پنجگور ءَ پاکستانی پوج ءِ سر ءَ اُرش ، اُرش ءِ زمّہ واری بی ایل اے ءَ منّ اِتگ

سربوتگیں ھالانی رِد ءَ گوستگیں شپ ءَ ناشناسیں سلاہ بندیں مردماں بلوچستان ءِ دمگ پنجگور ءَ پاکستانی پوج ءِ سر ءَ اُرش کُتگ –

اُرش پنجگور ءِ دمگ عبدروک ءَ پاکستانی پوج ءِ پانکس ءِ سر ءَ کنگ بوتگ ءُ اُرش ءَ پاکستانی پوج ءَ جانی ءُ مالی تاوان ءِ دیمپانی بوتگ –

دومی نیمگ ءَ بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ گوشتگ کہ اے اُرش ءَ دژمن پوج ءِ دو کارمند زدگ کتگ انت –

بلوچ لبریشن آرمی ءِ جارکش جیئند بلوچ ءَ درشان ءِ تہ ءَ گوشتگ کہ بی ایل اے ءِ سرمچاراں دوشی شپ پنجگور عبدروک ءَ پاکستانی پوج ءِ پانگسے ءِ سر ءَ اُرش کُتگ –

جارکش ءَ گوشتگ کہ سرمچاراں دژمن کارمندانی سر ءَ گرنیڈ لانچر ءِ بازیں گولہ ءِ آس داتگ ءُ چریشی ءَ کم چہ کم دو کارمند زدگ بوتگ انت وھدیکہ دژمن پوج ءِ پانگس ءَ سک باز تاوان رستگ –

جارکش ءَ گوشتگ کہ بلوچ لبریشن آرمی اے اُرش ءِ زمّہ واری ءَ منّیت ءُ کول کنت کہ بلوچ سرڈگار آجوئی ءَ تاں زورگیریں پوج ءِ سر ءَ اُرش برجاہ مان انت –