بلوچستان ءَ جتا جتائیں جاھاں وئیلانی آسر ءَ سے مردم بیران بیتگ اَنت

بلوچستان ءِ جتا جتائیں دمگ نوشکی ، پشین ءُ کیچ ءَ دگ ءُ تیرگواری ءِ وئیل آسر ءَ سے مردم بیران بیتگ-

سربوتگیں ھالانی رِد ءَ پشین ءَ تیرگواری ءِ آسر ءَ پولیس کارندھے بیران بیتگ ءُ آئی ءِ پجّار ذبیح اللہ نام ءَ چہ بیتگ-

پولیس گْوشگ اِنت کہ وئیل ھما وھد ءَ دیم ءَ اَتکگ وھدے پولیس کارندہ تھانہ سرخاب ءَ چہ لوگ ءَ روگ ءَ بیتگ ناشناسیں مردماں تیرگواری کتگ ءُ کُشتگ-

زانگ بہ بیت پشین ءَ یک ھپتگے ءِ تہ ءَ اے دومی وئیل اِنت کہ پولیس نشانگ کنگ بیگ ءَ اَنت-

دومی نیمگ ءَ بلوچستان ءِ دمگ نوشکی ءَ ھال سر بیتگ کہ بس ٹرمینل ءِ نزیک ءَ تیرگواری ءَ چہ نوید نامیں مردمے بیران بیتگ-

تنی وھدے اے وئیل سوب زانگ نہ بیتگ-

ھمے وڑ تربت ءَ ایئرپورٹ نزیک ءَ دگ وئیل ءَ سوزوکی ءُ پرپٹ ءِ میان ءَ ڈک وارتگ ءُ چریشی ءِ آسر ءَ پرپٹ سواریں مرد ھم دمان ءَ بیران بیتگ-

زانگ بہ بیت بلوچستان ءَ دگ وئیل ھمکروچ دیم ءَ کاینت ءُ اے وئیلانی آسر ءَ بازیں کچے مردم بیران ءُ ٹپی بیتگ اَنت-