سربوتگیں ھالانی رِد ءَ گوستگیں روچ ءَ ناشناسیں سلاہ بندیں مردماں پنجگور ءِ دمگ بالگتر ءَ پاکستانی پوج ءِ سر ءَ اُرش کتگ –
اُرش بالگتر ءِ ھند سہاکی چمگ ءَ برجاھیں پاکستانی پوج ءِ پانگسے ءِ سر ءَ کنگ بوتگ چریشی ءَ پاکستانی پوج ءَ جانی ءُ مالی تاوان دیمپانی کنگ کپتگ ءُ سلاہ بندیں مردم درآھگ ءُ رؤگ ءَ سوبمند بوتگ انت –
دومی نیمگ ءَ ھزدار ءِ دمگ چمروک ءَ ریاستی کارمندانی سر ءَ بمب اُرش ءِ کنگ بوتگ –
بمب اُرش نائب عبدالغنی ءُ عبداللطیف سر ءَ بوتگ ، دمگی مردمانی گوشگ انت کہ اے مردم بازیں چاگردی سلکاریاں ھوار بوتگ انت –
ریاستی کارمند ءُ گوستگیں روچ ءَ پاکستانی پوج ءِ سر ءَ بوتگیں اُرشانی زمّہ واری بلوچ آجوئی لوٹوکیں سلاہ بندیں گل بلوچ لبریشن آرمی ءَ منّ اِتگ انت –
بی ایل اے ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ ھردو اُرشانی زمّہ واری منّ اِتگ گوشتگ کہ بلوچ لبریشن آرمی ءِ سرمچاراں پنجگور ءُ ھزدار ءَ دو جتائیں اُرشاں زورگیریں پاکستانی پوج ءُ چیریں ادارھانی دمگی کارمند نشانگ کتگ ءُ دژمن سک باز تاوان داتگ –
جارکش ءَ گوشتگ کہ سرمچاراں اولی اُرش گوستگیں روچ ءَ پنجگور ءِ دمگ بالگتر سہاکی چمگ ءِ ھند ءَ برجاھیں پاکستانی پوج ءِ پانگِس ءِ سر ءَ کُتگ – سرمچاراں یکیں وھد ءَ دو نیمگاں پانگس ءِ سر ءَ راکٹ ءُ دگہ مزنیں سلاھاں گوں اُرش کتگ، کساس بیست ملٹ ءَ برجاھیں اے اُرش ءَ زورگیریں پوج ءِ سَے کارمند ھما دمان مُرتگ انت ءُ کم چہ کم چار کارمند زدگ بوتگ انت وھدیکہ دژمن ءِ دو سنگر تباہ بوتگ انت –
جارکش جیئند بلوچ ءَ دیمتر ءَ گوشتگ کہ بی ایل اے ءِ سرمچاراں مروچی یک دگہ اُرشے ءَ ھزدار چمروک ءَ پاکستانی پوج ءُ چیریں ادارھانی جوڈ کرتگیں کشندہ ٹولی کارمند نائب عبدالغنی ءُ عبداللطیف مقناطیسی بمب اُرش ءِ نشانگ کرتگ انت – اے مردم چیریں ادارھانی سروکی ءَ ھزدار ءُ کش گور ءِ دمگاں بلوچ ورنایانی زورانسری آوار جنی، لشکر کشیاں ھوار بوگ ءُ بلوچ راج ءِ زمینانی پچ گرگ ءُ آوارجنی ءُ ملام گرگ ءِ کتکاریاں ھوار بوتگ انت – اے ٹولی ءَ ھمگرنچیں ایندگہ مردم ھم زانگ بوتگ انت کہ زوت نشانگ کنگ بنت –
جارکش ءَ گڈسر ءَ وتی درشان ءِ تہ ءَ گوشتگ کہ بلوچ لبریشن آرمی ھردو اُرشانی زمّہ واری ءَ منّیت ءُ زورگیریں پوج ءُ آئی داشتگیں کمک کارانی سر ءَ اُرش ترندی ءَ گوں برجاہ مان انت –