روکپتی بلوچستان ءَ جتا جتائیں جاھاں سَے کس آوار جنگ ءَ پد بیگواہ

تفتان ءُ زاھدان ءَ ایرانی لشکر ءَ سَے کس آوار جنگ ءَ پد بیگواہ کنگ بیتگ اَنت-

سر بیتگیں ھالانی رد ءَ روکپتی بلوچستان ءِ دمگ تفتان ءَ ایرانی لشکر ءَ یک لوگے ءِ سر ءَ بیڑ برتگ ءُ اود ءَ دو کس آوار جنگ ءَ پد بیگواہ کنگ بیتگ اَنت-

آوار جنگ بیتگیں مردمانی پجار ادریس عالیزئی ءُ فرامرز عالیزئی ءِ ناماں زانگ بیتگ اَنت-

ھالانی رد ءَ گوشگ بیتگ کہ اود ءَ بازیں آوار جنگ بیتگ اَنت بلے تنی وھدی آیانی پجار زانگ نہ بیتگ اَنت-

ھمے وڑ ءَ زاھدان ءَ ھم یک مردمے آوار جنگ ءَ پد بیگواہ کنگ بیتگ اَنت-

آوار جنگ بیتگیں مردم ءِ پجار اسماعیل نورزئی ء ابراھیم نام ءَ زانگ بیتگ اَنت –

ھالانی تہ ءَ گوشگ بیتگ اسماعیل دو روچ پیش آوار جنگ بیتگ ءُ چریشی ءَ پد آئی ءِ درگت ءَ ھچ ھال نہ بیتگ –

زانگ بہ بیت روکپتی بلوچستان ءَ مردمانی آوار جنیانی درچ یکشل ءَ برجاہ اَنت- اے بیگواھیانی نوکیں درچ گوستگیں سِی ستمبر ءَ زھرشانی ءَ پد اود ءَ مردمانی آوار جنیانی تہ ءَ گیشی گندگ ءَ آیگ ءَ اَنت-