بی ایس او بلوچ راجی زرمبشت ءِ تہ ءَ سرھیلیں ادارھے زانگ بیت – بی ایس او آزاد

بلوچ نودربر گل آزاد ءِ بنجاھی جارکش ءَ بی ایس او ءِ پنجاہ ءُ پنچمی سالروچ ءِ درگت ءَ رسانکدراں وتی شنگ کرتگیں درشان ءِ تہ ءَ گوشتگ کہ بی ایس او بازیں جاوراں گوستگ ءُ مروچی پنجاہ ءُ پنچ سالاں پد ھم بلوچ راجی زرمبشت ءِ تہ ءَ بنکی کرد ءَ پیلو کنگ ءَ انت ءُ تاں بلوچستان ءِ آجوئی ءَ ھمے وڈ وتی جھد ءَ برجاہ داریت ءُ بلوچ راجی زرمبشت ءِ ردوم ءَ کنت –

آئی ءَ گوشتگ کہ سامراج ءُ زورگیرین تاکتاں مدامی بی ایس او ءِ دیم ءَ اڈاند پیداک کنگے جھد کتگ ءُ بی ایس او ءِ سر ءَ بندش جنگ ءَ ھوار بی ایس او ءِ تہ ءَ اڈاند پیداک کنگے ھنر ھیلاں ھم کتگ بلے بی ایس او ءِ باسک ءُ رھشوناں راجکاری ءُ نزریاتی پھتوی ءَ اے درسیں پندالانی دیم داشتگ ءُ چو دیوال سامراجیانی دیم ءَ مک بوتگ انت ءُ ھچ وڈا سوبمندی ءَ نہ اشتگ انت ءُ یکشل ءَ پہ بلوچ راجی زرمبشت ءَ دیمھونی داتگ – بی ایس او ءِ جوڈ بوگ ءِ ھمراھی ءَ گل ءِ بھر بانگ کنگ ءِ جھد کنگ بوتگ ءُ چہ راجی آجوئی ءَ دزکش بوگ ءَ بازیں پندلے کنگ بوتگ بلے بی ایس او ءَ بازین جنجالانی دیمپانی کتگ ءُ آجوئی زانت مدامی برز داشتگ –

آئی ءَ گوشتگ کہ بی ایس او ءَ چہ راجی جھد ءَ دزکش کنگ ءُ راجی زرمبشت ءِ تہ ءَ وتی بنکی کرد پیلو کنگ ءِ سوب ءَ مدامی ریاست زوراکیانی آماچ کنگ بوتگ – زانشجاھانی تہ ءَ روگ ءِ ھاتر ءَ گل ءِ راہ ءُ در بند کنگ بوتگ انت ءُ گل ءِ درسیں کارانی سر ءَ بندش جنگ بوتگ – گل ءِ رھشون زورانسری آوار جنگ ءُ بیگواہ کنگ بوتگ انت ءُ آھانی سر ءَ زوراکی کنگ بوتگ ءُ آھانی ژانگولیں جون چگل دیگ بوتگ انت ءُ مروچی ھم بازیں رھشون ءُ باسک ءِ ریاست ءِ زنداناں بندیگ انت – زورگیر ءَ زلم ءُ زوراکیانی سگگ ءَ ابید ھم مروچی بلوچ نودربر بی ایس او ءِ ساھگ ءَ یک جاہ انت زانت ءُ زانشت ءَ گون بلوچ راجی زرمبشت ءِ تہ ءَ وتی بنکی کرد ءَ پیلو کنگ ءَ انت –

بلوچ نودربر گل آزاد ءِ بنجاھی جارکش ءَ وتی درشان ءِ گڈسر ءَ گوشتگ کہ بی ایس او پہ بلوچ نودربراہ زانشجاہ ءِ ارزشت ءَ داریت ھمے ھاتر ءَ بلوچ نودربر بیا انت ءُ بلوچ راجی زانشجاہ ءِ بھر جوڈ بہ بنت ءُ سیاسی ءُ زانشتی زانت ءَ گوں راجی زرمبشت ءِ بھر جوڈ بہ بنت –