فیفا ورلڈ کپ: فرانس ءُ انگلینڈ ءَ گوازی کٹ اِتگ ءُ وت ءَ کوارٹر فائنل ءَ سرکتگ

دوحہ گتر ءَ برجاھیں فیفا ورلڈ کپ ءِ دوشی شپ ءَ فرانس ءُ پولینڈ ءُ انگلینڈ ءُ سینگال ءِ میان ءَ گوازی کنگ بوتگ کہ سینگال ءُ پولینڈ ءَ وتی گوازی نہ کٹ اِتگ ءُ کوارٹر فائینل ءَ سربوگ ءَ بے سوب بوتگ انت –

دوشی شپ التمیمہ فٹبال پٹ ءَ بوتگیں اولی گوازی فرانس ءُ پولینڈ ءِ میان ءَ بوتگ کہ فرانس ءَ پولینڈ ءِ دیم ءَ سَے پہ یک گولے ءَ گوازی کٹ اِتگ ءُ وتی کوارٹر فائینل ءَ سر کُتگ –

فرانس ءُ پولینڈ ءِ میان ءَ بوتگیں گوازی ءَ اولی ھاپ ءَ فرانس ءِ نیمگ ءَ یک گولے دیگ بوتگ کہ لیبی اولوئیر داتگ وھدیکہ دومی ھاپ ءِ ھپتاد ءُ چارمی ملٹ ءَ لیبی کیلئین ءَ فرانس ءِ نیمگ ءَ دومی گول داتگ ءُ گوازی ءِ گیشیں ملٹانی تہ ءَ فرانس ءِ نیمگ ءَ سیمی گول ھم کیلئین داتگ ءُ گوازی وتی ٹیم ءِ نام ءَ کُتگ – پولینڈ ءِ نیمگ ءَ گول گوازی ءِ گیشیں ملٹانی لیونڈوسکی ءَ پیلانٹی شوٹ ءَ داتگ

البیت فٹبال پٹ ءَ دوشی شپ بوتگیں دومی گوازی انگلینڈ ءُ سینگال ءِ میان ءَ بوتگ کہ انگلینڈ ءَ سینگال ءِ دیم ءَ سَے گولاں گوازی کٹ اِتگ ءُ وت ءَ کوارٹر فائنل ءَ سر کُتگ –

انگلینڈ ءُ سینگال ءِ میان ءَ بوتگیں گوازی ءَ سینگال ءِ نیمگ ءَ ھچ گول دیگ نہ بوتگ وھدیکہ گوازی ءِ اولی ھاپ ءَ انگلینڈ ءِ نیمگ ءَ لیبی جورڈن ءَ سِی ءُ ھشتمی ملٹ اولی گول داتگ ءُ گوازی ءِ گیشی ملٹانی تہ ءَ لیبی ہیری ءَ دومی گول داتگ ءُ گوازی ءِ دومی ھاپ ءَ انگلینڈ ءِ لیبی بوکاؤ ساکا ءَ پنجاہ ءُ ھپتمی ملٹ سیمی گول داتگ ءُ گوازی وتی ٹیم ءِ نام ءَ کُتگ –

کوارٹر فائینل ءَ انگلینڈ ءُ فرانس البیت فٹبال پٹ دھ دسمبر ءَ دیم پہ دیم بنت ءُ سیمی فائنل ءِ ھاتر ءَ کوالفائی کن انت –