بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زورانسری بیگواھیانی بگیرءَ پریس کلب ءِ دیما زھرشانی بنجل ءَ مروچی 4893 روچ سرجم بیتگ اَنت۔
اے ردءَ نیشنل پارٹی ءِ پیسرگیں دمگی سروک حاجی نیاز لانگو ءُ آئی ھمراھاں بُنجل ءَ اتکگ ءُ کھولاں گوں یکجاھی درشان اِتگ۔
گل ءِ کمک کارمستر ماما قدیر بلوچ ءَ اتکگیں مردماں گوں گُشتگ کہ ریاست ءَ بلوچ نسل کشی ءِ تہءَ تُرندی ودی کُتگ، پوجی بیڑانی تہءَ ودی بیتگیں ترندیانی دروشم ءَ میتگانی میتگ ڈرینگ بیتگ اَنت۔
آئی ءَ گُشتگ اے پوجی بیڑانی تہءَ بلوچ آبادیانی سرءَ بمب گواری، لوگانی ماندارگ، زالبول، زھگ ءُ چکاں ھوار بے میاریں بلوچاں ترندیں لٹ شاپی نشانگ کنگ ءُ آیاں زورانسری بیگواھی ءِ آماچ کنگ ءُ پدا آیانی ژانگولیں جونانی کھولانی دستءَ دیگ ءَ ابید گیاباناں دوردیگ ءُ داشتگیں کارندھانی کمک ءَ بلوچ نودربر ورناھیں سیاسی باسک ءُ کواساں ھوار زندءِ جتاھیں تک ءَ سیادی داروکیں بلوچانی نشانگ کنگ ءُ کُشگ، ءُ بیگواھی ءُ بیگواھیاں پد دروگیں میڑانی تہءَ شھید کنگ ءُ دگہ بلوچ نسل کشیں گام ھوار اَنت۔
ماما قدیر ءَ گُشتگ کہ پاکستانی لشکریانی چُشیں انسانیت سوزیں کردگاراں جھان جنگی جرمکاری منگ ءُ اِشی زیت دارگ ءِ سرءَ زور دیگ ءَ اَنت بلے استانی لشکر ءُ ھاکم بلوچ پر ایمنیں جھد ءِ سوبمندی ءَ چہ ھمینچو تُرس آماچ اَنت کہ آیاں اے زوراکیانی دارگ ءِ ھاترءَ چِست بیوکیں توار ھم گوشاں نہ کپگ ءَ اَنت۔