شال ءَ یک بلوچ نودربرے زورانسری آوار جنگ ءَ پد بیگواہ کنگ بیتگ

بلوچستان ءِ بُنجاھی شھر شال ءَ پاکستانی پوج ءُ چیریں ادارھاں یک بلوچ نودربرے آوار جتگ ءُ گوں وت برتگ-

سربوتگیں ھالانی رِد ءَ پرندوشی شال ءِ دمگ عیسیٰ نگری ءَ پاکستانی پوج ءُ چیریں ادارھاں بیڑبرتگ ءُ کمپیوٹر سائنس ءِ نودربرے آوار جتگ ءُ گوں وت برتگ-

آوار جنگ بیتگیں نودربرے پجّار نور خان جھمنند ھوشاپ کیچ نام ءَ چہ زانگ بیتگ-

ھمے وڑ ءَ چاگردی ترامجاہ ٹوئٹر ءَ بازیں ٹوئٹر کارمرد کنوکاں اے گپ راست کرتگ ءُ گوشتگ کہ شال ءِ دمگ عیسیٰ نگری ءَ پاکستانی پوج ءُ چیریں ادارھاں یک نودربرے آوار جتگ ءُ برتگ-

زانگ بہ بیت بلوچستان ءَ اَبید پاکستان ءِ آ دگہ شھراں ھم بلوچ نودربراں زورانسری آوار جنگ اَنت اے نہ کُٹّوکیں دْرچ یکشلہ برجاہ ءَ اِنت-

دومی نیمگ ءَ بیگواھیں مردمانی توار چست کنوکیں گل وائس فار بلوچ مسنگ پرسنز ءِ پہ بیگواھیں مردمانی یل کنگ ءِ ھاتر ءَ یک دْراجیں مدتے بیت شُدکُشیں بُنجل برجاہ ءَ اِنت-