کیچ: دو ورنا زورانسری آوار جنی پد بیگواہ، مردمانی زھرشانی شھدگ بند

سربوتگیں ھالانی رِد ءَ گوستگیں شپ ءَ پاکستانی پوج ءَ چہ کیچ ءَ دگہ دو ورنائیں نودربر زورانسری آوار جتگ ءُ بیگواہ کتگ انت – آوار جنگ بوتگیں ورنایانی پجار یازدھمی تبک نودربر بدیر ء حبیب ءُ دھمی تبک ءِ نودربر طارق بشیر ءِ ناماں بوتگ انت –

ھردو ورنا پاکستانی پوج ءَ گوستگیں شپ ءَ کیچ ءِ دمگ عمری کہن ءَ آوار جتگ ءُ بیگواہ کتگ انت کہ ھنگت بیگواہ انت –

ورنایانی زورانسری آوار جنی ءِ بگیری ءَ دمگی مردم ءُ آھانی کھولاں زھرشانی کنان ءَ بنجاھی شھدگ بند کتگ – درنگاز کنوکاں لوٹ کتگ کہ ورنا یل کنگ بہ بنت اگاں آھانی سر ءَ کتکاری ءِ جُرمے ھست گڈا کانود ءِ رِد ءَ آمیدگس ءَ آرگ بہ بنت –

زانگ بہ بیت نودربریں ورنایانی زورانسری آوار جنی ءِ تہ ءَ گیشی آیگ ءَ انت، ھمے ھپتگ ءَ بلوچستان ءُ کراچی ءَ پاکستانی پوج ءَ چار ورنا آوار جتگ ءُ بیگواہ کتگ انت –

چہ ھزدار ءَ پوج ءَ سر بازار چاردہ سالی ورنایے آوار جتگ ءُ بیگواہ کتگ وھدیکہ چہ کراچی ءَ گوستگیں روچ ءَ چاردہ سالی عابد آوار جتگ ءُ بیگواہ کتگ کہ آواران ءِ جھمنند انت ءُ گٹگانی نادراھے بوتگ – اوار جنگ بوتگیں ھردو ورنا تنی وھدی بیگواہ انت کہ چہ کیچ ءَ دگہ دو ورنا آوار جنگ ءُ بیگواہ کنگ بوتگ انت –