کیچ: مکران ءَ وتکشیانی گر ءُ دار ءِ ھاتر ءَ مراگشے برجم دارگ بیتگ

کیچ بنجاھی شھر تربت ءَ مکران ءَ وتکشیانی گر ءُ دار ءِ ھاتر ءُ وتکشی کنگ ءِ سوب ءِ بنگپ ءِ سر ءَ مروچی بوائز ماڈل ھائی سکول تربت ءَ سول سوسائٹی ءِ چیردستی ءَ مراگشے برجم دارگ بوتگ –

مراگش ءَ ماژگی نادراھانی زانتکار ڈاکٹر تاج بلوچ، مکران میڈیکل کالج ءِ لکچرار ءُ سائیکالوجسٹ ڈاکٹت شعیب کاشانی ءُ نامداریں دینی اسکالر پروفیسر صلاح دین بلوچ ءَ تران کتگ –

مراگش ءَ ترانکاراں بلوچستان ھاسکر کیچ ءَ ھمے زوتاں وتکشی وئیلانی گیش آیگ ءُ وتکشی کنگ ءِ سوب ءِ درگت ءَ وتی ھیال درشان اتگ انت ءُ گوشتگ کہ چاگردی زند ءِ تہ ءَ مدامی جیڑہ ءُ جنجال، ماژگی نادراھی، بے روزگاری ءُ انگزائٹی سوب ءَ گیشتر مردم وتکشی کن انت، ایوکیں مردم مدامی ڈپریشن آماچ بنت ءُ ھمے مردم مار انت کہ پہ آھاں زند ءِ دراھیں در بند کنگ بوتگ انت پمے ھاتر ءَ وت وت ءَ مرگ ءِ دیمپان کن انت –

آھانی گوشگ ات کہ مکران ءَ اے سال ءَ کم چہ کم سِی ءَ گیش مردماں وتکشی کتگ وھدیکہ بس اگست ماہ ءَ پانزدہ مردماں وتکشی کتگ بلے اشی ءَ پکائیں ءُ سرکاری ریکارڈ نیست اِنت ءُ ناکہ وتکشی کنگے سوب زانگ جھد کنگ بوتگ – آھانی گوشگ ات کہ ڈپریشن ھاموش بلے ھترناکیں نادراھی یے – اشی ءِ آماچیں مردم وت نہ زان انت کہ آ ڈپریشن ءِ آماچ انت ھمے ھاتر ءَ اے وڈیں مردمانی مات ءُ پت، کھول ءِ مردم سنگت یا ھم تبک ھر ھما وھد ءَ کسی ءَ اے وڈی ءَ گند انت گڈا ھما دمان ءَ سائیکالوجسٹ گور ءَ بہ بر انت –

آھانی گوشگ ات کہ جھان ءِ تہ ءَ وتکشی کنگ گیش بوتگ – یک رپورٹ ءِ رِد ءَ پاکستان ءِ تہ ءَ ھمک روچ کساس پنچ مردم وتکشی کن انت – وھدیکہ ڈبلیو ایچ او ءِ پٹ پولی رپورٹ ءِ تہ ءَ گوشگ بوتگ کہ جھان ءِ تہ ءَ ھر چِل ملٹ ءِ تہ ءَ یک مردمے وتکشی کنت –

آھانی گوشگ ات کہ مکران ءِ تہ ءَ ھم اے روچاں گندگ بیت کہ وتکشی ءِ تہ ءَ باز گیشی اتکگ کہ بے روزگاری ءَ ھوار اشی ءِ دگہ بازیں سوب بوت کن انت، اشی ءِ گرءُدار ءِ ھاتر ءَ سرپدی دیگ ءِ سیشن ءِ المی انت –

مراگش ءِ اسٹیج سیکٹری اسد بلوچ بوتگ وھدیکہ مراگش ءَ تربت سول سوسائٹی کے کنوینر گلزار دوست، تربت ءِ اسسٹنٹ کمشنر بھرام سلیم، آل پارٹیز کیچ ءِ کنوینر خلیل تگرانی، ڈپٹی کنوینر ظریف زدگ بلوچ، نیشنل پارٹیءِ دمگی جنرل سیکرٹری فضل کریم، جمال بلوچ، انجمن تاجران تربت ءِ گوستگیں سرکماش حاجی کریم بخش، تربت پریس کلب ءِ سرکماش طارق مسعود، پروفیسر گلاب احمد، تربت سول سوسائٹی ءِ ڈپٹی کنوینر جمیل عمر، گرلز ڈگری کالج تربت ءِ ماسٹر ءُ نودبراں ابید بوائز ماڈل اسکول ءِ نودربراں ھم بھر زرتگ – وھدیکہ بوائز ماڈل سکول تربت ءِ پرنسپل واجہ علی جان ءَ مراگش واکداری گون بوتگ –