بلوچستان ءَ جتاجتائیں وئیلانی آسر ءَ چار مردم بیران ءُ نوزدہ ٹپی بیتگ اَنت

بلوچستان ءِ جتاجتائیں دمگاں گیس سلنڈر ترکگ، دگ وئیل ءُ لاش دزکپگ ءَ سے مردم بیران ءُ نوزدہ ٹپی بیتگ اَنت-

سربوتگین ھالانی رِد ءَ بیلہ ءَ منی اسٹاپ نزیک ءَ ھوٹل ءَ گیس سلنڈر ءِ تراک ءَ پد آس چست بیتگ چریشی ءِ آسر ءَ نزیکیں بازیں دکانی ءَ درزنی ھساب ءَ پرپٹ ھم مانپتّاتگ-

لسبیلہ پولیس ءِ رِد ءَ بازیں مردمے ٹپی بیتگ اَنت کہ آ نادُراھجاہ برتگ اَنت وھدے کہ دومی نیمگ ءَ میونسپل کمیٹی اوتھل ءُ بیلہ ءِ آس کشوکیں گاڑی آس کُشگ ءَ سر بیتگ اَنت-

ڈپٹی کمشنر لسبیلہ مراد خان کاسی ءَ ڈی ایچ کیو نادُراھجاہ اوتھل ءُ سول نادُراھجاہ بیلہ ءَ ایمرجنسی جتگ ڈاکٹر ءُ پیرا میڈیکل کارگُشاد لوٹائینتگ اَنت –

ڈپٹی کمشنر لسبیلہ مراد خان کاسی ءَ گْوشتگ کہ وئیل ءَ باز سُتکگیں مردم کراچی ءَ برگ ءِ گامگیج زورگ بیگ ءَ اِنت-

دومی نیمگ ءَ گوستگیں روچ ءَ بلوچستان ءِ دمگ سوراب ءَ کراچی ءُ شال ءِ شھدگ ءَ تُرند رؤکیں گاڑی وئیل آماچ بیتگ چریشی ءِ آسر ءَ فھیم خان گوں وتی لوگ بانُک ءَ بیران ءُ وھدے کہ آیانی دوئیں چُک سک ٹپی بیتگ اَنت-

اِھوالکارانی رِد ءَ بیران بیتگیں فھیم خان لوگ بانُک ھُزدار شھدربرجاہ ءِ پروفیسر بیتگ-

ھمے وڑ مستونگ ءَ شش روچ ءَ ساری بیگواہ بیتگیں صوفی رسول بخش مینگل ءِ چُک شکاری ماسٹر نور احمد مینگل ءِ لاش کوہ آماچ ءِ ھند ءَ کوہ زندان ءِ جُھلیں کنڈے ءَ کپتگ – لاش ءِ گیشیں چار ءُ ٹپاس ءَ پد کھول ءَ دیگ بیتگ-

وئیل سوب انگت زانگ نہ بیتگ ءُ گیشیں پٹ ءُ پول دمگی انتزامیہ ءَ کنگ ءَ اِنت-