بلوچستان ءِ دو جتاجتائیں دمگاں سلاہ بندانی تیرگواری ءَ چہ دو مردم بیران بیتگ اَنت

بلوچستان ءِ دو جتاجتائیں دمگ پنجگور ءُ وندر ءَ ناشناسیں سلاہ بندیں مردمانی تیرگواری ءَ پنجاب جھمندے ءَ ھوار دو مردم بیران بیتگ اَنت-

سربوتگیں ھالانی رِد ءَ پنجگور ءَ کالج دگ سر ءَ برجاھیں نائی دکانے ءِ سر ءَ ناشناسیں سلاہ بندیں مردماں تیرگواری کتگ ءُ تیرگواری ءِ آسر ءَ یک مردمے بیران بیتگ-

تیرگواری ءِ آسر ءَ بیران بیتگیں مردم ءِ پجّار اسماعیل ء اللہ ڈتہ جھمنند چاہ پیلی والو لودھراں پنجاب نام ءَ چہ بیتگ-

دمگی مردمانی رِد ءَ ناشناسیں سلاہ بندیں مردماں ھما وھد ءَ تیرگواری کتگ وھدے کہ آ چہ وتی دکان نزیک ءَ گیٹ ءَ چہ آپ ھاتر ءَ شتگ ءُ آپ زرتگ ءُ آھگ ءَ بیتگ –

لاش ٹیچنگ نادُراھجاہ برتگ ءُ گیشیں پٹ ءُ پول پد بُنکی ھنکین ءَ راہ دیگ بیتگ ، وئیل سوب زانگ نہ بیتگ-

ھمے وڑ ھب سونمیانی وندر کشتکشاری ءِ ھند باندیکہ ءَ پرپٹ سواریں سلاہ بندیں مردماں تیرگواری کتگ ءُ جاوید ء محمد ایوب نامیں مردمے مرتگ-

دمگی مردمانی رِد ءَ سلاہ بنداں ھما وھد ءَ تیرگواری کتگ وھدے کہ جاوید شیخ کریش پلانٹ نزیک ءَ برجاھیں چہ وتی ھوٹل ءَ آھگ ءَ بیتگ کہ کلمتی بلوچ اسٹاپ نزیک ءَ تیرگواری اِش کتگ ءُ کُشتگ-

وندر پولیس ءَ ناشناسیں مردمانی بگیری ءَ ایف آئی آر نکش کتگ ءُ پٹ ءُ پول بندات کتگ ءُ وئیل سوب انگت زانگ نہ بیتگ-