نبشتانک: گدانے ءَ ودی بوتگیں چُک
نبشتہ کار: شیردل بلوچ
دی بلوچستان پوسٹ
دیریگیں واھگے بوتگ وتی ھما ھمبل ءِ بابت ءَ ند ءَ بہ زوراں ھیال ءُ لیکھاں درشان بہ کناں، اے ھیال دیر اِنت دل ءَ چَرّگ ءَ بوتگ، کدی انچیں نوبت اتکگ اَنت، آئی ءِ بابت ءَ جیڑ اِتگ ءُ لھتیں گالرد نبیس اِتگ، بَلے سرجم کنگ نہ بوتگ اَنت، امروز ءِ دست گٹی ءَ ھیال پُرشت ءُ پروش بوتگ اَنت، پد ءَ کور کرتگ اَنت ، بلے مرچی گوں دل ءِ سِتک ءَ وتی نبشتہ بندات کرتگ، آسر کنگ ءِ نیت کرتگ، پہ سرڈگار ءَ کولیگ بوتگیں بچے ءِ کارست ءِ نبیسگ، الم ءَ جیڑگ ءَ پرما اِیت، آئی ءِ بابت سرپد بوگ لوٹ ایت، پرچا کہ انچُش پہ دیم نبیسگ کسے ءِ بابت ءَ بہ بیت نبیسوک ءِ جند ءَ ھم دوست نہ بیت، چونیں کارے کنگ ءِ واست ءَ اولیگ چیز جزبگ ءُ دومیگ سرپدی المی اَنت، گڑا آسر کنگ بیت۔
وتی ھور تر ءُ تاب کنوکیں کسے ءِ بابت ءَ بہ گند ئے ھیال ءِ پدر کنگ آئی ءِ سر ءَ ھبر کنگ یا نبیسگ گرانیں کارے مہ بیت، بلے ! گال ءِ دَرچینگ کسے ءِ ساڑایگ دلگوش دیگ لوٹ ایت، لھتیں انچیں کارستانی ھدابُند اَنت جھان اِش پجاہ کار اِیت، ھمک کسے ءِ چَمّانی دیم ءِ آدینک اَنت، نام اِش ھرچ جاہ ءَ ھمک دیواناں گرگ بوگ ءَ اَنت، ھرچ دل پہ آیاں وازمَنْدگ ءُ راج ءِ زندگ بوگ ءِ اُمیت زندگ اِش کرتگ اَنت، وت مُدامی ءَ گیر کاینت، راج سر ءَ اِش پھربند ایت، آ یک ءُ دو نہ اَنت،بلکیں ھزارانی ھساب ءَ اَنت، بلوچ سرڈگار ءِ ءُ راجی شھیدانی لڑ اِنت پہ وتن کولیگ بوتگ اَنت، وتی مرچیگ پہ وتی راج ءِ وشیں باندات ءَ بکشاتگ اَنت، چہ ھمے ندر بوتگیں بچاں یکے شھید” دادو ھمل اِنت واجھیں” ھمل ھان ءِ لوگ ءَ ودی بوتگ جاہ آھو (جھاؤ) کوھڑو ءِ جاھمنندے، شپانک ءُ مالدارے ءِ لوگ ءَ رُستگ ورنا بوتگ، ڈگارانی کار ءُ دِھکان ئِے کرتگ وتی زندمان ءِ روچ ئِے گوازینتگ اَنت۔
گدانے ءَ ودی بوتگیں چُک چہ وتی کوم ءُ کومیت ءَ شموشکار نہ بیت، آئی ءَ ایردستی ءِ مارشت چہ گوانزگ ءَ دَرکسانی ءَ گون بیت، وتی پدمنتگی ءُ راج ءِ بزگی ءِ رازاں شَرّ سرپد بیت، ایردستیں راجے ءِ ھمک گام ءِ دیم ءَ اَڑندگ ،مشکل ءُ ازیت ایردستی ئیگ اَنت، زندگ بوگ ءِ واست ءَ دست ءُ پاد جَنگ ھمک بنی آدم ءَ لوٹ ایت، وشھالی دیمروی ءِ زامان ایوک ءَ راجی وتواجھی بوت کنت، وتواجھی ءِ واست ءَ راج ءِ پُسگاں بے شمار ھون ریچگ لوٹ ایت ۔
دادو ھمل گندگ ءَ سک باز بے تواریں جھدکارے اَت، بلے۔۔! کومی جزبگ ءُ کومی دوستی آئی ءِ توک ءَ باز ھست اَت، مُدام جُنز ءِ کاراں دست گلائیش اَت، گوں جھدکاراں ھمگام جُنزگ ءَ اَت، ھمینچُک مھر آئی ءَ گوں جھد ءَ وتی راج ءَ ھست اَت، تھاریں شپاں آئی ءَ روچ زانتگ، پہ پُرھندگیں دپّ ھمراھداری کرتگ، اگاں وانندگیں سنگتے وانگی (کتاب) یا روتاکے وانگ ءَ بوتگ گڑا وڑ ءُ پیم ءَ آئی ءِ کر ءَ اَتکگ ءُ نرم نرم ءَ ئِے گوشتگ ” مَدّ ءَ مَدّ ( سلو ) ءَ مہ وان ئِے من ءَ ھم سرپد کن، چے بوتگ ءُ بوگ ءَ اِنت ھمے ساھت ءَ کند اِتگ ئِے، بزانکہ وانوک وتی نیمگ ءَ پہ دلگوش دیگ ءَ لاچار کرتگ ئِے، انچیں مھروانیں ءُ سنگینے سنگتے اَت، گوں کسے ءَ چِنکس یکجاہ بوت مردم چہ آئی دلرنج نہ بوتگ اَت ۔
دادو ھمل ءِ بابت ءَ من چینچُک نبشتہ بہ کن آں کم اِنت، پہ راج ءَ سر بکشاتگیں بچے ءِ کارستانی پدر کنگ ءُ ساڑایگ پہ گپتار ءُ نبیسگ بوت نہ کنت، وتی زندگی ءِ ھزاراں واھشت ءِ یلہ دیگ ءُ کوم ءِ زندگ بوگ ءَ ندر بوگ، جھان ءِ گرانتریں کارے زانگ بیت، ھمک کسے ءَ گوں اے ھون ریچگ ءِ ٹوھیں گام چست بوت نہ بیت ھاٹیگ جواب دنت ۔
دادو ھمل پنام پیروز ، سیلم سوزو پنام چراگ، ھکیم ابراھیم پنام کندیل ءُ نسیم جان پنام ملا دیدگ سورگر ءِ بنجل ءَ گوں زورگِریں ڈیھ اِستان ءِ زمینی پوج ءُ بالگراباں بیست سوچکان دو ھزار ھبدہ (20/05/2017) ءَ یکروچے ءَ تیوگیں گوں کمانڈواں دیم پہ دیمی میڑ داتگ ءُ وتی ایدگہ ھمراہ اِش رکینتگ اَنت ءُ وت پہ وتن دائمی نمیران بوتگ اَنت، شھید دادو ھمل ءَ گوں ھمراھان ءُ سوچکان ءِ ءُ سرڈگار ءِ شھیداں سھرچکیں دروت ندر کناں ۔
آجوئی زندگ بات-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔