کراچی: سی ٹی ڈی ءَ ٹاہ داتگ کہ ایس آر اے ءِ باسکے ءِ دزگیر کتگ

سندھ ءِ بنجاھی شھر کراچی ءَ کاؤنٹر ٹررزم ڈیپارٹمنٹ ءَ ٹاہ داتگ کہ کراچی دمگ سرجن فیض محمد خان دگ ءَ کورنگی ٹریفک لائسنس برانچ ءِ نزیک ءَ مھران ٹاؤن ءَ بیڑ برتگ ءُ سندھی راجداریں سلاہ بندیں گل سندھو دیش ریوولیشنری آرمی ءِ باسکے دزگیر کتگ –

سی ٹی ڈی ءِ درشان ءِ رِد ءَ بیڑ ءِ میان ءَ سلاہ بندیں گل ایس آر اے باسک رستم علی شر ء محمد عثمان گوں سلاھاں دزگیر کتگ –

سی ٹی ڈی ءِ جارکش ءِ رِد ءَ جست ءُ پرس ءِ میان ءَ کتکار ءَ دپ ءِ وت منّ اِتگ کہ آئی سیادی چہ سلاہ بندیں گل آیس آر اے ءَ انت – گل ءِ سروک ذوالفقار خاصخیلی انت کہ انو جرمنی ءَ نشتگ – کتکار گل ءِ ماسٹر مائنڈ انت ءُ آئی ءَ چہ ذولفقار خاصخیلی ءِ گوشگ ءِ پد ءَ ھما جاہ ءَ کار کنگی بیتگ کُتگے ءُ آھانی یکے دومی ءِ گوم ءَ ھال چہ ترامجاہ ٹیلی گرام ءَ بوتگ –

سی ٹی ڈی ءِ ایس ایس پی مظھر مشوانی ءَ گوشتگ کہ دزگیر کتگیں کتکار ءَ گل ءِ دگہ سنگتاں ھم مالی کمک ءُ سلاہ ءُ مواد سرکتگ بیتگ – اے کتکار ءِ بگیری ءَ کراچی ءُ سندھ ءِ تہ ءَ بازیں کوش ءُ ریل ءِ پٹانی سر ءَ تراک ءِ ارزی نبشتہ انت –

سی ٹی ڈی ءَ ٹاہ داتگ کہ دزگیر کنگ بوتگیں کتکار ءِ گور ءَ پستول ءِ گوں تیراں دستیگ کتگ ارزی نبشتہ کنائینتگ ءُ کتکار ءَ گوں گیشیں جست پرس برجاہ انت کہ گمان انت گیشیں کتکاریاں بہ منیت –