کلات ءُ بھاگ دز بمب اُرشانی زمّہ واری بلوچ سلاہ بندیں گلاں ءَ منّ اِتگ انت

سربوتگیں ھالانی رِد ءَ گوستگیں روچ ءَ ناشناسیں مردماں بلوچستان ءِ دمگ کلات ءَ پاکستانی پوج ءِ پانگسے ءِ سر ءَ اُرش کتگ –

اُرش کلات ءِ دمگ منگوچر ءَ پوجی بنجل ءِ پھازگی پانگسے ءِ سر ءَ کنگ بوتگ کہ ناشناسیں مردماں پانگس ءِ سر ءَ دزبمب چگل داتگ ءُ در شتگ انت چریشی ءَ پوج ءَ جانی تاوان ءِ دیمپانی کنگ کپتگ –

دومی نیمگ بلوچستان ءِ دمگ بولان بھاگ ءَ کریم بخش پیوڑ نامی مردمی ءِ گس ءِ سر ءَ دزبمب اُرش ءِ کنگ بوتگ ، اُرش ءِ آسر ءَ گِس ءَ کمے تاوان رس اتگ بلے ھچ وڑیں جانی تاوان نہ بوتگ –

بولان بھاگ ءُ کلات ءَ بوتگیں ھردو دزبمب اُرشانی زمّہ واری بلوچ آجوئی لوٹوکیں سلاہ بندیں گل بلوچ لبریشن آرمی ءُ بلوچ ریپبلکن گارڈ ءَ منّ اِتگ انت –

بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ گوشتگ کہ بی ایل اے ءِ سرمچاراں گْوستگیں شپ ءَ کلات ءِ دمگ منگوچر ءَ زورگریں پاکستانی پوج ءِ بنجل ءِ پھازگی پانگس ءِ کارمندانی سر ءَ دز بمب اُرش ءِ کتگ چریشی ءَ دُژمنیں پوج ءِ دو کارمند زدگ بوتگ انت –

جارکش ءَ گوشتگ کہ بلوچ لبریشن آرمی اے اُرش زمّہ واری ءَ منیت، بلوچستان آجوئی ءَ تاں زورگیریں پوج ءِ سر ءَ اُرش برجاہ مان انت –

بلوچ سلاہ بندیں گل بی آر جی ءِ جارکش ءَ وتی درشان ءِ تہ ءَ گوشتگ کہ مئے سرمچاراں گوستگیں شپ ءَ بولان ءِ دمگ بھاگ غریب آباد میتگ ءَ زورگیریں پاکستان پوج ءُ چیریں ادارھانی کارمند ٹیکدار کریم بخش پیوڑ گِس ءِ سر ءَ دزبمب اُرشے کُتگ –

دوستین بلوچ ءَ گوشتگ اے اُرش بس یک بیھار ءِ بوتگ ما ٹیکدار کریم بخش ءَ ھوار بھاگ ءِ ایندگہ مردماں کہ پہ زر ءِ لالچ ءَ زورگیریں پوج ءُ چیریں ادرھانی ھاتر ءَ کار کنگ انت آھاں مکن کن ایں کہ آ بلوچ راجی زرمبشت ءِ بگیری ءَ وتی کاراں یلا بہ کن انت اگاں ناں وتی جانی ءُ مالی تاوان زمّہ وار وت بہ انت –