بلوچستان ءِ جتاجتائیں جاھاں پاکستانی پوج ءَ شش مردم زورانسری آوار جتگ ءُ ناشناسیں جاھے ءَ برتگ اَنت

بلوچستان ءِ جتاجتائیں دمگ قلات، پنجگور، آواران ءُ کیچ ءَ پنچ ورناہ آوار جتگ ءُ بیگواہ کتگ اَنت-

سربوتگیں ھالانی رِد ءَ بلوچستان ءِ ضلع پنجگور ءِ تھسیل گچک ءِ ھند لوھڑی ءَ شپ ءِ وھد ءَ پاکستانی پوج ءَ بیڑبرتگ ءُ لوگ مردمانی سر ءَ زوراکی کتگ-

ھالانی رِد ءَ پوج ءَ بیڑ وھد ءَ یک ورنایے ءِ دزگیر کنگ ءِ جُھد کتگ کہ اود ءَ زالبولانی گھگیری ءَ چہ پوج ءَ لٹ ءُ کُٹانی نشانگ کتگ اَنت ءُ ورناہ گوں وتی ھمراھی ءَ برتگ پوج دست ءَ آوار جنگ ءَ پد بیگواہ کنگ بیتگیں ورنائے پجّار ایاز ء مبارک بلوچ نام ءَ چہ بیتگ-

ھمے وڑ ضلع کیچ ءَ سے مردم زورانسری آوار جتگ ءُ بیگواہ کتگ اَنت- ھالانی رِد ءَ اے سئیں مردم ھما وھد ءَ زورانسری آوار جتگ ءُ گوں وت برتگ اَنت وھدے کہ آ آ چہ شاپک ءَ تربت ءَ روگ ءَ بیتگ اَنت-

آوار جنگ بیتگیں مردمانی پجّار رستم ء نظر، امید ء چارشمبے ءُ مُگل ء محمد نام ءَ چہ بیتگ اَنت ءُ آیانی کھول پاکستانی پوج چیردستی ءَ کارکنوکیں کُشندہ ٹولی خالد یعقوب نیمگ ءَ چہ بیھار دیگ بیگ ءَ اِنت-

دومی نیمگ ءَ ضلع آواران پاکستانی پوج ءَ یک نودربرے آوار جتگ ءُ بیگواہ کتگ ھالانی رِد ءَ نودربر ھما وھد ءَ آوار جنگ ءُ بیگواہ کنگ بیتگ وھدے آ پاکستانی پوج ءَ بیھار داتگ ءُ دمگی کُشندہ ٹولی ءَ نیمگ ءَ چہ شال ءَ آواران ءَ لوٹائینتگ ءُ دو نومبر ءَ زورانسری آوار جتگ ءَ ناشناسیں جاھے ءَ برتگ-

آوار جنگ بیتگیں ورنائے پجّار عبدالمجید ء امیر نام ءَ چہ بیتگ-

زورانسری آوار جنی ءِ دگہ یک وئیلے قلات ءِ ھند ءَ بیتگ –

ھالانی رِد ءَ گوستگیں روچ ءَ پاکستان پوج ءَ چہ قلات ءِ دمگ شیخ حاجی ءَ کلیم اللہ ء علی گل مینگل زورانسری آوار جتگ ءُ گوں وت برتگ –

زانگ بہ بیت کہ سرجمیں بلوچستان ءَ ھمکروچ زورانسری آوار جنی ءِ کیس رپورٹ بوگ ءَ اَنت- ھمے ھپتگ ءَ پاکستانی پوج ءِ دست ءَ قلات، خاران، بولان ءَ ھوار جتائیں دمگاں زورانسری آوار جنی ءِ کیس رپورٹ بیتگ اَنت-

چیزے روچ ءَ ساری قلات خزینئی ءَ پوج ءِ کاروان سر ءَ بمب اُرش ءَ پد پاکستانی پوج ءَ اے دمگ ءَ لشکر کشی بندات کتگ ءُ دمگی مردماں لُٹ ءُ کُٹانی نشانگ کتگ ءَ دو مردم خالق داد ءُ عبدالحکیم آوار جتگ ءُ ناشناسیں جاھے ءَ برتگ اَنت کہ تنی وھدے آ دیم ءَ نیاورتگ اَنت-

دومی نیمگ ءَ پاکستانی پوج ءِ نیمگ ءَ چہ بولان کش ءَ گوراں لشکر کشی ءَ مروچی شش روچ اِنت کہ برجاہ ءَ اِنت ھمے میان ءَ پوج ءَ درزنانی زالبول ءُ چک اوچ کمان ءِ کش ءُ گور ءِ دمگاں بندیگ کتگ اَنت کہ آیانی تہ ءَ سیزدہ زالبول ءُ چُکانی پجّار بیتگ اَنت-