاکستانی سیمسری پوج ءِ وتی اوگان ھمتنگاں گوں دو رند ءَ اَڑ ءُ کُڑ بیتگ اَنت۔ پاکستانی واکدارانی رد ءَ، اے مِڑانی تہ ءَ کم چہ کم ھشت شھری بیران ءُ بازینے ٹپی بیتگ اَنت۔
پاکستانی واکداراں ٹاہ دیان ءَ گُشتگ کہ جنگ یک شمبے ءِ سھب ءَ ھما وھد ءَ بندات بیتگ وھدیکہ اوگان سیمسر ءِ نیمگ ءَ چہ پاکستانی لشکریانی سر ءَ توپ خانہ ءِ ترندیں آس گواری کنگ بیتگ۔ پاکستانی پوج ءِ رسانکدری جارکش (آئی ایس پی آر) ءَ گُشتگ کہ کم چہ کم ھپت مردم مُرتگ اَنت وھدیکہ 16 مردماں بازیں ٹپانی دیمپانی کنگ کپتگ۔
آئی ایس پی آر ءَ دیمتر ءَ گُشتگ کہ پاکستانی لشکریاں “ابید ریا ءُ رو” اُرش “دریشاپ” ءِ “ترندیں پسہ” دیان ءَ پسھی گامگیج زُرتگ۔ آئی ایس پی آر ءِ گُشگ اَت کہ پاکستانی لشکریاں ’الکاپیں‘ پسہ داتگ ءُ دومی نیمگ ءِ شھری نشانگ نہ کُتگ اَنت۔
قندھار ءَ اوگان واکدارانی گُشگ اِنت کہ ڈِکَّر ءَ تک پوجی ءِ مُرتگ ءُ 13 ٹپی بیتگ اَنت۔
پاکستان ءِ دیمپانی ءِ وزیر خواجہ آصف ءَ گُشتگ کہ اوگان سرکار ءَ اے وئیل ءِ سر ءَ پھلی لوٹ اِتگ ءُ نی اے جیڑہ گیش اِتگ۔
پاکستان ءِ دری کارانی دپتر ءَ وئیل ایر جتگ ءُ گُشتگ کہ “چُشیں اپسوزیگیں وئیل دویں ڈیھانی نیام ءَ برجاھیں براتیں ھمبندی ءِ ھمگونگ نہ اِنت۔”
دری کارانی دپتر ءَ یک درشانے تہ ءَ گُشتگ کہ “اوگان واکدار گُشتگ اَنت کہ چُشیں وئیلانی اڑ ءُ کُڑاں چہ رکگ لوٹ اتگ ءُ زمہ وارانی بگیر ءَ ترندیں گامگیج زیرگ لوٹ ایت۔” اِے درشان ءِ تہ ءَ گیشتر گُشگ بیتگ کہ سیمسرانی دویں نیمگ ءَ واکدار جاورھالانی گنتری ءِ نیمگ ءَ روگ ءَ چہ دارگ ءِ ھاتر ءَ نزیکیں رھوت ءَ اَنت۔
گمان بیت اَے رھوت بس نہ بیتگ پرچہ کہ چار روچ ءَ پد پنچ شمبے ءَ دویں نیمگ ءِ پوجی پد ءَ دیم پہ دیم بیتگ اَنت۔ نوکتریں مِڑ ءَ کم چہ کم یک مردمے مُرتگ ءُ دگہ 12 ٹپی بیتگ اَنت۔
ٹپی بیتگیں مردم زیت چمن ڈسٹرکٹ ہیڈ کوارٹر نادراھجاہ ءَ برگ بیتگ اَنت کہ اود ءَ ایمرجنسی جنگ بیتگ۔
تھی ھالاں سرپدیں پاکستانی واکداراں رسانک اھوالاں گوں گُشتگ کہ تیر گواری اوگان سیمسر ءِ نیمگ ءَ بندات کنگ بیتگ۔
البت، اوگان وزارت ءِ دیمپانی ءِ نیمگ ءَ بنداتی رد ءَ مِڑ ءِ بھتام پاکستانی پوج ءِ سر ءَ جتگ، ءُ برجاھیں جاورھال ءِ دارگ ءِ ھاترءَ پرایمنیں ترانکاری ءِ زلورتے ءِ سر ءَ زور پر داتگ۔
چمن ءِ بازکاریں سیمسر ءِ کراسنگ ءِ پد ءَ پچ کنگ ءَ پیسر یک شمبے ءَ لھتیں ادارانی ھاتر ءَ بند کنگ بیتگ اَت۔
سیمسر گوستگیں ماھے ءَ ھم یک ھپتگے ءِ ھاتر ءَ بند کنگ بیتگ اَت وھدیکہ اوگانستان ءِ نیمگ ءَ یک سلاہ بندیں مردمے ءَ پاکستانی لشکریانی سر ءَ تیرگواری کُتگ اَت، چریشی ءَ یک مردمے مُرتگ اَت ءُ دو ٹپی بیتگ اَت۔ چریشی ءَ پد دویں نیمگ ءَ ترندیں تیرگواری کنگ بیتگ اَت، کہ اِشی ءِ آسر ءَ پنچ اوگان کارندہ مُرتگ اَت ءُ دگہ 14 ٹپی بیتگ اَت۔
یک ھپتگے ءَ پد 22 نومبر ءَ پاکستانی سیمسری واکدار ءُ تالبان واکدارانی نیام ءَ نیاد ءَ پد سیمسر پد ءَ پچ کنگ بیتگ اِت اَنت۔ البت، جاورھال انگت ھم اَٹَل اَنت۔
چی بیگ ءَ اِنت؟
مانگیشتگیں پاک اوگان سیمسر بازیں دھکاں چہ اسلام آباد ءُ کابل ءِ نیام ءَ اَڑ ءِ سوب جوڑ بیتگ۔ یک گمانے ءِ ھمے بیتگ کہ، گوستگیں سال ءَ اوگانستان ءَ گوستگیں سال ءِ اگست ءَ تالبانی دستیگ کنگ ءَ پد، پاکستان ءَ آخرکار روکپتی سیمسر ءِ سر ءَ ایمنی دست گپتگ۔ بلے بے امیتیں پئیم ءَ سیمسر ءِ دومی نیمگ ءَ چہ برجاھیں جنگ ءَ اے گمان پروش داتگ اَنت۔
اسلام آباد ءُ کابل ءِ نیام ءَ ناٹاھی ءِ یک مستریں سوب ءِ سیمسر ءِ سر ءَ ٹٹ جنگ ءِ بگیری ءَ تالبانی ایرادگری اِنت۔ تالبان ءَ ڈیورنڈ کِشک ءِ ھند ءَ پاکستان ءِ نیمگ ءَ ٹٹ جنگ ءِ ھک ءِ سر ءَ جُست چِست کُتگ، کہ اِشی ءَ آ دوھیں ڈیھانی نیام ءَ رواھیں سیمسر ءِ دروشم ءَ نہ من اَنت۔ راستی ءَ، گوستگیں ھپتگ ءَ گمانی دروشم ءَ تیرگواری ءِ بدلی ھما وھد ءَ بندات بیتگ وھدیکہ اوگاناں سیمسری ٹٹانی لھتے بھرانی گوجگ ءِ کوشست کُتگ۔
چمن، کہ یک دزگٹیں گوزوکیں راھے سیمسر ءِ دومی نیمگ ءَ چہ ڈِکَّر ءِ بنجاہ بیتگ، بلے دگہ دمگانی تہ ءَ ھم نوں اَڑ ءُ کُڑ بندات بیتگ اَنت۔
سیمسر ءَ دلجمی ءَ گوں ٹھینگ ءِ ھاتر ءَ پاکستانی واکداراں 2400 کلومیٹر دراجیں سیمسر ءِ بازیں ھندانی سر ءَ اڑاند اوشتارینتگ اَنت۔ تالباں چُشیں بازیں اڑاند گُوتکگ اَنت۔ تالبانی اوشتن اِنت کہ اڑاند ودی کنگ ءَ چہ سیمسرانی دویں نیمگ ءَ شنگیتگیں پشتون تَمندارانی رپت ءُ آمد سانمند بیت اِنت۔
پَریّسکارانی گُشگ اِنت کہ کابل ءِ واکدار پاکستانی تالباں باھوٹی دیگ ءَ اَنت، کہ آ ھد بندی ءِ ھلاس کنگ ءِ تہ ءَ ھوار اَنت۔ ٹی ٹی پی ءَ ھمے زیتاں پاکستان ءَ گوں وتی جنگ بندی ھلاس کُتگ ءُ قبائلی دمگانی تہ ءَ پاکستانی پوج ءِ سر ءَ چہ سیمسر ءِ “دومی نیمگ ءَ اُرش ترند کُتگ اَنت- اے ٹولی ءَ سرجمیں پاکستان ءَ اُرش کنگ ءِ جار جتگ۔
انیگیں میڑ کابل ءَ پاکستانی سفیر ءِ سر ءَ اُرش ءَ لھتے روچ ءَ پد بیتگ اَنت۔ اے وئیل ءَ ٹی ٹی پی ءِ چیدگ گندگ بیتگ، کہ آ اسلامک اسٹیٹ ءِ خراسان باب ءَ گوں نزیکیں ھمبندی داریت کہ آیاں اُرش ءِ ذمہ واری زرتگ اَت۔
پاکستانی دری کارانی دپتر ءِ نیمگ ءَ ٹاہ دیگ بیتگ کہ آیاں اوگان تالبانی نیمگ ءَ باوری دیگ بیتگ کہ آ ٹی ٹی پی ءُ جنگولیں ٹولیاں پاکستان ءِ بگیر ءَ اُرشانی ھاتر ءَ اوگان سرڈگار ءَ کارمرز کنگ ءِ پرمان نہ دے اَنت۔
پاکستان ءِ اوگان پالیسی ءِ نوکازی
6 دسمبر ءَ اسلام آباد ءَ بیتگیں یک سوڑگی دیوانے ءَ، پیسرگیں جرنل سپارت کاراں، اھوالکاراں ءُ دگہ دیمپانی بلداں پاکستان ءُ اوگانستان ءِ نیام ءَ برجاھیں جوش وروکیں جاورھالانی سر ءَ گپ تران کنگے جھد ٹی ٹی پی ءِ نیمگ ءَ ڈیھہ ءِ گوما جنگ بندی ءِ آسر کنگ ءَ پد گنتر نزور کُتگ۔
اے گپ ءِ سر ءَ یک مزنیں یکدلی ءِ ھست اَت کہ اوگان پالیسی ءِ چہ نوکسر ءَ نوکازکاری ءُ گھتری آرگ ءِ لوٹ اِنت۔ پاکستان ءَ گوستگیں چار دھکاں چہ اوگان جیڑھانی تہ ءَ ھاسیں کرد ءِ پیلو کُتگ، کہ اِشی بندات 1979 ءِ سوویت اُرش ءَ گوں بیتگ کہ آ وھد ءَ اسلام آباد ءَ امریکہ ءُ سعودی ءَ گوں ھوار بیتگ ءُ سوویت یونین ءِ ‘بری سلطنت’ ءِ دور دیگ ءِ تہ ءَ گون کپتگ۔
زانتکارانی گُشگ اِنت کہ اوگان جھاد ءِ نیام ءَ، اوگان تالبانی ھاتر ءَ پاکستان ءِ پلہ مرزی ‘اسٹریٹجک جھلانکی’ ءَ مٹ بوتگ، یک انچائیں پالیسی ءِ کہ اِشی ءِ سوب ءَ پاکستانی ڈیھ، پوج، ھاسیں پئیماں ، کابل ءِ تہ ءَ یک ھمبندیں سرکار ءِ برجاہ دارگ ءِ جھد کُتگ بیتگ اَت۔
تالبان، یک برے پد ءَ، تاکت ءَ انگت اَنت، ءُ انچو مارگ بیت اِنت کہ پاکستان ءِ ’اسٹریٹجک جھلانکی‘ ءِ پالیسی آخرکار سرجم بیتگ۔ تالبان نوں وتی بھت ءِ مستر وت بیتگ اَنت ءُ اسلام آباد وابدستگیں چماں گوں کابل ءِ نیمگ ءَ چارگ ءَ اَت اَنت۔
بلے انیگیں سیمسری مِڑاں چہ گندگ بیت اوگان تالبان پاکستان ءِ ھاتر ءَ یک مدامی سردردے جوڑ بیتگ اَنت۔ گوستگیں لھتے ماھانی تہ ءَ دویں ڈیھانی واکدارانی نیام ءَ دپ جنگی گندگ ءَ اَتکگ۔ میان استمان ءِ لس اسمبلی؛ کہ جھان ءِ درستاں سانمندیں تلو اِنت ھمود ءَ اوشتاتگ پاکستانی مزن وزیر شھباز شریف ءَ ناشرکاریانی ھاتر ءَ اوگان سرڈگار ءِ کارمرز بئیگ ءِ سر ءَ جھانی ھمبندی ءِ بدگمانی ءِ درشان کُتگ، یک انچائیں چمشانکیں کہ اِشی ءَ کابل سرکار ءِ نیمگ ءَ زھرناکیں پدگرد ءِ ودی کُتگ۔
بیت کنت کہ سیمسر ءِ آ نیمگ ءَ چہ ڈِکَّر کم بیتگ بہ بنت، ءُ نگیگیں جاورھال اے وھد ءِ ھاتر ءَ پرایمن بیتگ اَنت۔ بلے اے وھد ءَ اے گپ ءِ گمان نیست کہ اے جاور باز وھد ءَ جُنز اَنت۔ کجام نہ کجام پئیم ءَ اَڑ ءُ کُڑ پد ءَ پدر بیگی اِنت، ءُ اوگانستان ءَ ٹی ٹی پی برجاھیں ھستی اِشی ءَ باوری کنت۔