شال: سھیل ءُ فصیح بلوچ ءِ زورانسری آوار جنی ءِ بگیری ءَ زھرشانی

بلوچستان ءِ بنجاھی شھر شال ءَ بلوچستان شھدربر جاہ ءِ نودربراں زورانسری آوار جنگ بوتگیں وتی سنگتانی یل نہ کنگ ءِ بگیری ءَ دو روچی زھرشانی بنجل ءِ برجم کتگ ءُ سھیل ءُ فصیح بلوچ ءِ یل کنگ ءِ لوٹ کتگ –

ھمے وھد ءَ زھرشانی روانک ءِ ھم کشگ بوتگ کہ مزنیں کچے ءَ جنک ءُ بچکیں نودربراں بھر زرتگ ءُ زورانسری آوار جنیانی بگیری ءَ نارہ جتگ –

نودربرانی گوشگ ات کہ گوستگیں سال ءِ یک نومبر ءَ بلوچستان شھدربر جاہ ءَ زورانسری آوار جنگ بوتگیں نودربر سھیل ءُ فصیح بلوچ ءِ آوار جنی ءَ مروچی سال ءِ سرجم بوتگ بلے ھنگت تاں سرکار آھانی یل کنگ ءَ بے سوب بوتگ –

درنگاز کنوکانی گوشگ ات کہ شھدربرجاہ ءِ تہ ءَ سنگتانی آوار جنی ءَ پد ھما دمان شھدربرجاہ واکدار سرپد کتگ انت بلے شھدربرجاہ ءِ واکداراں اے جیڑو سنجیدگی ءَ گوں نہ زرتگ کہ پدا رند ءَ نودربراں زھرشانی راہ گچین کتگ کہ ماھے ءُ پانزدہ روچاں شھدربرجاہ ءِ تہ ءَ نندانک جتگ ءُ سرجمیں بلوچستان ءَ ھوار پاکستان ءِ وانگجاھاں ھم کلاس نہ گپتگ ءُ پُرایمنیں زھرشانی نبشتہ کنائینتگ – سرکار ءِ وزیرانی چیردستی ءَ گند ءُ نندی کمیٹی ءِ اڈ دیگ بوتگ بلے پہ بژن کہ گند ءُ نند کنوکیں کمیٹی ءِ باور کنائینگ ءَ پد ھم نودربر یل کنگ نہ بوتگ انت ءُ ناکہ سرکار کمیٹی ءِ نیمگ ءَ گامگیج زورگ بوتگ –

درنگاز کنوکانی گوشگ ات کہ ھمے زوتاں سی ٹی ڈی ءِ نیمگ ءَ بازیں ورنایے دروگیں میڑ ءَ جنگ بوتگ کہ چریشی ءَ نودربر ترس آماچ کتگ انت سھیل ءُ فصیح ءِ زند ءِ درگت ءَ ھم مارا ترس انت –

آھاں لوٹ کتگ کہ ھستیں وھدے سرکار وتی زمہ واریاں مارشت بہ بیت ءُ بنکی انسانی ھکانی پاسداری کنان ءَ نودربراں یل بکنائین ایت اگاں ملک ءِ کانود ءُ رھبندانی پاسداری کنان ءَ آھان آمیدگس ءَ بیاریت –

بی ایس او ءِ رھشوناں میان استمانی انسانی ھکانی ادارھاں چہ لوٹ کتگ کہ بلوچ نودربرانی پروفائلنگ، زورانسری آوار جنی ءَ ھوار ایندگہ در انسانی رویش بگیری ءَ گامگیج بہ زور انت –