بشیر زیب بلوچ ءِ کتاب ’مھر گھوش‘ چاپ ءُ شنگ بیتگ

بلوچ لبریشن آرمی ءِ سروک بشیر زیب بلوچ ءِ نبشتانکانی تاک ’مھرگھوش‘ چاپ ءُ شنگ بوتگ –

اے تاک ءَ بازیں بنگپانی سر ءَ ندکار ءَ وتی ھیال درشان اتگ اَنت ءُ اے تاک چہ صباء انسٹی ٹیوٹ آف ریسرچ اینڈ پبلیکیشن ءِ نیمگ ءَ چاپ ءُ شنگ کنگ بوتگ – صباء انسٹی ٹیوٹ ءَ چدوپیسر بازیں تاک ءُ “سمو راج ” ءِ نام ءَ رسالہ ءَ ھم شنگ کتگ انت –

کتاب ءِ اولسر ءَ نبشتہ انت کہ اے تاک ھما نبشتانکانی یکجاھیں تاک اِنت کہ سال دوھزار ءُ شانزدہ ءِ مارچ ءِ ماہ ءَ بگر تاں سال دوھزار ءُ ھبدہ ءِ مارچ ءَ راجکاری ءِ وھدی ءَ نبشتہ کنگ بوتگ انت – اے یک ھنچیں وھدے بوتگ کہ وھدیکہ بلوچ راجی آجوئی جھد ءَ ھواریں درسیں سلاہ بند ءُ بے سلاہ بندیں راجداریں باسک یک ھنچیں باوستے ءِ تہ ءَ اڑ اتگ بوتگ انت کہ آئی ءِ برورد گندگ نہ بوتگ ءُ دومی نیمگ ءَ بلوچ لبریشن آرمی ءِ تہ ءَ ھم ایرادگری چست بوگ ءَ بوتگ انت کہ گڈسر ءَ گل ءِ سروک ءِ مٹ بوگ ءَ شر بوتگ انت –

” اے تاک راجکاری ءِ جاورھال ءُ ھما جاورھالانی درگت ءَ راجداریں رھشون ءُ باسکانی سنچ ءُ بستار ءِ درچانی تچک ءُ رھشونی کنگ ءِ یک ھنچیں جھدے کہ چریشی ءَ راجدار ءُ پاٹیانی باسک وتی کچگ ءَ گیشتر توانمند کت کن اَنت-

تاک ءِ درگت ءَ دیمتر ءَ نبشتگ کہ نبشتانکانی یکجاھی ءِ یک شری ءِ ھمیش انت کہ اے ھما وھد ءَ نبشتہ بوتگ انت کہ وھدیکہ چاگردی ترامجاھاں ایرادی باوست ءِ تہ ءَ اڑاند ودی بوتگ ءُ ایراد پہ دیمروئی نہ بوتگ انت، پد ءَ ایرادی ءِ نام زات ءِ سر ءَ اُرش بوتگ ءُ کہ چریشی ءَ جھدکارانی نام ءُ جاہ پاشک کنگ بندات بوتگ انت پد ءَ سیاسی بگیری ءِ تہ ءَ دوری ءِ پیداک بوتگ – اے نبشتانکانی مول ایراد ءَ سیاسی وڑے ءَ کنگ ءُ ھرابیں رویش ءِ نشان کنگ – اے کتاب ءِ شریں وڑے ءَ وانگ ءُ پھمگ ءِ ھاتر ءَ المی انت کہ سال دوھزار ءُ شانزدہ ءُ ھبدہ ءِ سیاسی جاورھالاں وتی مجگ تہ ءَ ایر بہ کن ات –