بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی چار ھزار ءُ ھشت سد ءُ نود ءُ چار روچ سرجم بوتگ انت- ھمے وھد ءَ چہ نال گریشہ ءَ سیاسی ءُ چاگردی باسک شفیع محمد، درمحمد ءَ ھوار دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ-
گل ءِ کمک سرکماش ماما قدیر بلوچ ءِ گوشگ ات کہ زورانسری آوار جنیانی بگیری ءَ مئے دراجکشیں زھرشانی برجاہ انت بلے جھندم مئے مردمانی وش سلامتی یل دیگ ءَ دگہ بازیں سیاسی باسک نودربر آوار جنگ ءُ بیگواہ کنگ بوگ ءَ انت-
آئی ءَ گوشتگ کہ زورانسری آوار جنیانی بگیری ءِ جھد ءَ سرجمیں بلوچستان ءِ راجدوست بیگواھیں مردمانی کھولانی ھمراہ داری ءَ بہ کن انت-
ماما قدیر بلوچ ءَ دیمتر ءَ گوشتگ کہ بلوچستان ءِ بازیں ھند ءُ دمگاں پوج لشکر کشی کنگ ءَ انت ءُ مھلوکانی دوار جاھاں ماندارگ انت ءُ آھانی مال ءُ دلوتانی لٹ پُل ءَ کنگ ءَ انت-
آئی ءَ گوشتگ کہ بلوچستان ءَ انسانی ھکانی بگیری داروکانی دارگے ھاتر ءَ میان استمانی انسانی ھکانی ادارہ بے سوب انت ءُ ھچ گوشگ ءَ نہ انت-