مند ءُ آواران ءَ پاکستانی پوج ءُ ایپ ڈبلیو او ءِ سر ءَ بوتگیں اُرشانی زمّہ واری بی ایل ایف ءَ منّ اِتگ انت

سربوتگیں ھالانی رِد ءَ ناشناسیں سلاہ بندیں مردماں بلوچستان ءِ دمگ مند ءَ دو جاھاں پاکستانی پوج ءِ سر ءَ اُرش کُتگ –

اولی اُرش زیکیں بیگاہ ءَ مند دمگ شیراز ءَ چکاپ کوہ ءَ برجاھیں پوجی بنجل ءِ پھازگی سنگرانی سر ءَ کنگ بوتگ کہ چریشی ءَ پوج ءَ جانی تاوان رستگ ءُ دومی اُرش مروچی بیست ءُ شش نومبر ءَ مند ءِ دمگ شیپچار ءَ سیمسراں ٹٹ جنوکیں پوجی کارمندانی سر ءَ کنگ بوتگ – اُرش ءَ پاکستانی پوج ءَ جانی ءُ مالی تاوان ءِ دیمپانی کنگ کپتگ –

دومی نیمگ ءَ گوستگیں روچاں بلوچستان ءِ دمگ آواران ءَ سی پیک دگ ءِ جوڈ کنوکیں کمپنی ایپ ڈبلیو او ءِ ڈیمپر ءِ سر ءَ ھم اُرش کنگ بوتگ – ڈیمپر ءِ سر ءَ اُرش بیست ءُ سَے نومبر ءَ آواران ءِ دمگ میشود بزداد ءَ گوں تراک ناکیں شورواں کنگ بوتگ – چریشی ءَ ڈیمپر ءَ تاوان رستگ ءُ آئی ءِ آپریٹر ءُ اسسٹنٹ زدگ بوتگ انت –

مند ءُ آواران ءَ بوتگیں ھرسئیں اُرشانی زمہ واری بلوچ آجوئی لوٹوکیں سلاہ بندیں گل بی ایل ایف ءَ منّ اِتگ انت –

بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ سرمچاراں بیست ءُ پنچ نومبر ءِ بیگاہ ءِ شش ءَ کیچ ءِ دمگ مند شیراز ءِ کوھی دمگ چکاپ ءَ برجاھیں پاکستانی پوج ءِ شست ءُ یکمی ونگ ءِ بنجل ءِ پھازگی سنگر ءِ سر ءَ گوں راکٹاں اُرش کُتگ ءُ دژمن ءَ جانی ءُ مالی تاوان داتگ –

جارکش ءَ دیمتر ءَ گوشتگ کہ مروچی بیست ءُ شش نومبر ءَ سرمچاراں مند ءِ دمگ شیپچار ءَ سیمسراں ٹٹ جنوکیں پوجی کارمندانی سر ءَ ھم اُرش کتگ – آئی ءَ گوشتگ کہ سرمچاراں کارکنوکیں بلڈوزر ءِ سر ءَ اُرش کتگ ءُ آئی ءِ انجن تاوان داتگ ءُ آئی ءِ ڈرائیور زدگ بوتگ، ھمے دمان ءَ نزیکیں پانگسے ءِ سر ءَ ھم سرمچاراں گوں مزنیں سلاھاں گوں اُرش کتگ –

جارکش میجر گوھرام بلوچ ءَ وتی شنگ کرتگیں دگہ درشان ءِ تہ ءَ گوشتگ کہ مئے سرمچاراں آواران ءِ دمگ میشود بزداد ءَ بیست ءُ سَے نومبر ءَ چار شمبے ءِ روچ ءَ سی پیک دگ ایم-8 ءَ کار کنوکیں بند ساچی کمپنی ایپ ڈبلیو او ءِ ڈمپر گاڑی گوں چیر کرتگیں شورھاں نشانگ کرتگ – اُرش ءِ آسر ءَ گاڑی ءَ کمے تاوان بیتگ ءُ آئی ءِ ڈرائیور ءُ کلینڈر زدگ بیتگ اَنت-

جارکش ءَ گوشتگ کہ ما پیش ءَ ھم دمگی ٹیکدار، گاڑی واھند ءُ ڈرائیور مکن کرتگ اَنت کہ آ دُژمن ءُ زورگیریں پوج ءِ ھچ وڑیں وتگڑیں شوربندیانی بھر مہ بنت کہ چہ آئی ءَ بلوچ راج ءُ بلوچستان ءِ برجاھیں آجوئی زْرمبشت ءَ تاوان بہ رس ایت- اگاں نہ گڈا وتی جانی ءُ مالی تاوان ءِ زمہ وار وت اَنت-

گڈسر ءَبی ایل ایف ءِ جارکش میجر گھرام بلوچ ءَ وتی درشان ءِ تہ ءَ گوشتگ کہ پاکستانی پوج ءُ آئی کمکارانی سر ءَ مئے اُرش داں زورگپتیں بلوچستان ءِ آجوئی ءَ برجاہ مان انت –