روکپتی بلوچستان: مولانا عبدالغفار نقشبندی ءِ پلامرزی ءُ بندیگیں مردمانی بیگواھی ءِ ھلاپ ءَ زھرشانی

گوستگیں روچ ءَ روکپتی بلوچستان ءِ جتا جتائیں جاھاں شھراں زھرشانی کنگ بیتگ، زھرشانی مولانا عبدلغفار نقشبندی، گرگ بیتگیں مردمانی یل کنگ ءُ پاھو ءِ ھلاپ ءَ بیتگ –

زھرشانی روکپتی بلوچستان ءِ بنجاھی شھر زاھدان ءَ ھوار، چھبار، راسک، ھاش ءُ دگہ دگہ جاھاں کنگ بیتگ اَنت-

زھرشانی ءَ زالبولاں ھوار مردیناں بازیں کچے ءَ بھر زرتگ ءُ اے زھرشانی زاھدان ءَ مکی مسیت ءَ بندات بیتگ ءُ شھر ءَ روانکے دروشم ءَ گندگ بیتگ اَنت –

زھرشانی ءَ ھواریں مردمانی دست ءَ بینر ءُ پلے کارڈ بیتگ اَنت کہ آیانی سر ءَ انساپ ءَ ھوار زھرشانی ءَ ھواریں مردماں اوگام جنان ءَ ’خامنہ ای مرگ بر یک مردمے ءِ کُشگ ءَ ھزار مردم پشت ءَ پاد کیت، بسیجی سپاھی داعش شما، خامنہ ای شرم کن، ڈیھ ءِ بندیگیں یلو کن ‘-

زانگ بہ بیت روکپتی بلوچستان ءَ ھمک آدینگ ءِ روچ ءَ زھرشانی چہ سی ستمبر ءَ یکشل ءَ برجاہ اَنت کہ اود ءَ سی ستمبر ءَ ایرانی لشکر ءِ تیرگواری ءَ کساس نود ءِ کچ ءَ مردم بیران ءُ سَے سد ءِ کچ ءَ مردم زدگ بیتگ ات اَنت-

چرے روچ ءَ پد روکپتی بلوچستان ءَ یک زھرشانی یے بندات بیتگ تنی وھدی یکشل ءَ برجاہ اِنت کہ اود ءَ مردم وتی انساپ ءُ کوشکارانی ھلاپ ءَ سرجمی ءَ پٹ ءُ پول کنگ ءِ لوٹ ءَ کنگ ءَ اَنت-