ھاران: جسٹس محمد نور مسکانزئی ءِ کوش ءَ دزگیر کنگ بوتگیں ورنایانی کھولانی نیمگ ءَ زھرشانی

کاؤنٹر ٹیررزم ڈپارٹمنٹ ءَ وتی بے سوبی ءِ چیر دیگ ءِ ھاتر ءَ مئے زھگ ءِ سر ءَ دروگیں کیس ءِ جتگ- کھول

سی ٹی ڈی ءِ نیمگ ءَ گوستگیں چیف جسٹس محمد نور مسکانزئی ءِ کوش ءَ دزگیر کتگیں شفقت یلانزئی ءُ عجاب یلانزئی ءِ کھول ءِ نیمگ ءَ مروچی ھاران ءَ زھرشانی ءُ روانک کشگ بوتگ –

زھرشانی ءَ شفقت یلانزئی ءُ عجاب یلانزئی ءِ کھول ءَ ھوار دگہ چاگردی ءُ سیاسی گلانی باسکاں مزنیں کچے ءَ بھر زرتگ –

زھرشانی کنوکانی گوشگ ات کہ سی ٹی ڈی ءَ گوستگیں روچاں شفقت یلانزئی زاھر کتگ ءُ آئی ءِ سر ءَ دروگیں کیس جتگ – شفقت لھتے روچ ساری دگہ دو سیاد جابر یلانزئی ءُ نجیب یلانزئی ھمراھی ءَ پوج ءُ چیریں ادارھانی کارمنداں چہ ھاران ءَ آوار جتگ ءُ بیگواہ کتگ انت –

آھانی گوشگ ات کہ شفقت ءِ آوار جنی ءَ پد یک دگہ سیاد ءِ عجاب یلانزئی ھم پوج ءُ چیریں ادارھاں آوار جتگ ءُ بیگواہ کتگ – مارا ترس انت کہ آئی ءِ سر ءَ ھم سی ٹی ڈی دروگیں جنت ءُ پنسارینیت –

درنگاز کنوکانی گوشگ ات کہ ھاران ءَ ھمک روچ سی ٹی ڈی ءِ درکانودی سرپُر برجاہ انت، نودربر آوار جنگ بنت پدا آھانی سر ءَ دروگیں کیس جنگ بیت یا دروگیں میڑاں کشگ بنت –

زانگ بہ بیت گوستگیں روچاں سی ٹی ڈی ءَ ٹاہ داتگ کہ ھاران ءَ جنگ بوتگیں جسٹس نور محمد مسکانزئی ءِ کوش ءِ الزام ءَ یک مردمے دزگیر کتگ –

سی ٹی ڈی ءِ رِد ءَ دزگیر کنگ بوتگیں مردمے سیادی چہ بلوچ سلاہ بندیں گلان انت کہ آئی ءَ گوستگیں بلوچستان چیف جسٹس نور محمد مسکانزئی ءِ کوش ءَ ھوار دگہ کتکاری کتگ انت – سی ٹی ڈی ءَ دزگیر کتگیں مردمے پجار شفقت یلانزئی پنام ءِ دلاور نام ءَ کتگ –

سی ٹی ڈی ءِ دست ءَ دزگیر بوتگیں شفقت یلانزئی ءِ پت ءَ گوستگیں روچ ءَ وتی درشان ءِ تہ ءَ گوشتگ ات کہ آئی ءَ زھگ بیست ءُ سَے اکتوبر ءِ شپ ءَ چہ ھاران گواش دگ ءَ دگہ دو سیاد جابر علی یلانزئی ءُ نجیب اللہ یلانزئی ءِ ھمراھی ءَ دزگیر کتگ انت – آئی ءِ رپورٹ نبشتہ کنگ ءَ ما ھاران تانہ ءَ ھم شتگ انت – بیست ءُشش رمس ءَ منی زھگ ءِ ھمراہ جابر ءُ نجیب یل کنگ بوتگ انت وھدیکہ شفقت یل کنگ نہ بوتگ –

آئی ءَ گوشتگ کہ شفقت ءِ سر ءَ ھما کتکاری ءِ کہ الزام جنگ بوتگ انت دراہ دروگ انت بے سوب ءَ کھول دلسیاہ کنگ بوگ ءَ انت – شفقت کسانیں زھگے کہ آئی اُمر نوزدہ سال انت کہ آئی ءَ ھمے زوتاں انٹر میڈیٹ چکاس داتگ بوتگ ءُ شریں نمبراں سوبین بوتگ –

آئی ءِ پت ءِ گوشگ ات کہ شفقت مدامی مگرب ءِ نماز ءَ پد وتی گس ءَ اتکگ اگاں آئی ءَ کمے دیر کتگ گڈا کھول پریشان بوتگ – من انساپ لوٹیں کور کماندر، سروزیر دگہ واکدار مارا انساپ بہ دی انت – شفقت ءُ آئی ءِ کھول ءَ نہ کرتگیں کارانی سزا دیگ مہ بیت –

شفقت ءِ پت ءَ دیمتر ءَ گوشتگ کہ من بزگریں کھولے ءَ چہ سیادی داراں، راشن ءِ کسانیں دکان یے کہ آئی ءَ چہ بس گزارا کنگ بیت – شفقت تنی وھدی کسان انت آئی ءِ سر ءَ چشیں ٹوھیں الزام جنگ مارا ازابانی آماچ کنت پہ رب ءَ بہ چاریت مارا انساپ بدئیت –