تربت ءَ پوج ءِ سر ءَ دزبمب اُرش، اُرش ءِ زمّہ واری بی ایل ایف ءَ منّ اِتگ

سربوتگیں ھالانی رِد ءَ گوستگیں روچاں بزاں ھبدہ دسمبر ءَ کیچ ءِ بنجاھی شھر تربت ءَ ناشناسیں مردماں پاکستانی پوج ءِ پانگسے ءِ سر ءَ دزبمب اُرش ءِ کُتگ –

اُرش تربت ءَ سنیما چار راھیں برجاھیں پوجی پانگس ءِ سر ءَ کنگ بوتگ ءُ اُرش ءِ آسر ءَ پوج ءَ جانی تاوان ءِ دیمپانی کنگ کپتگ – اُرش ءِ زمّہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءَ.منّ اِتگ –

بی ایل ایف ءِ جارکش میجر گوھرام بلوچ ءَ وتی شنگ کرتگیں درشان ءِ تہ ءَ گوشتگ کہ مئے سرمچاراں ھبدہ دسمبر ءَ شمبے ءِ روچ ءَ سینما چاراہ ءَ برجاھیں دُژمنیں پاکستانی پوج ءِ پانگسے ءِ سر ءَ دز بمب اُرش ءِ کُتگ- دزبمب پانگس ءِ تہ ءَ کپتگ چریشی ءَ دو پوجی کارمند مرتگ انت ءُ دو زدگ بوتگ انت-

جارکش ءَ دیمتر ءَ گوشتگ کہ اُرش ءَ پد پاکستانی پوج ءَ کورکاؤ تیرگواری کرتگ چریشی ءَ یک راھگوزے زدگ بوتگ، زورگریں پوج ءَ بازار ءِ کِر ءُ کشاں وتی زوراکی برجاہ داشتگ مردم زوراکی ءِ نشانگ کتگ انت –

بی ایل ایف ءِ جارکش میجر گھرام بلوچ گوشتگ کہ زورگریں پوج ءِ سر ءَ مئے اُرش بلوچستان ءِ آجوئی ءَ تاں برجاہ مان انت –