بولان لشکر کشی ءِ سر ءَ بے تواری رسانکدر ءَ بندیگ کنگ ءَ پدر کنت- شیرین مزاری

بولان ءَ لشکر کشی ءُ زالبول چکانی زورانسری آوار جنی ءِ سر ءَ مزنیں رسانکدرانی بے تواری پدر کنت کہ ریاست رسانکدر ءَ کجام وڑ ءَ بندیگ کنت-

اے ھیال ءُ لیکہ پاکستان ءَ گوستگیں وزیر انسانی ھکانی شیرین مزاری ءَ وتی یک ٹویٹے کتگ-

شرین مزاری ءَ نبشتہ کتگ کہ بولان ءُ کش گور ءِ دمگاں ھرچی کہ بوگ ءَ اِنت ھاسکار کم چہ کم یازدہ زالبول کسانیں جنک ءُ زھگانی زورانسری آوار جنی ءِ درگت ءَ اش کتگ دل سُر اِتگ-

آئی ءَ دیمتر ءَ گْوشتگ کہ اے لشکر کشی ءِ سر ءَ مزنیں رسانکدرانی بے تواری یکرندے پد ءَ پدر کنت کہ ریاست رسانکدر ءَ کجام وڑ بندیگ کنت-

زانگ بہ بیت گوستگیں روچاں بولان ءِ کش ءُ گوراں مزنیں کچے ءَ لشکر کشی بندات کتگ چریشی ءَ بمب گواریں بالگرداں ھوار جنگی بالگراب برز بالی ءَ گندگ بیتگ اَنت وھدے کہ پوج نیمگ ءَ چہ مزنیں کچے ءَ دمگ ءَ زالبول ءُ چک بندیگ کتگ اَنت-

لشکر کشی ءَ زالبول ءُ چکانی بندیگ کنگ ءَ جتائیں ھیال ءُ لیکہ مردماں ترس درشان ءَ ھوار ھکومت ایر جتگ

عوامی ورکرز پارٹی ءِ جنرل سیکرٹری خرم علی ءَ نبشتہ کتگ بولان ءَ برجاھیں لشکر کشی زالبول ءِ گوم ءَ لُٹ ءُ کُٹانی اکس دیم ءَ آھگ ءَ اِنت آ ھما نیمگ ءَ شھار دیگ ءَ اِنت کہ رودرتکی پاکستان ءَ بوتگیں لشکر کشی ءِ درگت ءَ تُرسناکیں زُلم ءُ زوراکی ءِ ٹاہ بلکل راست اَنت یات بہ کن اِت زورگھگیری تھنا گیش بیت ھچبر ایرموش نہ بیت-

نیشنل پارٹی ءِ راھشون ءُ سینیٹر میر کبیر ءَ گْوشتگ کہ بولان ءَ چہ بازیں بلوچ زالبول ءُ چک بیگواہ کنگ ءِ کرد ءَ تُرندی ءَ ایر جن ایں- اے وڑیں گامگیج ءَ چہ نپرتانی تہ ءَ گیشی کیت – تاکت ءِ کارمرز ءُ انسانی ھکانی پادمالی ءَ چہ بلوچستان ءِ جیڑہ ناں پیسر ءَ گیشتگ ناں انّی بیت- بلوچستان ءَ تاکت کارمرز ءَ یل بہ کن اَنت شریں وڑے ءَ ایمنی ءَ گپ ءُ دیوان بہ کن اَنت-

زانگ بہ بیت بولان لشکر کشی ءِ بگیری ءَ کراچی ءَ وائس فار بلوچ مسنگ پرسنز ءُ بلوچ یکجھتی کمیٹی نیمگ ءَ چہ یکجاھی زھرشانی ءِ جار جنگ بیتگ وھدے کہ شال ءَ ھم وائس فار بلوچ مسنگ پرسنز نیمگ ءَ زھرشانی کنگ بیت-