کُلّیں شھید نمیران اَنت
نبشتہ کار : جلال اھمد
دی بلوچستان پوسٹ
انگریز ءِ جنگ ءَ بِگر داں مروچی بیا ءُ بِہچار بلوچستان ءِ سرزمین ءِ سر ءَ بس بلوچ ءِ ھُون رِیچگ بُوتگ اَنت ءُ اے ھُون ریچی ءِ کسّہ ءِ تَہ ءَ مئے جِند ءِ دست مان بُوتگ ءُ انگت مان اِنت بلے دومی نیمگ ءَ بِہ چارے گُڑا پہ آجوئی ءِ ھاترا ھم مردم درکپتگ اَنت ءُ کُربانی اِش داتگ ءُ دیگ ءَ اَنت-
انگریز ءِ وھدے زُوراکی ءِ دیم ءَ بابو نُوروز ھان ءَ کہ وتی سِینگ مِک کت ءُ جنگ داتگ داں انگریز انچوش بے وس کُرت کہ گُڈّی ءَ انگریز پہ تچگ ءَ مجبور بُوت۔
بلے انگریز ءِ جنگ ءَ چہ رند پد ءَ کہ بلوچ ءِ سرڈگار ءِ سر ءَ اُرش کنگ بُوت ءُ بلوچ ءِ پدریچ ءِ سر ءَ زُوراکی ءُ لشکرکشی بُوت گُڑا بلوچ ڈگار ءِ ھکّی ئیں وارساناں اے اِیردستی ءُ گُلامی وش نہ یتک پہ اِیردستی ءِ ھلاس کنگ ءَ ءُ وتی وتواجھی ءِ دزگِرگ ءِ ھاترا تور چِست کُرت اِش ءُ جنگ دات اِش، داں شھیدی ءِ مزنیں نام اِش وتی نام ءَ کُرت ات۔
اے جنگ ءِ نیام ءَ ھما پُسّگ ھوار بُوتگ اَنت کہ آ اے زمین ءِ رُودینگیں پرزِند اَنت کہ آیان ءَ گوں وتی ماتیں گلزمین ءِ مھر ءُ وپا بُوتگ ءُ آیاں رستر ءُ جُونوارانی بَدیں کِرداں چہ بَد اَتکگ ءُ آیاں وتی لچ ءُ ننگ ءِ پھازگ ءِ درگت ءَ وتی تاسپُیں جانان ءَ ندر کُرتگ ءُ اَبدمان بُوتگ اَنت۔
ھمے وڑ ءَ بلوچ سرڈگار ءِ آجوئی ءِ ھاتر ءَ (شھید بانک کریمہ بلوچ) ءَ ھم جْوانیں کِردے پیلو کُرتگ ءُ پہ اِیردستیں راج ءِ آجوئی ءِ ھاتر ءَ لُمّہ جان ءَ ھم وتی توار داں گُڈّی ساہ ءَ چِست کُرتگ ات، مروچی بلوچ راج وتی ھما کُلّیں شھیداں یات کنت ءُ آیانی رند پداں گِیپت کہ آیاں بلوچ ءِ گُلامی کبول نہ کُرتگ ءُ پہ آجوئی ءِ راہ ءَ وتی ساہ ءُ سر اِش بکّشاتگ اَنت ءُ پہ دائمی نمیران بُوتگ اَنت۔
کُلّیں شھیدانی سر ءَ ما پھربنداں ءُ جزم اے گپ ءَ گْوشاں کہ الّم شُمئے داتگیں دیمونی رنگ کار اَنت۔
کُلّیں شھیداں سُھریں دْرؤت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔