نبشتانک: نمیرانانی رتکگیں ھون بَر کار اَنت
نبشتہ کار: البرزبلوچ
دی بلوچستان پوسٹ
“زالم کہ مِر ایت آئی ءِ دور چہ ھمود ءَ ھلاس بیت، بلئے یک نمیرانیں (Martyr)ءِ زند چہ مرگ ءَ پد بندات بیت۔” سورین کئیرکیگارڈ
اے سیاہ شپ ءِ نیم ءَ کہ وھدے تئی ھمبلے ءِ ھوناں گوں مِچّلیں جون تئی دیم ءَ ایر بہ بیت ،اے سھت ءَ گْوش ئے وھد وتی بانزلاں داریت ءُ آزمان ءَ ترپوکیں استالانی ترپگ گیمُر اَنت۔ اے سھت ءَ ترا گُمان بیت کہ اے جون کہ تئی دیم ءَ ایر اِنت، اے نا تھنا یک مردمے ءِ جون اِنت بگندئے یک پگرے، ھما پگر کہ مردم ءَ زالم ءُ زوراک ءُ لُٹ ءُ پلیں تاکتانی دیم ءَ جنگ کنگ ءُ گھگیری ءِ سکین ءَ دنت۔ اے نمیرانیں بالاد ھما پِگرے یک مساپرے کہ چہ وتی ھمبلاں جسمانی بستار ءَ سِستگ۔ یک راجی جھدکارے جسمانی بستار ءَ بگندئے چہ وتی سنگتاں جتا بیت بلئے آئی ءِ پَشت کپتگیں جھد کہ نوں تئی کوپگاں اتکگ آترا واب ءَ نئیل ایت ءُ ترا اے سکین ءَ دنت کہ زند ءِ ھمے پشت کپتگیں بھر ءِ روچاں چون وتی ھمبل ءِ پشت کپتگیں جھد ءَ سرجم کنگ ءَ بہ دیاں، اگاں تو اے جیڑئے گڑا بزانکہ تو ھکّی ئیں جھدکارے ئے۔
دنیا ءِ تہ ءَ بازیں مردمے اتکگ ءُ شتگ،کئیت ءُ روت، اے دْرچ نہ اوشت ایت بلئے ھمک زاتے ءَ کہ یک زندے رس اتگ ءُ اے زند ءَ کجام مردم چون گوْازینیت ایشی ءِ مزنیں ارزشتے ھست ۔ زند گْوازینگ بگندئے پہ مردم ءَ ارزان بہ بیت بلئے ھکّی ئیں دروشم ءَ زند ءَ گوں یک مکسدے ءَ بندوک کنگ ءِ جتائیں بستارے۔ مردم ءِ ابرمی مرگ چوناھا ھست اِنت کہ آ روچے نا روچے اناگتءَ مرگ ءِ آماچ بیت یا کہ پیر بیت ءُ مرگ ءِ آماچ بیت، بلئے وتی مرگ ءِ وھد ءُ پاسانی وت پیسلہ کنگ یک مزنیں کارے کہ ھما مردم وتی مرگ ءَ گوں وتی دست ءَ نبشتہ بہ کنت ۔ مرگ چوناھا کئیت اِنت بلئے زندگیں مردم ھما اِنت کہ گوں بچکنداں وتی ساہ ءَ بہ دنت بازیں نزوریں مردمے ودی بیت کہ چماں بند کنت ءُ چو چات ءِ پُگُل ءِ ڈول ءَ زندگی کنت بلے آئی ءِ آسر پد ءَ ھم مرگ اِنت بلے دومی نیمگ ءَ مرچی دنیا کہ اے جاہ ءَ سر اِنت آئی ءِ پُشت ءَ شکلیں جنگانی لڑے ھست کہ ایشی ءِ تہ ءَ مھلوک ءِ ساھانی کربانی بیتگ اَنت۔ ھما کہ زُلمءِ دیمءَ اوشتوک بیتگ ءُ آجوئی ءِ گپ کتگ ھما ھاں مرچی دنیا مٹ کتگ ءُ اے زمین پہ مردماں زندگ گوازینگ ءِ لائک کتگ۔ بگندئے اے گپ ءَ کسے تپاک مہ داریت کہ نمیرانی ءِ توسیپ ھمنچو کنگ بیت کہ مردم وتی زند گوازینگ ءَ یلہ بہ دنت ءُ لازم نمیران بہ بیت ،بلے اے یک ابرمی راستی یے کہ دنیا ءِ تہ ءَ گِھتری ءُ مردمی آجوئی ھُشک ءَ نہ رس ایت بلکیں کُچلیں راستی یے کہ ھونانی ریچگ ءَ پد رس ات کنت۔ ھما راج کہ آئی ءِ مہلوک ءَ پہ وتی باندات ءِ رُژنائی ءِ جاہ ءَ وتی باندات رُژنا کنگ ءِ کوشست کتگ گڑا آئی ءِ جِند ھم لگتمال بیتگ ءُ آئی ءِ راج ھم دپتر ءِ مُجاں گار اِنت۔
دنیا ءِ تہ ءَ مرچی ھما راج زندگ اَنت ءُ آبات اَنت کہ آھانی راج ءَ جانانی کربانی داتگ، جونانی جُمپگاں گوں مرچی آھاں وتا دنیا ءِ نکشہ ءِ تہ ءَ زندگ کتگ۔ آھانی زبان،زمین، دود ءُ ربیدگ ءُ راج ءَ گوں سیادی داروکیں ھر شئے آنی ءِ زندگ بیگ ءِ پُشت ءَ آ راج ءِ پُسگانی شلوکیں ھون اَنت۔ اولی جھانی جنگ ءَ 2 M ملین مردم مِر ایت کہ ایشانی تہ ءَ نیم لس مھلوک بیت ءُ نیم جنگول بنت۔ دومی جھانی جنگ ءَ کساس 4 داں 5 کُڈُل(کروڑ) مردم مِر ایت۔ ءُ پولینڈ ءِ آباتی ءِ 20%مردم ماں اے جنگ ءَ مِر ایت۔ مرچی دنیا ءِ تہ ءَ کہ دومی جھانی جنگ ءَ پد راجی استان جوڑ بنت ءُ مرچی آ راجے ءِ بستار ءَ دنیا ءِ تہ ءَ زاھر اَنت آھانی پشت ءَ آ راج ءِ پسگانی ھون اَنت۔ انچوش دنیا ءِ اگاں آدگہ راجی جنزاں بچارئے داں لکّانی ھساب ءَ مردم نمیران بیتگ اَنت۔ اے درستیں گپ اے چیز ءَ پدر کن اَنت کہ وھدے تو وتی زمین ءُ وتواجھی ءَ رکینگ لوٹ ئے گڑا آ جنگ ءَ چہ بیت کنت اِنت ءُ جنگ ءِ تہ ءَ مال ءُ مڈیانی تاواناں ھوار مردمی جانانی کربانی دیگ کپ ایت گڑا آ راجی جنز سوبین بیت کنت ءُ دومی نیمگ ءَ اے گپ ءِ تہ ءَ ھچ شک نیست کہ بہ گُپت بالاچ مری” راج پہ مِرگ گار نہ بنت بلکیں پہ سر ءِ جھل کنگ ءَ گار بنت۔” دپتر ءِ تہ ءَ اے چیز پدر اِنت کہ راج ءَ گیشتر جونانی کربانی داتگ آ مرچی دنیاءِ آبات تریں راجے۔
ھمے ڈول ءَ بلوچ راجی آجوئی جنز ءَ مرچی ہزارانی کچ ءَ بلوچاں وتی جان پہ مکھیں ڈیھ ءِ آجوئی ءَ ندر کتگ اَنت۔ مرچی بلوچ راج وتی آجوئی ءِ جھد ءَ کنگ ءَ اِنت ھما جھد کہ آئی ءِ مکسد بلوچ راج ءِ سرجم ءَ آجو کنگ ءَ نوکیں بلوچ راجے جوڑ کنگ اِنت، اے بلاھیں مکسد دنیا ءِ تہ ءَ درستاں چہ وشتریں ءُ راست تریں لزت اِنت کہ یک راجے ءَ وتی آجوئی رس ایت بزاں آ دوبر زندگ بیت۔ یک راجے ءِ زندگ کنگ ءِ واستا آئی ءِ پسگاں مِرگ لوٹ ایت۔ ھمے فلسفہ ءِ منوکی ءَ گوں بلوچ راج ءِ پسگ مرچی وتی سراں دیگ ءَ اَنت۔ اے ھما فلسفہ اِنت کہ یک ماتے وتی چُکاں یلا دنت ءُ گلزمین ءِ واستا زورگیرانی دیم ءَ تمردی ءَ اوشتیت ءُ وتی نگرھیں جان ءَ ندر کنت۔ گوْش انت کہ مات ءِ مھر پہ وتی چُکاں درستاں چہ برزتریں مھر اِنت ھئو راست گوْش انت بلے مئے گوْر ءَ یک ماتے ءِ چُک تھنا آئی ءِ جند ءِ چُک نہ اَنت بلکیں تیوگیں راج ءِ چُک آئی ءِ چُک اَنت ھما چُک کہ آئی ءِ گلزمین ءِ دلبند ءَ چہ درتکگ اَنت ءُ مھلبیں زمین ءِ سر ءَ زندگی کنگ ءَ اَنت۔ اے بلوچ ءِ نمیرانی ءِ فلسفہ اِنت کہ ورنا وتی مکھیں ماتاں یلا دینت ءُ وتی راج ءِ ماتانی شلوکیں ارسانی پُشت ءَ رواَنت ءُ نمیران بنت پد ءَ مستریں گپ ایش اِنت کہ آ مات وتی دست ءَ چُک ءِ بڈا جنت ءُ گوْش ایت کہ برو پہ وتی سرڈگار ءِ آجوئی ءِ واستا وتی زمہ واری ءَ پیلو کن کہ تو تھنا منی چُک نہ ئے بلکیں بلوچ راج ءِ چُک ئے۔
بلوچ راجدپتر ءِ تہ ءَ چوشیں درورانی امبارے ھست کہ بلوچ پُسگ وتی سرڈگار ءِ رکینگ ءِ ھاتر ءَ وتی ھون ءِ گڈی ترنپ ءَ گوں جھد ءِ سنگراں اوشتوک بیتگ اَنت۔ 1839ءَ بگِر داں روچ مرچیگ ءَ بلوچ ھمے فلسفہ ءِ سر ءَ اوشتاتگ کہ وتی زمین ءِ رکینگ ءِ واستا کترہے ھم پشت ءَ نہ شتگ۔ مرچی بلوچستان ءِ کوُچگ ءُ میتگانی تہ ءَ ھرچ گِس ءُ دمکے ءَ ترا شھیدے دست کپ ایت کہ آھاں بلوچ سرڈگار ءِ واستا وتی گراں بھائیں زِند داتگ پرچاکہ آ ھانی چم پچ بیتگ اَنت ءُ چہ ایندگہ مھلوکاں گیش دانا بیتگ اَنت۔ اے نمیرانیں زند ءِ ھر ابرمی شئے چہ آدگراں گیشتر دوست بیتگ چیاکہ تو وھدے زند ءَ دوست دارئے ءُ زند ءَ گوں اوار ھرچ ابرمی شئے آں گوں مھر کن ئے ءُ تو گندئے کہ اے کُل لگتمال اَنت گڑا تو پاد کائے ءُ اشانی مٹ کنگ ءِ جھد ءَ کن ئے۔ گڑا تو مرگ ءَ نہ چارئے بلکیں زند ءَ گچین کن ئے ھما زِند کہ تئی مرگ ءَ چہ پد تئی راج ءَ پہ بِندات بیت۔ ھم ے ھوناں گوں زمین ءَ آپ رس ایت ءُ زمین آجو بیتءُ آبات بیت، چوشکہ یک ڈگارے ءَ سبز ءُ آبات بیگ ءَ آپ ءُ دان لوٹ ایت ھمے ڈول ءَ زمین ءَ زندگ بیگ ءُ رکّگ ءِ واستا ھون لوٹ ایت ءُ ھمے ھون ءِ وشبو ءَ گوں بلوچ راج ءِ مہلوک آجوئی ءَ گوں ساہ کش ایت۔
سینزدہ نومبر بلوچ شھمیریں سرانی روچ اِنت کہ آھاں بلوچ سرڈگار ءِ آجوئی ءُ بلوچ راج ءِ جوڑشت ءِ واستا وتی نُگرھیں جان کربان کتگ اَنت۔ اے روچ ءِ دارگ ءَ گوں بلوچ راج وتی نمیرانیں راجی جھدکاراں یات کنت. ھما نمیران کہ آھانی رتکگیں ھونانی سوْب ءَ مرچی بلوچ ءِ پجار ءُ زمین رک اِتگ۔ مرچی ھما نمیرانانی رتکگیں ھون ءُ سرانی کربانیءِ سوْب اِنت کہ بلوچ راج ءَ دنیا ءِ تہ ءَ کسانیں پجارے ایر کتگ، ءُ دژمن مرچی بلوچستان ءَ آسانی ءَ پاد ایرکُت نہ کنت۔ ھمے نمیرانانی برورد ءَ مرچی بازیں وتگڑیں میانی سیاستدان کہ وتا بلوچ راج دوست گوْش انت اتکگ انت ءُ بلوچ راجی نمیرانانی رتکگیں ھونانی سر ءَ سودا کنگ ءَ اَنت، بلے بلوچ راج اے چیز ءَ دلجم اِنت کہ اے رتکگیں ھونانی آسر تھنا بلوچ سرڈگار ءِ آجوئی اِنت۔ نامی ئیں نمیراناں ھوار ھزارانی کچ ءَ مرچی گُمنامیں نمیران ھست اَنت کہ آھانی ناماں کس نہزانت ءُ نئیکہ آھاں پہ نام ءِ واستا نمیرانی ءِ راہ چُک اِتگ بلکیں پہ بلوچ راج ءِ زند ءُ پجار ءُ آجوئی ءِ واستا گمنامی ءَ گوں نمیران بیتگ اَنت اے کُلیں نمیران یک اَنت کہ آ بلوچ راجی آجوئی ءِ راہ ءَ کوھاں گوں دژمن ءَ دو پہ دوئی جنگ ءَ، شھراں ماں دگانی سر ءَ ،دژمن ءِ ٹارچر سیلانی تہ ءَ یا گیاباناں زانگولیں لاشانی دروشم ءَ نمیران کنگ بیتگ اَنت۔ اے کُلیں نمیران بلوچ راجدپترءَ نمیران اَنت ءُ اے کسہ انگت سرجم نہ اِنت۔ اے نمیراناں پہ بلوچ ءِ آجوئی ءِ واستا ھون ریتکگ ءُ بلوچ ماں دنیا ءَ منارینتگ۔ بلوچ راجی نمیرانانی سوْب ءَ مرچی ھرکس پہ پھر وتا بلوچ گوْش ایت بلے اے گپ ءَ بہ زان اِت کہ بلوچ بوگ اِنچو ارزان نہ اِنت، اگاں کسے بلوچے گڑا آئی ءَ سرجم ءَ بلوچ بوگی اِنت، ھما بلوچ کہ آ وتی ساہ ءَ دنت بلے سرڈگار ءَ نہ دنت۔ نمیرانی چوشیں ارزانیں شئے یے نہ اِنت کہ ھرکس ءَ بہ رسیت بلکیں نمیرانی کز ءَ یک بھتاورے ءَ بہ رس ایت،ھما کہ پہ وتن زرَ ایت ءُ گوں زمین ءَ گُڈی مھر ءَ رؤت ءُ ھمائی ءَ نمیرانی ءِ ازیمیں ٹیکی رس ایت۔ چوشیں بلوچ جھدکارانی یک ھلاس نہ بووکیں رمے ھست کہ آ پہ بلوچ سرڈگار ءِ آجوئی ءِ واستا وتی سرانی ندر کنگ ءَ جاڑی اَنت۔ نمیرانانی اے سپر داں بلوچ سرڈگار ءِ سرجم ءَ آجوئی ءَ روان کنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔