بلوچ راج ءِ نادْراھیں پدریچ
نبشتہ کار: بانڑی بلوچ
دی بلوچستان پوسٹ
وھدے کہ زُورگِریں مُلکے یک نزوریں راجے ءِ سر ءَ اُرش کنان ءَ آئی ءِ سرڈگار ءَ دزگیر کنت گُڑا چہ دُرستاں پیسر زورگِر ھمے راج ءِ دُز ءُ ڈُنگاں پول ایت ءُ وتی کیمپ ءَ کار ایت پرچا کہ اے وڑیں بے زمیریں مردم مُدام چہ ڈیھ دوستی ءُ راجدوستی ءِ مارشتاں بےسما بنت، تھنا زر ءِ لالچ ءَ وتی زمیر ءِ سودا جنان ءَ وتی راج ءِ ھلاپ ءَ دُژمن ءِ ھمکار بنت۔ البت دومی نیمگ ءَ ایردستیں راج ءِ بامردیں رھشُون گوں وتی ڈیھ دوستیں سرمچاراں پہ راجی آجوئی ءُ مُلک ءِ وتواجھی ءَ راجی گھگیری ءِ جُنز ءَ بندات کن انت۔ گُڑا پہ راجدوستی ءِ ھلاپ ءَ زورگِر دو کار ءِ سر ءَ باز جُھد کنت۔ یکے پہ راجی جُنز ءِ بے سوب ءُ ھلاس کنگ ءَ راج ءِ تہ ءَ دلّار ءُ راجدْروھاں ودی کنت، دومی آئی ءِ زُبان ءَ چہ راج ءَ پُل ایت ءُ راجی دوداں کم کم ءَ انچیں دابے ءَ تباہ کنت کہ زورگِریں راج ءَ سما ھم نہ بیت۔
اے تیوگیں کار انچو بے سمائی ءَ جُنزان بنت کہ لس مھلوک ایشاں مار اِت نہ کنت۔ انچوشکہ آپریشن تھیٹر ءَ سرجن نادْراہ ءَ پیسر نشہ ءُ بے ھوشی دنت ءُ پد آپریشن ئِے کنت کہ نادْراھیں مردم ھچ درد ءُ تورشت مہ مار ایت۔ گُڑا زورگِریں دُژمن ھم سد در سد ھمے وڑ ءَ ایردستیں راج ءِ پدریچ ءَ ماں وانگجاھاں وتی دْروگیں راجدپتر، زورگیر ءِ دْروگیں وزبت ءُ ستا، زورگیر ءِ وتگڑیں ھستی ءُ کوڑائیں نمیرانانی بابت ءَ دْروگیں دَرونتاں ماں زورگیر ءِ زُبان وانین ایت۔ وتی پْروش وارتگیں جنگانی دْروگیں کِسھاں ورناھیں نودربراں رَد دنت۔
ایردستیں راج ءِ جِند ءِ راجی ھستی ءُ نمیرانانی بابت ھچ دَرونت ءُ دانکے وانینگ نہ بیت اگاں چیزے بیت گُڑا آ ھم دْروگ ءُ وتگڑ بنت کہ راج ئِے گیشتر بَکڑ ءِ آماچ بہ بیت۔ چہ ایشی ءَ آ راج ءِ پدریچ چہ وتی راجدپتر ءَ بے سما ءُ بے سُدّ بِیان بیت، پد کم کم ءَ راج ءِ مھلوک مجگی گُلام بیت ءُ راج وتی جِند ءِ زُبان ، راجی دود ءُ پجّاراں(بزانکہ راجی زُبان ءُ پوشاک ءِ وڑیں دوُداں) بے ھال ءُ شموشان کنت۔
اگاں ما ھورت چاری بکن ایں گُڑا ما مار ایں ما بلوچ راج ھم آپریشن تھیٹر ءِ تہ ءَ آزار ایں۔ مرچاں بلوچ راج وتی راجی زُبان ءَ بے کساس ڈالچار کنان ءَ ھِندی، پارسی ءُ سندھی ءِ وڑیں دری زُباناں وانگ ءَ انت کہ آیانی وانگ ءَ ھچ پائدگ ھم نیست۔ اگاں ما چیزے زانگ ءِ جُھد بہ کن ایں گُڑا ما سرپد بَہ ایں کہ مرچاں توری کراچی، لاھور ءُ اسلام آباد بہ بیت یا توری ایران تھران، اسپان ءُ شیراز بہ بنت مئے دُژمن ءِ زھگ وت انگریزی وان اَنت بلے مارا پارسی، سندھی ءُ ھِندی ءِ وڑیں بے مُرادیں زُباناں وانین اَنت۔ اگاں گِند ئے مرچیگیں دیمروی کُتگیں ڈیجیٹل زمانگ ءَ ھمے زُباناں ھچ بستار نیست۔ میڈیکل ءُ انجینئرنگ ءِ کتاب دْراہ انگریزی ءَ اَنت۔ انگریزی یک میان اُستمانی زُبانے پمیشکا تھنا ھما راج دیمروی کن اَنت وھدیکہ آ انگریزی ءَ گیشترّ بوان اَنت پمیشکا ما ھم گوں بلوچ راج ءَ دزبندی کن ایں کہ انگریزی ءِ سر ءَ زور بہ دے اِت ءُ مُدام انگریزی بوان اِت۔ دومی پہ راجدوستی ءِ ھاتر ءِ وتی دزھُورکی ءِ وھد ءَ وتی راجی زُبان براھوئی ءُ بلوچی بوان اِت پرچا کہ زِندگیں راج چہ وتی زُبان ءَ گِستا نہ بنت۔ راجی زُبان ءِ وانگ ءُ نبشتہ کنگ راجاں یکجاہ کنت، زُبان ءِ لبزانکی دیمروی راج ءِ تہ ءِ زُبان دوستی ءُ راجدوستی ودی کنت۔ وھدیکہ یک ایردستیں راجے ءِ ورناھیں وانندہ زُبان دوست ءُ راجدوست بوتگ گُڑا آ راج گُلامی نہ منّ ایت بلکیں وتی راجی آجوئی ءِ ھاتر ءَ گھگیری کنت۔
گُڑا باید اِنت بلوچ راج ءِ نودربر مرچیگیں دامگ(انٹرنٹ) ءِ آسراتی ءَ کارمرز کنان ءَ اول بلوچی دَرونتاں وانان ءَ وتی زُبان ءِ وانگ ءَ بکن اَنت ءُ پد ءَ نبشتہ دربر اَنت۔ وھدے کہ ما بلوچی نبشتہ دربُرتگ گُڑا ھرکس وتی کھول، سْیاد ءُ میتگ ءِ بلوچاں بلوچی بوانین ایت۔ باید اِنت مُدام بلوچی ءَ گوں بلوچی زگریں لبزاں نبیسّ اَنت ءُ بلوچی ءِ زگریں گالاں ھبر بہ کن اَنت۔ ما باید اِنت مُدام ھمے جُھد بکن ایں کہ بلوچی نبیسّگ ءِ وھد ءَ ھاس ھِندی ءِ لبزاں ھچبر کارمرز مہ کن ایں کہ ھمے زورگِریں زُبان ءَ مئے شھدیں زُبان ءَ تاوان داتگ۔ اگاں گالواری ءُ نبشتاری ءَ انگریزی ءِ لبزے کارمرز بیت ھچ جیڑھے نیست کہ انگریزی یک جھانی زُبانے، آئی ءِ وتی یک ارزِشتے ھست بلے بے مُرادیں سندھی ءُ ھِندی ءَ گوں ما ھچ وڑیں سْیادی ءُ نزیکی نیست۔
بلوچ شالا یکمُشت، زُبان دوست ءُ راجدوست بہ بات اَنت ءُ بلوچی شالا دیمروی بکنات۔ شالا انچوش بات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔