سندھ ءِ مزن شھر کراچی ءَ پاکستانی پوج ءُ چیریں ادارھانی کارمنداں جتا جتائیں دمگاں سَے مردم زورانسری آوار جتگ ءُ بیگواہ کتگ انت کہ آھانی تہ ءَ یکے ءِ سیادی چہ بلوچستان ءِ آواران دمگ ءَ اِنت-
گیشیں ھالانی رِد ءَ سندھی بیگواھیں مردمانی آجوئی زرمبشت سروک ءُ انسانی ھکانی گل سندھ سبھا ءِ رھشون انعام سندھی ءُ آئی ءِ ھمراہ اصغر جمالی میہڑ (دادو) نزیک ءَ پاکستان چیریں ادارھانی کارمنداں آوار جتگ ءُ بیگواہ کتگ انت-
اھوالکار ءِ رِد ءَ سندھ سبھا ءِ رھشون انعام سندھی ءُ اصغر جمالی ءِ رھشونی ءَ میہڑ شھر ءَ دہ روچ بیت کہ کتابی میلہ بوتگ کہ آئی ءِ گوستگیں روچ ءَ گڈی روچ بوتگ وھدیکہ مروچیگیں سھب ءَ خیر پور ناتھن شاہ ءَ کتاب میلہ ءِ برجاہ دارگ ءَ کتابانی گاڑی ءِ ھمراھی ءَ رؤگ ءَبوتگ کہ آ چہ میہڑ ءَ دھ کلومیٹر دیر کولاچی شاخ ءَ چیریں ادارھانی گاڑیاں انگیر کتگ ءُ آئی چم پٹی بستگ انت وتی گاڑیاں کتگ ءُ برتگ انت-
انعام سندھی سال دوھزار ھژدہ ءَ پد اے دومی رند ایں آوار جنگ بوتگ وھدیکہ اصغر جمالی ھم سال دوھزار سینزدہ ءَ آوار جنگ بوتگ-
ھردو وائس فار مسنگ پرسنز آف سندھ ءَ پد سندھ ءِ دومی بیگواھیں مردمانی پانکجنیں فورم سندھ سبھا ءِ بنجاھی رھشون انت-
زانگ بہ بیت سندھ سبھا ءَ بیگواھیں سندھی مردمانی ھاترءَ چہ کراچی ءَ جی ایچ کیو روالپنڈی تاں لانگ مارچ بندات کتگ بوتگ کہ آئی ءَ پد سندھ سبھا ءِ پند درسیں مردم سندھ ءُ پنجاپ ءِ سیمسر ءَ دزگیر کتگ ءُ پدءَ کراچی ءَ آؤرتگ انت-
دومی نیمگ ءَ بلوچستان ءِ دمگ آواران ءِ جھمنند عابد ء خالد چہ کراچی ءَ آوار جنگ بیگواہ کنگ بوتگ-
کھول ءِ رِد ءَ عابد ء خالد گٹگانی نادراہ یے کہ آئی ءِ یک گٹگ ءِ سرجمی ءَ ھلاس انت ءُ دومی گٹگ گوستگیں ماہ ءَ آپریشن بوتگ کہ ڈاکٹر ءَ درمان داتگ ءُ گوشتگ کہ آرام بہ کنت ءُ گوستگیں روچ ءَ شانزدہ دسمبر ءَ آئی ءَ دومی گردہ ءِ آپریشن بوگی بوتگ کہ در کنگی بوتگ ھمیشی ءِ سوب ءَ گوستگیں روچ ءَ کھتیانہ میمن نادراہ داخل بوگی بوتگ بلے مالی جاورھالانی نگیگی ءِ سوب ءَ داخلہ کنگ نہ بیتگ-
کھول ءِ رِد ءَ دیمے سَے شمبے ءَ آئی ءِ آپریشن بوگی بوتگ تانکہ پیسانی چن ءُ لانچ بہ بیت بلے گوستگیں شپ ءَ آ پولیس ءُ سی ٹی ڈی ءَ چیریں کارمندانی ھمراھی ءَ وتی سیادی ءِ گِس ءَ ڈالمیا شانتی نگر ءَ شپ ءِ یک ءَ آوار جتگ ءُ بیگواہ کتگ-
بلوچ نیشنل مومنٹ ءِ ہیومن رائٹس ءِ ادارگ پانک ءَ خالد بلوچ ءِ زورانسری آوار جنی دلپدردی درشان اِتگ ءُ گوشتگ کہ پوج ءِ اے در انسانی امل ایر جن ایں-
پانک ءِ رِد ءَ پولیس ءَ گِس ءَ ساڑی ایں سیاد ءُ وارس زالبول ھم لٹ شاپ کتگ انت-