بلوچستان ءِ جتاھیں دمگانی تہءَ پاکستانی لشکریانی دستءَ زورانسری بیگواھیانی وئیل یکشلی ءَ گوں دیما پیداک اَنت، پاکستانی لشکریاں دگہ چار مردم دزگیر کنگ ءَ پد ناشناسیں ھنداں بُرتگ اَنت۔
بیگواہ بیتگینانی پجار کریم بخش، نور بخش باہوٹ، سال محمد ءُ نذیر ءِ ناماں چہ بیتگ۔
بیگواہ بیتگیں مردم گوستگیں روچءَ پاکستانی لشکریاں چہ کولواہ ءَ دزگیر کنگ ءَ پد ناشناسیں جاھاں بُرتگ اَنت۔
دومی نیمگ ءَ ھال اِنت کہ گوستگیں روچءَ خضدار ءَ چہ بیگواہ بیتگیں ھشتمی جماعت ءِ نودربر ریحان بلوچ ء محمد جان جھمنند کٹھان یل بیتگ ءُ وتی لوگءَ سربیتگ۔
سائرہ بلوچ ءَ چاگردی رسانکدرءِ تندجاہ ءَ ریحان ءِ یل بیگ ءِ ھال راست کنان ءَ نبشتگ کہ ریحان یل کنگ بیتگ۔
آئی ءَ دیمترءَ نبشتگ کہ بلے مارا چہ اے اندوھاں پرچہ گوازینگ بئیگ ءَ اِنت؟ کدی ھم، کجا ھم ما اے ھیال ءَ گوں زند گوازینگ ءَ اِنت کہ مئے گومءَ شئے ءِ بیت کنت، وھدیکہ اِشی سوب زانگ نہ بیت۔
یات بہ بیت سائرہ وتی براتانی آجوئی ءِ ھاترءَ گوستگیں چار سالاں چہ زھرشانی کنگ ءَ اِنت، گوستگیں ماہءَ سائرہ ءِ دگہ دو سیاد زورانسری بیگواہ کنگ بیتگ اِت اَنت کہ سی ٹی ڈی ءِ ردءَ دیما آرگ بیتگ اِت اَنت ءُ زیک آئی وارث کسان سالیں ریحان بیگواہ کنگ بیتگ اَت۔