زاھدان: زھرشانی، لشکر ءِ تیرگواری ءُ زھرشانی کنوک زدگ ءُ بیرانی ءِ ھال

سر بیتگیں ھالانی رد ءَ روکپتی بلوچستان ءِ دمگ زاھدان ءَ ھمک آدینگانی وڑ ءَ اے آدینگ ءَ ھم زھرشانی روانک کشگ بیتگ اَنت –

اے زھرشانی روانک ءَ گوستگیں زھرشانی روانکاں جتا گندگ ءَ اتکگ کہ اے آدینگ ءِ روانک ءَ زالبول ھم گندگ ءَ اتکگ اَنت-

زھرشانی روکپتی بلوچستان ءِ جتا جتائیں شھر، دزاپ، سراوان، چھبار، پھرہ ءُ ھاش ءَ کنگ بیتگ اَنت کہ اود ءَ بازیں کچے ءَ مردماں بھر زرتگ ءُ اوگام جنان ءَ جتاجتائیں دمکاں تران بیتگ اَنت-

زھرشانی روانکاں خامنہ ای سرکار ءِ ھلاپ ءَ اوگام ءُ کردستان ءِ ھمگرنچی ءَ زھرشانی کنوکان اوگام جتگ –

ھالانی تہ ءَ گوشگ بیتگ کہ زھرشانی ءِ روانکانی دارگ ءِ ھاتر ءَ ایرانی لشکر ءَ تیرگواری کرتگ ءُ مردمانی زدگ ءُ بیران بیگ ءِ ھال ھست اَنت-

زانگ بہ بیت سی ستمبر ءَ بیتگیں زھرشانی روانک ءِ سر ءَ تیرگواری ءَ چہ بازیں مردمے کشگ ءُ زدگ کنگ بیتگ ات اَنت چریشی ءَ پد ھمک آدینک روانک کشگ ءُ اوگام جنگ بیت اِنت –