سی ٹی ڈی ءَ چہ ھزدار ءَ زورانسری آوار جتگیں ورنایانی دزگیری زاھر کتگ

کاؤنٹر ٹیررازم ڈیپارٹمنٹ گوستگیں روچاں چہ ھزدار ءَ زورانسری آوار جتگیں ورنایانی دزگیری شال ءَ زاھر کتگ انت –

یک ھپتگ ءِ میاں سی ٹی ڈی ءَ بلوچستان ءِ جتا جتائیں ھند ءُ دمگاں چار بیڑ بری ءِ ٹاہ داتگ ءُ وھدیکہ اے بیڑاں دزگیر کنگ بوتگیں مردمانی تہ ءَ سَے مردمانی پجار بوتگ کہ آ پیسر ءَ زورانسری آوار جنگ ءُ بیگواہ کنگ بوتگ انت –

سی ٹی ڈی ٹاہ داتگ کہ گوستگیں روچاں مارا پکائیں ھالے رستگ کہ بلوچ لبریشن آرمی ءِ باگی عبدالمنان ءُ سرفراز احمد چہ شور پارود کلات ءَ در اتکگ ءُ دیم پہ شال ءَ رؤگ انت –

درشان ءِ تہ ءَ ٹاہ دیگ بوتگ ھال سر بوگ ءَ سی ٹی ڈی شال ءَ درخشان ناکہ شال سبی دگ ءَ راہ بستگ ءُ پرپٹ سوار داشتگ انت – پٹ پول ءِ میان ءَ مارا یک پرپٹ ءِ سر ءَ شک بوتگ گڈا ما آ اوشتگے اشارہ کتگ بلے آئی ءَ تچگ ءُ رؤگے جھد کتگ بلے کارمند آئی ءِ دارگ ءَ سوبمند بوتگ انت ءُ اے کتکار دزگیر کتگ انت –

سی ٹی ڈی ءَ اے مردمانی گور ءَ پنچ دزبمب، یک ھزار ءُ دوسد گرام C4 تراکناکیں شورہ، دو کِلو دگہ مواد، چار الیکٹرک ڈیٹونیٹر، یک ریموٹ کنٹرول کٹ ءُ یک الفا فائر سسٹم ءِ دستیگ کنگے ٹاہ داتگ –

سی ٹی ڈی ءِ جارکش ءَ ٹاہ داتگ کہ بنداتی جست ءُ پُرس ءِ میان ءَ کتکاراں دپ ءِ وت منّ اِتگ کہ آھاں آغا شکیل درانی ءَ ھوار ھزدار ءِ دگہ بازیں سرکاری مرمانی جنگے شوربندی کتگ –

دی بلوچستان پوسٹ ءَ اے درگت ءَ گیشیں پٹ پول کتگ گڈا ھمے ھال سربوتگ کہ اے ھردو مردم عبدالمنان ء محمد موسی ءُ سرفراز ء نیاز جھمنند نوغے ھزدار گوستگیں ماھے سِی اکتوبر ءَ ھزدار ءِ دمگ فیروز آباد ءَ ھما وھد ءَ زورانسری آوار جنگ بوتگ انت کہ آ فٹبال گوازی ءَ پد واتر بوتگ انت – ھردو ورنا میڈیکل اسٹور یے کار ءَ ھم بوتگ انت –

اے دزگیر کتگیں ھردو ورنا زورانسری آوار جنگ بوتگیں رشید ءُ آسف بلوچ ءِ کھول سیادی دار انت –

وتی براتانی یل کنائینگے ھاتر ءَ توار چست کنوکیں گھار سائرہ بلوچ ءَ ھردو ورنایانی بیگواھی ءِ ھبر راست کتگ گوستگیں روچ ءَ چاگردی ترامجاہ ٹویٹر ءِ تہ ءَ نبشتگ کہ منی دو وارس سرفراز ءُ منان سِی اکتوبر ءَ ھزدار ءِ دمگ فیروز آباد ءَ فٹبال گوازی ءَ شتگ بوتگ انت کہ واتر بوگ ءِ وھد ءَ پھازگی لشکر ایف سی ءِ کارمنداں آ آوار جتگ ءُ بیگواہ کتگ انت –

ھمے ٹویٹ پاکستان ءِ نامداریں اھوالکار حامد میر ءَ ری ٹویٹ کتگ ءُ پہ جُست نبشتگ کہ بلوچ ورنایانی ھاتر ءَ فٹبال گوازی کنگ ھم جرمے جوڈ کنگ بوتگ؟

چار روچ ساری سی ٹی ڈی ءَ چہ کلات ءِ دمگ منگچر ءَ ھم یک ورنایے ءِ دزگیر کنگ ءِ ٹاہ داتگ بلے اے ورنایے کھول ھم آئی ءِ زورانسری آوار جنی ءِ بگیری ءَ زھرشانی ءَ بوتگ انت –

سی ٹی ڈی ءِ درشان ءِ رِد ءَ سی ٹی ڈی ءَ چہ کلات ءَ بلوچ لبریشن آرمی ءِ کمکار ولی اللہ لہڑی چہ منگوچر کلات دگ ءَ دزگیر کتگ ءُ آئی گور ءَ تراکناکیں شورہ ھم دست کپتگ –

بلے ورنایے کھول اے دزگیری ءَ پیسر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ بنجل ءَ اتکگ انت ءُ وتی زھرشانی ءِ نبشتہ کنائینتگ –

زورانسری آوار جنگ بوتگیں ولی اللہ لہڑی ءِ برات ءِ گوشگ ات کہ منی بیست ءُ سَے سالی برات ولی اللہ لہڑی جھمنند خاردان کلات کالج ءِ نودربر یے ءُ پدا کلات بازار ءَ کراکری دکان ءَ آئی ءَ مزوری کتگ بوتگ – بیست ءُ شش اکتوبر سال دوھزار بیست ءُ دو ءِ ادار سَے ءِ نزیک ءَ بید نمبر پلیٹ ءِ دو سرف گاڑی اتکگ انت ءُ سَے ناشناسیں سلاہ بندیں مردماں منی برات چہ دکان ءَ زورانسری آوار جتگ ءُ گوں وت برتگ –

اشی ءَ ابید یک ھپتگے ءِ میان ءَ سی ٹی ڈی ءَ چہ مستونگ ءَ نوروز ءُ ظہیر، چہ شال ءَ عبدالواجد ءُ جان محمد، چہ ھب چوکی ساکران دگ ءَ دوست محمد ءُ محمد اسمائیل دزگیر کتگ ءُ بیگواہ کتگ انت ءُ ٹاہ داتگ کہ اشانی گور ءَ سلاہ ءُ تراکناکیں شورہ دست کپتگ –

سی ٹی ڈی ءَ بلوچستان ءِ تہ ءَ چدوپیش ھم بازیں مردمانی دورگیں بیڑاں مردمانی دزگیری ءِ ٹاہ داتگ بلے پدا آ زانگ بوتگ انت کہ چہ پیسر ءَ زورانسری آوار جتگیں مردم بوتگ انت وھدیکہ ریڈ بُک ءِ تہ ءَ ھم بازیں مردمانی نام ھوار انت کہ آ پیسر ءَ آوار جنگ بوتگ انت کہ آھانی درگت ءَ وائس فار بلوچ مسنگ پرسنز ءَ ھم درشان داتگ –

اشی ابید سی ٹی ڈی نیمگ ءَ بازیں مردمے دروگیں میڑ ءَ کُشگ بوتگ انت کہ آ پیسر ءَ زورانسری آوار جنگ بوتگیں مردم بوتگ انت –

بلوچستان ءَ بیگواھیں مردمانی پانکجنیں گل وائس فار بلوچ مسنگ پرسنز ءِ کمک سرکماش ماما قدیر بلوچ ءِ گوشگ انت کہ چیریں ادارہ سی ٹی ڈی ءَ کار بندگ انت ءُ دست گوشیں پرزنداں آوار جنگ ءُ شھید کنگ ءَ انت –

ماما قدیر بلوچ ءَ گوشتگ کہ ایجنسی والھاں نوکیں شوربندی ءِ ٹھینتگ بلے سی ٹی ڈی ءِ دروگ نوں پدر انت زورانسری آوار جنی ءُ زالبولانی آوار جنی درگت ءَ ریاست ءَ مدامی دروگیں درشان داتگ –

آئی ءِ گوشتگ کہ سرکار پوج ءِ دیم ءَ بے وس انت ضیاء لانگو دروگ بندیت ءُ وتی ھاکمانی چانیگ ءِ ھک ءَ ادا کنگ ءَ انت –