دکی ءَ اشکر کھن ءَ بیتگیں وئیل ءَ چار کھن جن بیران بیتگ اَنت

دکی ءَ اشکرانی کھن ءَ جتاجتائیں وئیلاں چار کھن جن بیران بیتگ اَنت-

بلوچستان ءَ اشکرانی کھناں اسراتی نہ بوگ ءِ سبب ءَ بؤکیں وئیلانی نہ کُٹْوکیں دْرچ برجاہ ءَ اَنت ھمکروچ کھن جن مرگ دیمپان بوگ ءَ اَنت-

ھمے سال ءَ جتاجتائیں کھنانی وئیلاں یکجاھی ھساب ءَ نوزدہ کھن جن بیران بیتگ اَنت، دہ ءِ نزیک ءَ کھن جن ٹپی بیتگ بوگ ءِ وئیل نکش بیتگ اَنت-

گوستگیں روچ ءَ پنچ وئیلاں شش کھن جن بیران بیتگ اَنت-

گوستگیں روچ ءَ چمالنگ ءِ دمگ ءَ اشکرانی کھن ءَ دو جتاجتائیں وئیلاں دو کھنجن بیران بیتگ اَنت جہ آیانی پجّار شیر علی ء عبدالودود جھمنند سوات، بسو خان ء سور جھمنند اوگانستان ءَ چہ بیتگ اَنت-

مروچی چمالنگ ءَ دمگی کھن ءَ ھاک ءِ لُمبگ ءَ چہ دو کھنجن بیران بیتگ اَنت کہ آیانی پجّار اختر محمد ء خیر محمد ءُ نقیب اللہ ء نصیب اللہ بارکزئی نام ءَ چہ بیتگ اَنت کہ آ اوگانستان ءِ جھمنند اَنت-

نادُراھجاہ انتزامیہ ءِ اژدری چار ءُ ٹپاس کنگ ءَ پد لاش کھول ءَ داتگ انت-

زانگ بہ بیت بلوچستان ءَ گیشتر وھد ءَ اشکر کھن وئیل دیم ءَ کاینت پوریاگرانی گل اشکر کھن ءَ اے وئیلاں آسراتی ءُ شریں ازبانی نہ بوگ ءِ سبب ءَ گوشگ ءَ اِنت وھدے کہ اے وئیلانی آماچ بیتگیں گیشتر پوریاگرانی سیادی اوگانستان ءُ دمگی مردماں چہ بنت-

گل ءَ شکایت کتگ کہ اشکر کھن وئیلانی دْرچ برجاہ ءَ اِنت وھدے کہ انتزامیہ ءُ کھن واھُند نیمگ ءَ چہ اے وئیلانی گر ءُ دار ھاتر ءَ ھچ وڑیں گامگیج نہ زُرتگ ءُ پوریاگر وئیلانی دروشم ءَ وتی کُمک ءَ وت کنگ ءَ اَنت-