مند: شھید کپٹن ادھم ناک آؤٹ کرکٹ ٹورنمنٹ ءِ سیمی پائنل ءِ دومی گوازی

اپسار تلمب ءِ چیردستی ءَ شھید کپٹن ادھم بلوچ ءَ یات ءَ برجاھیں ٹورنمنٹ ءِ مروچی سیمی فائنل ءِ دومی گوازی کنگ بوتگ کہ ساچان بُلو ءَ نود ءُ سَے رناں گوازی کٹ اِتگ –

مروچی سیمی پائنل ءِ دومی گوازی ساچان بُلو ءُ سنگت لبنان ءِ میان ءَ کنگ بوتگ کہ ساچان بُلو ءَ پانزدہ اوورانی تہ ءَ سَے سد ءُ شش رن ءِ ٹارگٹ ایر کُتگ کہ سنگت لبنان ءَ ٹارگٹ پروشت نہ کُتگ ءُ بے سوب بوتگ –

سیمی پائنل ءِ دومی گوازی ءَ باج بروک ساچان بُلو ءِ لیبی وحید ڈونی ءَ سِی ءُ یک بالاں یکسد ءُ چاردہ رن جوڈ کُتگ شانزدہ چکا جتگ، ساکم ءَ ھپتاد ءُ سَے ءُ سلاہ الدین ءَ سِی رن جوڈ کتگ انت – ساچان بُلو ءِ نیمگ ءَ احمد ءَ پنچ، وحید ڈونی ءَ سِے ءُ عمران ءَ دو وکٹ گپتگ – وھدیکہ سنگت لبنان ءِ نیمگ ءَ چاردہ اوورانی تہ ءَ دو سد ءُ سینزدہ رن جوڈ کنگ بوتگ ءُ آل آؤٹ بوتگ انت –

سنگت لبنان ءِ نیمگ ءَ درساں گیش حارث ءَ بیست ءُ پنچ بالاں ھپتاد ءُ چار، طارق ءَ سِی ءُ پنچ ءُ الیاس ءَ سِی ءُ یک رن جوڈ کتگ انت – آھانی تہ ءَ عبدالصمد ءَ دو ءُ تارق ءُ یونس ءَ یک یک وکٹ ءِ گپتگ – مروچیگیں گوازی ءِ شرتریں لیبی وحید ڈونی بوتگ کہ آئی ءَ چہ گچینی مھمان ءَ داد گپتگ –

زانگ بہ بیت شھید کپٹن ادھم ءِ یات ءَ برجاھیں اے ٹورنمنٹ ءَ سرجمیں مند ءَ شانزدہ ٹیماں بھر زرتگ کہ آھانی تہ ءَ ساچان بُلو ءُ یادگار لبنان ءَ جوانی ءَ گوازی کنان ءَ وت ءَ پائنل ءَ سر کتگ – ٹورنمنٹ ءِ پائنل گوازی باند ءَ بزاں شانزدہ نومبر ءَ اپسار تلمب ءِ کرکٹ ءَ پٹ ءَ کنگ بیت اِنت –