ایمنسٹی انٹر نیشنل ایران ءَ روکپتی بلوچستان ءَ ھپت سالی ئیں جنکو ھستی ناروئی ءِ کوش ایر جتگ ءُ گوشتگ کہ ایران ءَ بلوچ پھناتاں سیادی داروکیں ھپت سالی ئیں ھستی زاھدان ءَ تیرباران کرتگ ءُ کُشتگ-
ایمنسٹی ءِ رد ءَ کم چہ کم آ چل ءُ سَے زھگاں چہ یکے ھمے سال ءَ سال ءِ ستمبر ءَ ایرانی لشکر ءِ دست ءَ کُشگ بیتگ اَنت-
روکپتی بلوچستان ءَ اے ھونی ریچی درچ بلوچستان ءِ تیابدپی شھر چھبار ءَ ایرانی پورس ءِ مزنیں آپیسر ابراھیم کوچکزئی ءَ یک بلوچ جنکے پٹ ءُ پول ءِ ھاتر ءَ لوٹ اتگ ات ءُ پد ءَ آئی ءِ گون ءَ جنسی زوراکی کتگ ات –
ایمنسٹی انٹرنیشنل ءَ روکپتی بلوچستان ءِ ھند زاھدان ءَ سی ستمبر ءَ بیوکیں وئیلانی بارو ءَ یک رپورٹے ءَ گشتگ کہ اے وئیلان ھشتاد ءُ دو مردم کشگ بیتگ اَنت-
ایمنسٹی انٹرنیشنل ءِ رد ءَ ایرانی بلوچستان ءَ سی ستمبر ءَ آدینگ ءِ روچ ءِ نماز ءَ وھد ءَ اھل سنت ءِ مسیت ءَ ایرانی لشکر ءَ تیرگواری کرتگ ءُ چریشی ءُ شست ءُ شش مردم بیران سدانی کچ ءَ زدگ بیتگ اَنت پد ءَ زھرشانی کنوک ءُ لشکریانی میان ءَ جنگ ءُ چوپ بیتگ ءُ چریشی ءَ دگہ شانزدہ مردم کشگ بیتگ اَنت-
زانگ بہ بیت روکپتی بلوچستان ءِ دمگ سراوان ءَ ھم ایرانی انٹلیجنس ءِ کارمندانی تیرگواری ءَ ھشت سالی ئیں مونا نقیب بلوچ کُشگ بیتگ ات –
ھال سرکنوک ایران انٹرنیشنل رپورٹ ءِ رد ءَ بیست ءُ سَے اکتوبر ءَ روکپتی بلوچستان ءَ ھشت سالی ئیں مونا نقیب ھما وھد ءَ کشتگ بیتگ آ وتی گوھار ءِ ھمراھی ءَ گاڑی ءِ سر ءَ وانگجاہ ءَ روگ ءَ بیتگ اَنت-